კახა კალაძე ევროკავშირის ელჩის განცხადებაზე: როდესაც ვსაუბრობთ საელჩოების და უცხოელი მაღალჩინოსნების საარჩევნო კამპანიაში ჩარევაზე, ეს კონკრეტული ფაქტი პირდაპირ მიუთითებს ამაზე

დედაქალაქის მერი კახა კალაძე ეხმაურება საქართველოში ევროკავშირის ელჩის, პაველ ჰერჩინსკის განცხადებას, რომელშიც მან სამარცხვინო და შემზარავი უწოდა „ქართული ოცნების“ საარჩევნო ბანერებს და ვიდეორგოლებს და მას ქვეყანაში მიმდინარე საარჩევნო კამპანიაში გარე ჩარევის მცდელობად აფასებს.

კახა კალაძის თქმით, ძნელი წარმოსადგენია, რომ რომელიმე განვითარებულ ქვეყანაში საქართველოს ელჩის მსგავს განცხადებას შესაბამისი რეაქცია არ მოჰყოლოდა.

„როდესაც ვსაუბრობთ გარე ჩარევაზე, საელჩოების და უცხოელი მაღალჩინოსნების საარჩევნო კამპანიაში ჩარევაზე, ეს კონკრეტული ფაქტი პირდაპირ მიუთითებს ამაზე. ევროკავშირის ელჩი გამოდის, რომელსაც არანაირი იურიდიული და სამართლებრივი დასაბუთება არ აქვს, რომ აღნიშნული საარჩევნო ვიდეორგოლები ეწინააღმდეგება კანონს, ან წარმოადგენს რაიმე პრობლემას. ევროკავშირის ელჩს არ მოსწონს, მისთვის თურმე შემზარავი ყოფილა. რა თქმა უნდა, მძიმეა ეს ის ყველაფერი, რაც უკრაინაში ხდება. ამას მოგვიწოდებდნენ ჩვენ, რომ იგივე გაკეთებულიყო საქართველოში, მეორე ფრონტი გახსნილიყო, სანქციებს მივერთებოდით. გამოდიოდნენ და იძახდნენ პირდაპირ, რომ გვირჩევნია, ბომბები ცვიოდეს ქვეყანაში, ვიდრე ასეთ და ამ ტიპის განცხადებებს ვისმენდეთო, მე რამეს ხომ არ ვიგონებ?! როდესაც მეორე მხარეს არის რადიკალური ოპოზიცია, რომელიც გარედან იმართება, თქვენ ხომ არ გგონიათ, რომ თვითონ აჟღერებენ ამ მესიჯებს, იგივე მეორე ფრონტთან დაკავშირებით?! პირდაპირ დავალებებით კეთდება ეს ყველაფერი“, - აცხადებს კახა კალაძემ.

მისივე თქმით, ქვეყანას ომი გამოვლილი აქვს და მისი გამეორება არავის სურს.

„ხალხმა უნდა იცოდეს, რა არის ერთ მხარეს და მეორე მხარეს. ერთ მხარეს არის მშვიდობა, სიმშვიდე, ქვეყნის განვითარება, ეკონომიკური გაძლიერება, ოჯახების კეთილდღეობა. მეორე მხარეს არის ომი, ნგრევა, სოფლების განადგურება, გაუბედურება, ტერიტორიების დაკარგვა, გამოვლილი გვაქვს ეს უკვე. 2008 წელს, სამწუხაროდ, საკუთარ თავზე გამოვცადეთ, რამხელა საშინელების მომტანია ომი. არ გვინდა იგივე გავიმეოროთ, შესაბამისად, ეს განცხადებები, რასაც ვისმენთ ელჩის მხრიდან, პირდაპირ საარჩევნო კამპანიაში ჩარევის მცდელობაა და აქაც, რა თქმა უნდა, უნდა მოვუწოდოთ საერთაშორისო სადამკვირვებლო მისიებს, მთელ მსოფლიოს გავაგებინოთ, როგორ იქცევა ევროკავშირის ელჩი და სხვა კონკრეტული საელჩოები. წარმოიდგინეთ, ნორმალურ, განვითარებულ ქვეყანაში რომ გამოვიდეს საქართველოს ელჩი და გააკეთოს ამ ტიპის განცხადებები. ყველა განვითარებულ ქვეყანაში, ვინც ასეთ რამე იკადრებდა, გამოაპანღურებდნენ ქვეყნიდან მაშინვე“, - განაცხადა კახა კალაძემ.