დავით მათიკაშვილი: საზოგადოებას არ გაუკვირდება, თუ ძალოვანი სტრუქტურები ბოლომდე დაადგენენ, რომ ბაჩო ახალაიას ერთ-ერთი წამყვანი როლი ჰქონდა ანტისახელმწიფოებრივ ქმედებაში

საზოგადოებას არ გაუკვირდება, თუ ძალოვანი სტრუქტურები ბოლომდე დაადასტურებენ და დაადგენენ, რომ ბაჩო ახალაიას ერთ-ერთი წამყვანი როლი ჰქონდა ანტისახელმწიფოებრივ, კრიმინალურ ქმედებაში, რომელიც პრეზიდენტის სასახლეზე შტურმის სახით განხორციელდა, – ამის შესახებ პარლამენტის საპროცედურო საკითხთა კომიტეტის თავმჯდომარე დავით მათიკაშვილმა განაცხადა.

მათიკაშვილის თქმით, აქამდე არსებული ყველა მტკიცებულება მის ბრალეულობაზე მიუთითებს.

„არც ის არის გასაკვირი, რომ „ნაცმოძრაობის“ ხელისუფლების ჩინოსანი კვლავ შეეცადოს, რევანშს მიაღწიოს ძალადობრივი მოქმედებებით და ამაში აქტიური როლი ჰქონდეს. გამოძიებას და სასამართლოს განაჩენს დაველოდებით, რომელიც ვფიქრობ, ბაჩო ახალაიას სასარგებლო არ იქნება. აქამდე არსებული ყველა მტკიცებულება მის ბრალეულობაზე მიუთითებს“, – განაცხადა მათიკაშვილმა.

4 ოქტომბრის საქმესთან დაკავშირებით სუს-მა საქართველოს თავდაცვის ყოფილი მინისტრი ბაჩო ახალაია დააკავა. როგორც სუს-ში განაცხადეს, გამოძიებით დადგინდა, რომ ბაჩო ახალაია „დანაშაულებრივ მოვლენებს ხელმძღვანელობდა და მთავარი ორგანიზატორი იყო“.

სუს-ში გამართულ ბრიფინგზე ასევე განაცხადეს, რომ ბაჩანა ახალაიასთან ერთად დააკავეს ანა ნადარეიშვილი და აღნიშნეს, რომ „მიღებულია გადაწყვეტილება ანა ნადარეიშვილის გათავისუფლებაზე, მიუხედავად იმისა, რომ ბაჩანა ახალაიამ საერთოდ უარი განაცხადა ყველანაირი ჩვენების მიცემაზე, მათ შორის, მას ჰქონდა შესაძლებლობა, ეპასუხა კითხვაზე – მხოლოდ ის კონტაქტობდა დანაშაულის სხვა ორგანიზატორებთან, თუ ჩართული იყო მისი მეუღლე ანა ნადარეიშვილიც, რითაც თავადაც არ გამორიცხა დანაშაულის ჩადენაში მისი მეუღლის თანამონაწილეობა“. როგორც სახელმწიფო უსაფრთხოების სამსახურში ბრიფინგზე აღინიშნა, გამოძიება იმსჯელებს, მონაწილეობდა თუ არა ანა ნადარეიშვილიც 4 ოქტომბრის დანაშაულებრივ მოვლენებში.

ამასთან, ბაჩო ახალაიას მეუღლემ, ანი ნადარეიშვილმა განაცხადა: „სიდუხჭირის გამო ბაჩო ახალაია და ზვიად გაგუა აპირებდნენ წასვლას პოლონეთში, საზღვარზე არ გაუშვეს, მინდა, შევიდე ბაჩოსთან, როგორც მისი ადვოკატი“.