ზელენსკი: რუსი სამხედროები სახლისკენ გზას ვერაფრით აგნებენ, ამიტომ ჩვენი ჯარისკაცები მათ უფლის სამსჯავროსკენ გზის პოვნაში ეხმარებიან

უკრაინის პრეზიდენტმა ვოლოდიმირ ზელენსკიმ მორიგი ვიდეომიმართვა გაავრცელა. რამდენიმე საათის წინ გაკეთებულ განცხადებაში ვოლოდიმირ ზელენსკიმ აღნიშნა, რომ გუშინ მარიუპოლის ერთ-ერთი სკოლის დაბომბვისას შენობაში 400-მდე მშვიდობიანი მოქალაქე იმყოფებოდა.უკრაინის პრეზიდენტის თქმით, ხალხი ამ დრომდე ნანგრევების ქვეშ არის მოყოლილი.

„რუსი სამხედროები მათ მიერ მოგონილ "უკრაინელ ნაცისტებს" ეძებენ და ვერ პოულობენ. იმ ადამიანებს, ვისგანაც უკრაინელების დაცვა უნდოდათ. ასევე ეძებენ იმ უკრაინელებს, რომლებიც ყვავილებით დახვდებოდნენ, თუმცა ვერც მათ მიაგნეს.

ამასთან, ყველაზე მთავარი ისაა, რომ რუსი სამხედროები სახლის გზას ვერაფრით აგნებენ და ჩვენი ჯარისკაცები მათ ღვთის სასამართლოს წინაშე წარდგენაში ეხმარებიან. სადაც ისინი დარწმუნებული ვარ, მხოლოდ და მხოლოდ სასჯელს მიიღებენ. სასჯელს, რომელიც მუდმივად სარდაფში, ბომბების ქვეშ, შიმშილში, უწყლობასა და სიცივეში ყოფნას გულისხმობს. ეს ყველაფერი მათ მიეზღვებათ იმისათვის, რაც უკრაინელების, მშვიდობიანი მოქალაქეების წინაშე ჩაიდინეს.

მტერმა მარიუპოლის ერთ-ერთი სკოლა დაბომბა, სადაც თავს ადამიანები აფარებდნენ. არც სკოლაში და არც მის სიახლოვეს უკრაინული სამხედრო პოზიცია გამაგრებული არ ყოფილა, პირიქით, იქ 400-მდე მშვიდობიანი მოქალაქე იყო, უმეტესობა ქალები და ბავშვები. ისინი ნანგრევების ქვეშ არიან მოყოლილი. ამ დრომდე არ ვიცით რამდენია ცოცხალი, მაგრამ დარწმუნებული ვარ, რომ პილოტს, რომელმაც ეს ბომბი ჩამოაგდო, აუცილებლად ვიპოვით და დავსჯით ისევე როგორც სხვა პილოტებს, რომლებმაც მშვიდობიანი მოქალაქეები დახოცეს," - განაცხადა ზელენსკიმ.