საბერძნეთში დაკავებული ვლად პლახატნიუკის ექსტრადირებას რუსეთიც ითხოვს

მოსკოვი ითხოვს, საბერძნეთში დაკავებული მოლდოველი ოლიგარქის ექსტრადირება რუსეთში მოხდეს. ამის შესახებ „ევრონიუსი რომანიას“ მოლდოვის პოლიციის უფროსმა, ვიორელ ჩერნეუცანუმ განუცხადა.

მისივე თქმით, მოლდოვის დემოკრატიული პარტიის ყოფილი ლიდერი ცოტა ხნის წინ იმყოფებოდა რუსეთში, სადაც ის არ დაუკავებიათ.

„ჩვენი მოსაზრებით, ამ ფორმით მოსკოვი ცდილობს მის რუსეთში ჩაყვანას და მისი უსაფრთხოების უზრუნველყოფას“, – განაცხადა მოლდოვის პოლიციის უფროსმა.

ჩერნეუცანუს თქმით, ინტერპოლის წესებით, დამნაშავე, რომელზეც ძებნაა გამოცხადებული, იმ ქვეყანას გადაეცემა, რომელმაც პირველმა მოითხოვა მისი დაკავება. მოლდოვამ ვლად პლახატნიუკზე ძებნა მარტში გამოაცხადა.

ცნობისთვის, 22 ივლისს საბერძნეთში დააკავეს მოლდოველი ოლიგარქი ვლად პლახატნიუკი და ასევე ყოფილი დეპუტატი კონსტანტინ ცაცუ.

მოლდოვის იუსტიციის სამინისტრომ მისი ექსტრადირების პროცედურა უკვე წამოიწყო.

ამასთან, მოლდოვის მედია ავრცელებს ცნობებს, რომ ოლიგარქ პლახატნიუკს დაკავებისას თან აღმოაჩნდა ფალსიფიცირებული დოკუმენტები. მათ შორის უცხო ქვეყნის 10 პასპორტი, რომლებიც გაცემულია ერაყში, რუსეთში, მოლდოვაში, უკრაინაში, რუმინეთში და ბულგარეთში. ასევე ვანუატუში, ბულგარეთსა და რუმინეთში გაცემული ყალბი პირადობის დამადასტურებელი დოკუმენტი და ფალსიფიცირებული მართვის მოწმობები.