დავით მათიკაშვილი: მზად ვართ არა თუ აღვადგინოთ ის სტრატეგიული ურთიერთობა, რომელიც ასე ყოვლად უარგუმენტოდ შეწყვიტა აშშ-მა, არამედ ახალი გზამკვლევით ვისარგებლოთ და კიდევ უფრო გავაღრმაოთ ურთიერთობები

ჩვენ მზად ვართ გადატვირთვისთვის. ჩვენ ამაზე არაერთხელ განგვიცხადებია აშშ-ის წინა ადმინისტრაციის პირობებში, - განაცხადა გადაცემა „დღის ქრონიკაში“ საპროცედურო საკითხთა და წესების საპარლამენტო კომიტეტის თავმჯდომარემ, დავით მათიკაშვილმა.

„ჩვენ არაერთხელ გვითქვამს, რომ ჩვენ ვართ პატარა ქვეყანა, ჩვენ ბევრის გაკეთება ამ კუთხით არ შეგვიძლია, თუმცა ვართ აბსოლუტურად ღია და გამჭვირვალე, მზად ვართ არა თუ აღვადგინოთ ის სტრატეგიული ურთიერთობა, რომელიც ასე ყოვლად უარგუმენტოდ, ცალმხრივად და დაუსაბუთებლად შეწყვიტა აშშ-მა, არამედ ახალი გზამკვლევით ვისარგებლოთ და კიდევ უფრო მეტად გავაღრმაოთ ის ურთიერთობები, რომლებიც გუშინ იყო. ამის ყველა რესურსი არსებობს. ოღონდ ეს არ შეიძლება იყოს ცალმხრივი. არ შეიძლება იყოს ცალმხრივად, მაგალითად ქართველთა სურვილი ამერიკელების გვერდზე იბრძოლონ ნატოს და ამერიკის ეგიდით ჩატარებულ მისიებში და, ამავდროულად, ჩვენ პასუხად მივიღოთ, რომ არ არსებობს უვიზო მიმოსვლა, არ არსებობს პირდაპირი ფრენები, არ არსებობს თავისუფალი ეკონომიკური სავაჭრო ურთიერთობები. რაღაც ადეკვატური, რელევანტური ნიადაგი სჭირდება ამ ყველაფერს“, - განაცხადა მათიკაშვილმა.

მათიკაშვილმა აღნიშნა, რომ აშშ-თან ასეთი ურთიერთობების აღდგენა და კიდევ უფრო მეტად გაღრმავება არა მხოლოდ ქართული მხარის, არამედ აშშ-ის ინტერესშიც შედის. მისი აზრით, მოვლენები ამ კუთხით პოზიტიურად განვითარდება.

მათიკაშვილი ასევე გამოეხმაურა საქართველოს პირველი ვიცე-პრემიერის ლევან დავითაშვილის საქართველოში აშშ-ის საგანგებო და სრულუფლებიან ელჩთან რობინ დანიგანთან შეხვედრას.

„უცხო ქვეყნის ელჩის და მინისტრის, თუნდაც ვიცე-პრემიერის შეხვედრაში რაიმე განსაკუთრებული და გამორჩეული არაფერი არ არის, მაგრამ ეს მოცემულობა, რა თქმა უნდა, არის იმის ინდიკატორი, რომ ურთიერთობების ჭრილში ჩვენ წინ მივდივართ. მივდივართ წინ იმიტომ, რომ ამას წინ უსწრებდა საგარეო საქმეთა მინისტრთან შეხვედრა, ახლა არის ეს შეხვედრა“, - აღნიშნა მათიკაშვილმა.

მან ასევე განაცხადა, რომ მსგავსი შეხვედრები ელჩთან გაგრძელდება, თუმცა მთავარი არა აქ არსებული შეხვედრებია, არამედ ის, თუ რამდენად წარმატებულად მიაღწევს თავის მიზნებს დონალდ ტრამპის ადმინისტრაცია „დიფ სთეითთან“ ბრძოლის საკითხში.

„დღე არ გადის, რომ„დიფ სთეითთან“ მიმართებით ტრამპის ადმინისტრაციის მხრიდან არ გაკეთდეს რაღაც ახალი განცხადება, არ მოხდეს შეფასება, კრიტიკული შეფასება და ანალიზი ამ მოცემულობის. დღე არ გადის, რომ არ იყოს საზოგადოებისთვის წარდგენილი ინფორმაცია, რომ ეს სამწუხარო მოცემულობაა, არახალი მოცემულობაა, არა მხოლოდ ამერიკის ფენომენია, არამედ ევროპაშიც აქვს საკმაოდ ღრმად ფესვები გადგმული”, - განაცხადა მათიკაშვილმა.