პუტინმა სტივენ სიგალი რუსული სახელმწიფოს მაღალი ჯილდოთი დააჯილდოვა

პრეზიდენტმა ვლადიმერ პუტინმა ჰოლივუდის მსახიობი სტივენ სიგალი დააჯილდოვა რუსეთის მთავარი ჯილდოთი, საერთაშორისო მასშტაბით შესრულებული „ჰუმანიტარული და კულტურული საქმიანობისთვის“, ნათქვამია სახელმწიფო ბრძანებულებაში, იტყობინება Reuters და Agerpres.
აღნიშნული განკარგულებით, 70 წლის ამერიკელი მსახიობი დაჯილდოვდა რუსეთის მეგობრობის ორდენით. სტივენ სიგალს ამ თემაზე განცხადება ჯერ არ გაუკეთებია.

განკარგულებაში აღნიშნულია სტივენ სიგალის, როგორც რუსეთის საგარეო საქმეთა სამინისტროს სპეციალური წარმომადგენლის შეერთებულ შტატებთან და იაპონიასთან ჰუმანიტარული ურთიერთობების საკითხებში მოღვაწეობა.

ამერიკელი მსახიობი, რომელიც წელიწადის უმეტეს ნაწილს რუსეთში ატარებს, კვლავ დაპირისპირების ცენტრშია მას შემდეგ, რაც გასულ აგვისტოში პრორუს სეპარატისტებს დონეცკში დოკუმენტური ფილმის გადასაღებად ესტუმრა და ვიდეომიმართვაში განაცხადა, რომ უკრაინელებმა დაბომბეს ოლენივკას ციხე. 

ამერიკელმა მსახიობმა ხაზგასმით აღნიშნა, რომ ზელენსკის სავარაუდო ქმედებები არა მხოლოდ არღვევს ჟენევის ომის დანაშაულების კონვენციას, არამედ წარმოადგენს დანაშაულს კაცობრიობის წინააღმდეგ.

„მსოფლიომ არ იცის სიმართლე. მას სურს შეცვალოს აზრი ამ ომზე“, - თქვა დონეცკის სეპარატისტთა ლიდერმა დენის პუსილინმა უკრაინის ომის შესახებ სიგალის მომავალ დოკუმენტურ ფილმზე.

სტივენ სიგალი, რუსეთის დიდი ხნის მეგობარი
2018 წლის აგვისტოში რუსეთმა დანიშნა სიგალი საგარეო საქმეთა სამინისტროს სპეციალურ წარმომადგენლად მოსკოვში აშშ-სა და რუსეთს შორის ჰუმანიტარული კავშირების „განმტკიცების“ როლით, მას შემდეგ, რაც ორი წლით ადრე ამერიკელმა მსახიობმა რუსული პასპორტი პირადად ვლადიმერ პუტინისგან მიიღო. 

2017 წლის მაისში უკრაინამ მსახიობს მის ტერიტორიაზე შესვლა 5 წლით აუკრძალა და განაცხადა, რომ ის საფრთხეს უქმნის მის ეროვნულ უსაფრთხოებას.

ერთი წლის შემდეგ, სიგალმა გამოაცხადა, რომ ის იყო პრეზიდენტის ვლადიმერ პუტინის ინტერესების წარმომადგენელი და სურდა გამხდარიყო რუსეთის რეგიონის გუბერნატორი. თუმცა, კრემლს არანაირი წინადადება ამ კუთხით არ გაუკეთებია.