ევროკავშირის ერთ-ერთი წევრი ქვეყნის მეთაურმა იმ მტკიცებულებების წარდგენა მოითხოვა, რომ ბუჩაში მომხდარი მოვლენები ინსცენირებული არ იყო - ზელენსკი

უკრაინის პრეზიდენტის, ვოლოდიმირ ზელენსკის განცხადებით, ევროკავშირის ერთ-ერთი წევრი ქვეყნის მეთაურმა უკრაინას იმის მტკიცებულებების წარდგენა მოსთხოვა, რომ ბუჩაში მომხდარი მოვლენები ინსცენირებული არ იყო. ამის შესახებ გერმანული გამოცემა წერს. 

ჟურნალისტ პოლ რონცჰაიმერის კითხვას, არის თუ არა ეს პოლიტიკოსი ერთ-ერთი ევროპული ქვეყნის მთავრობის მეთაური, ზელენსკიმ დადებითად უპასუხა, თუმცა თავი შეიკავა მისი ვინაობის დასახელებისგან.

„ყველაზე ცუდი რამ, რაც ზელენსკიმ ბოლო დღეების განმავლობაში მოისმინა? ევროკავშირის წამყვანი პოლიტიკოსი უკრაინის პრეზიდენტისგან იმის მტკიცებულებებს ითხოვდა, რომ ომის დანაშაულები ქალაქ ბუჩაში ინსცენირებული არ იყო“, - წერს გამოცემა.