თურქეთში, მაღაროში მომხდარ აფეთქებას სულ მცირე 28 ადამიანი ემსხვერპლა

თურქეთში, ბართინის პროვინციაში მაღაროში აფეთქება მოხდა. შემთხვევის შედეგად 28 ადამიანი გარდაიცვალა. ამის შესახებ BBC წერს. 

გამოცემის ცნობით, მაღაროში შემთხვევის დროს ადგილზე, დაახლოებით, 110 ადამიანი 300 მეტრის სიღრმეზე იმყოფებოდა. 

თურქეთის ჯანდაცვის მინისტრის ინფორმაციით, მაღაროდან 11 ადამიანი გამოიყვანეს - მათ სამედიცინო დახმარება უტარდებათ.

მაშველები მაღაროსთან მთელი ღამის განმავლობაში მუშაობდნენ. 

„არიან ადამიანები, რომელთა ადგილიდან გამოყვანასაც ჯერჯერობით ვერ ვახერხებთ“, - ამბობს თურქეთის შსს მინისტრი.

აფეთქების მიზეზი, ჯერჯერობით, უცნობია. მომხდარზე გამოძიება დაიწყო.