რას ჰყვება ორი სასიკვდილო ინიექციის შემდეგ გადარჩენილი სიკვდილმისჯილი, კრისტა პაიკი

აშშ-ში სასიკვდილო განაჩენის აღსრულების წარუმატებელი მცდელობის შემდეგ გადარჩენილმა კრისტა პაიკმა ექიმებთან საუბარი შეძლო, თუმცა, როგორც ჩანს, თავად სიკვდილით დასჯის პროცედურის მომენტი არ ახსოვს.

50 წლის მსჯავრდადებულმა შეძლო საკუთარი სახელის თქმა, თუმცა თარიღი შეეშალა და მიიჩნია, რომ ჯერ კიდევ სექტემბერი იყო. ამის შესახებ BBC-ს ანესთეზიოლოგმა ჯოელ ზივოტმა განუცხადა.

პაიკი გონზე რამდენიმე დღის შემდეგ მოვიდა, მას შემდეგ, რაც მას პენტობარბიტალის ორი სასიკვდილო დოზა გაუკეთეს. ზივოტის თქმით, ამჟამად ქალს ელემენტარულ დონეზე კომუნიკაცია შეუძლია და საავადმყოფოში ყოფნის ზოგიერთი ეპიზოდიც ახსოვს, თუმცა თავად სიკვდილით დასჯის მცდელობის შესახებ მოგონებები, როგორც ჩანს, არ აქვს.

ქალი უკვე მოხსნეს ხელოვნური ვენტილაციის აპარატიდან. ექიმების პროგნოზი კი ამ ეტაპზე კვლავ გაურკვეველია.

ადვოკატების განცხადებით, პაიკის ხელები სერიოზულად არის დაზიანებული — აღენიშნება დამწვრობები და ბუშტუკები. მიუხედავად მძიმე მდგომარეობისა, ქალი კვლავ საავადმყოფოს საწოლზე ხელბორკილებით არის მიბმული.

დაცვის მხარე მის გამოჯანმრთელებას „სამედიცინო თვალსაზრისით უპრეცედენტო“ შემთხვევას უწოდებს და აფრთხილებს, რომ რეაბილიტაციას შესაძლოა ხანგრძლივი დრო დასჭირდეს.

სასიკვდილო ინიექციის მცდელობა
პაიკის სიკვდილით დასჯა 30 სექტემბერს, ნეშვილში მდებარე Riverbend Maximum Security Institution-ის ციხეში უნდა აღსრულებულიყო.

ქალს პენტობარბიტალის ორი დოზა გაუკეთეს, თუმცა მან სუნთქვა განაგრძო, რის შემდეგაც იგი საავადმყოფოში გადაიყვანეს.

ტენესის სასჯელაღსრულების დეპარტამენტი ამტკიცებდა, რომ თანამშრომლებმა პროცედურისთვის გათვალისწინებული ყველა პროტოკოლი დაიცვეს.

თავად პაიკი ჯერ კიდევ აღსრულების დაგეგმვამდე შიშობდა, რომ პროცედურის დროს პრობლემები შეიქმნებოდა. რამდენიმე კვირით ადრე ის საუბრობდა ვენების ცუდ მდგომარეობაზე და შიშობდა, რომ პრეპარატის შეყვანისას ძლიერი წვის შეგრძნება ექნებოდა.

პროცედურისთვის მომზადების დროს ციხის თანამშრომლები დაახლოებით ერთი საათის განმავლობაში ცდილობდნენ ვენაში ინტრავენური წვდომის უზრუნველყოფას. დაცვის მხარის ინფორმაციით კი, ქალის ერთ ხელზე ნემსის ჩხვლეტის სულ მცირე შვიდი კვალი აღმოჩნდა.

ტენესიში დარჩენილი სიკვდილით დასჯები შეჩერდა
პროცედურის ჩავარდნის შემდეგ ტენესის გუბერნატორმა ბილ ლიმ შტატში დარჩენილი სიკვდილით დასჯის აღსრულებები 2026 წლის ბოლომდე შეაჩერა და დამოუკიდებელი გამოძიების ჩატარების განკარგულება გასცა.

სკანდალის შემდეგ თანამდებობიდან წასვლის შესახებ განაცხადა ტენესის სასჯელაღსრულების უწყების ხელმძღვანელმა ფრენკ სტრადამაც.

30 წელი სიკვდილით დასჯის მოლოდინში
კრისტა პაიკს სიკვდილით დასჯა 1995 წელს 19 წლის კოლინ სლემერის მკვლელობისთვის მიუსაჯეს. დანაშაულის ჩადენის დროს თავად პაიკი 18 წლის იყო.

სასჯელის აღსრულების მცდელობამდე ქალი დაახლოებით 30 წლის განმავლობაში სიკვდილმისჯილთა საკანში იმყოფებოდა.

პაიკი შეიძლებოდა გამხდარიყო პირველი ქალი ბოლო ორ საუკუნეზე მეტი ხნის განმავლობაში, რომელსაც ტენესიში სიკვდილით დასჯიდნენ.