ევროპაში მოგზაურობის წესები იცვლება ! - ნახეთ, დეტალები
1737021978
მაშინ, როცა უკრაინა რუსი ოკუპანტების იერიშებს იგერიებს, რუსეთში ბავშვებს სულ სხვა რეალობას ასწავლიან.
„უკრაინა ხელოვნურად შექმნილი სახელმწიფოა, მისი მთავრობა კი ფაშისტური ხუნტაა, რომელსაც რუსულენოვანი მოსახლეობის მოსპობა სურს. მოსკოვს „სპეციალური ოპერაცია” რომ არ დაეწყო, 3-4 წელიწადში უკრაინა მთლიანად რუსეთის განადგურებას ეცდებოდა“ - მსგავსი ინფორმაცია ესმით ბოლო 4 დღეა რუსეთში სკოლის მოსწავლეებს. ამის შესახებ „რადიო თავისუფლება“ უცხოურ მედიაზე დაყრდნობით წერს.
ე.წ. პატრიოტული გაკვეთილები რუსეთის სკოლებში პირველი მარტიდან დაიწყო. სკოლებს გადაეგზავნათ სპეციალური სახელმძღვანელოები მოსწავლეებისთვის, სადაც დასმულია „სწორი” აქცენტები რუსეთ-უკრაინის ომზე სალაპარაკოდ. სახელმძღვანელო ორია. ერთი VI-VIII კლასების მოსწავლეებისთვის, მეორე კი - IX-XI-ის.
მასალები იმეორებს პუტინის ბოლო გამოსვლების სულისკვეთებას, ხშირად კი პირდაპირ ციტირებს მას. მასწავლებლებმა ბავშვებს უნდა უთხრან, რომ რუსეთი 8 წლის განმავლობაში მოლაპარაკებებს ცდილობდა, მაგრამ უკრაინა უარზე იყო.
გარდა ამისა, ბავშვებს ეუბნებიან, რომ:
➤ 2014 წელს უკრაინაში სახელმწიფო გადატრიალება მოხდა;
➤ დონეცკი და ლუგანსკი სახალხო რესპუბლიკები არიან, მათი მოსახლეობა კი წლებია იჩაგრება მხოლოდ იმიტომ, რომ რუსულად ლაპარაკობს;
➤ უკრაინელები და რუსები ერთი ხალხი არიან და მათი გაყოფა ცალკეულ სახელმწიფოებად ხელოვნურია.
გამოცემა „მედიაზონა” აქვეყნებს ამონარიდებს სახელმძღვანელოდან:
„კითხვა: რატომ მიდის საბრძოლო მოქმედებები?
პასუხი: ნატოს გაფართოება და მისი რუსეთის საზღვრებთან მიახლოება - ჩვენთვის ყველასთვის საფრთხეა. არსებობს ერაყის, ლიბიისა და სირიის სევდიანი გამოცდილება. გარდა ამისა, უკრაინამ შეიძლება შექმნას ბირთვული იარაღი. ქვეყნის ამჟამინდელი ხელისუფლების პირობებში, ეს სავსებით შესაძლებელია“.
ბოლო 4 დღის განმავლობაში, „პატრიოტიზმის გაკვეთილი” უკვე ასეულობით სკოლაში ჩატარდა. თუმცა ბავშვების ინდოქტრინაციას ყველა არ აპირებს. მურმანსკის ოლქის ერთ-ერთი სკოლის მასწავლებელმა, ალექსანდრმა (სახელი შეცვლილია) ბიბისის უთხრა, რომ არ სურს, მოატყუოს საკუთარი მოსწავლეები.
„წინააღმდეგი ვარ იმის, რასაც ეს სცენარები და პრეზენტაციები ქადაგებს. ეს აბსოლუტურად მცდარი ინფორმაციაა. ისტორიული და საზოგადოებრივი წყაროების ანალიზის ნაცვლად, უნდა ვილაპარაკოთ მხოლოდ პრეზიდენტის გამოსვლებზე, ისიც, მხოლოდ საქებარი სიტყვები ვთქვათ”, - ამბობს ალექსანდრი.
კიდევ ერთმა მასწვლებელმა, რომელიც ურალის ოლქში ისტორიას ასწავლის, თქვა, რომ დირექტორმა გაკვეთილის ჩატარება დააძალა. მან დირექციის თხოვნა მხოლოდ ფორმალურად შეასრულა და ახლა იმედოვნებს, რომ „ბავშვები არ გასცემენ”.