როგორ იცვლებოდა ფრონტის ხაზი 24 თებერვლიდან დღემდე - ომის 50 დღე და რუსული აგრესია უკრაინის წინააღმდეგ

ზუსტად 50 დღის წინ უკრაინაში საზოგადოების დიდი ნაწილი ელოდებოდა ომს, თუმცა ვერ წარმოედგინათ, რომ ერთმორწმუნე რუსეთი სრულმასშტაბიან შეჭრას განახორციელებდა და თითქმის მთელი ქვეყნის ტერიტორიას დაბომბავდა.
 
რუსეთში ვერ წარმოიდგენდნენ უკრაინის ასეთ წინააღმდეგობას. ბლიცკრიგის გეგმა, რაც მაქსიმუმ 5 დღეში უკრაინის ხელისუფლების და არმიის დემორალიზებას, დანებებას და ყველა დიდ ქალაქზე კონტროლის აღებას ითვალისწინებდა, ჩავარდა.

რასაც 50 დღის წინ ვერ წარმოიდგენდა დანარჩენი მსოფლიო, ეს არის ომის უმძიმესი დანაშაულები და სისასტიკის სრული ნაკრები რუსების მხრიდან.

დღეს სწორედ 50 დღე გავიდა რუსეთ-უკრაინის ომის დაწყებიდან, რომელსაც მოსკოვი დღემდე სპეცოპერაციას უწოდებს.

50 დღის განმავლობაში უკრაინას უკვე 7 მილიონი ლტოლვილი ჰყავს ქვეყნის შიგნით, ქვეყნის დატოვება კი 5 მილიონამდე ადამიანს მოუწია.

განადგურებულია ქალაქები, მსხვერპლის ზუსტი რაოდენობის დასახელება კი ჯერ შეუძლებელია.

სანაცვლოდ რუსეთმა მიიღო სანქციების უპრეცედენტო პაკეტი, განადგურებული სამხედრო ტექნიკა და 20 ათასი მოკლული სამხედრო.