1-ლი აგვისტოდან მნიშვნელოვანი სიახლე ამოქმედდება - ინფორმაცია მძღოლებისთვის
1750879109
ნატო-ს ჰააგის სამიტზე ნატო-ს წევრმა სახელმწიფოებმა ერთობლივი დეკლარაცია მიიღეს. დეკლარაცია ხუთი პუნქტისგან შედგება.
როგორც დეკლარაციაშია აღნიშნული, ნატო-ს წევრი სახელმწიფოები კვლავ ადასტურებენ ურყევ ერთგულებას კოლექტიური თავდაცვის მიმართ, როგორც ეს გაწერილია ვაშინგტონის ხელშეკრულების მე-5 მუხლში.
ამასთან, დეკლარაციაში საუბარია, რომ მოკავშირეები ვალდებულებას იღებენ 2035 წლისთვის, ყოველწლიურად განახორციელონ მშპ-ს 5%-ის ინვესტირება თავდაცვის ძირითად მოთხოვნებზე.
ნატო-ს ჰააგის სამიტის დეკლარაცია მოიცავს შემდეგ პუნქტებს:
1. ჩვენ, ჩრდილოატლანტიკური ალიანსის სახელმწიფო და მთავრობის მეთაურები, შევიკრიბეთ ჰააგაში, რათა კვლავ დავადასტუროთ ჩვენი ერთგულება ნატო-ს ისტორიაში ყველაზე ძლიერი ალიანსისა და ტრანსატლანტიკური კავშირის მიმართ. ჩვენ კვლავ ვადასტურებთ ურყევ ერთგულებას კოლექტიური თავდაცვის მიმართ, როგორც ეს ჩაწერილია ვაშინგტონის ხელშეკრულების მე-5 მუხლში, რომ ერთზე თავდასხმა არის ყველაზე თავდასხმა. ჩვენ ვრჩებით ერთიანნი და ურყევი ჩვენს მზადყოფნაში, დავიცვათ ერთი მილიარდი მოქალაქე, დავიცვათ ალიანსი და ჩვენი თავისუფლება და დემოკრატია.
2. გაერთიანებულნი სერიოზული საფრთხეებისა და გამოწვევების წინაშე, კერძოდ, რუსეთის მიერ ევროატლანტიკური უსაფრთხოებისთვის შექმნილი გრძელვადიანი საფრთხისა და ტერორიზმის მუდმივი საფრთხის წინაშე, მოკავშირეები ვალდებულებას იღებენ 2035 წლისთვის, ყოველწლიურად განახორციელონ მშპ-ს 5%-ის ინვესტირება თავდაცვის ძირითად მოთხოვნებზე, ასევე თავდაცვისა და უსაფრთხოებასთან დაკავშირებულ ხარჯებზე, რათა უზრუნველყონ ჩვენი ინდივიდუალური და კოლექტიური ვალდებულებები, ვაშინგტონის ხელშეკრულების მე-3 მუხლის შესაბამისად. ეს ინვესტიციები უზრუნველყოფს, რომ გვქონდეს ძალები, შესაძლებლობები, რესურსები, ინფრასტრუქტურა, საბრძოლო მზადყოფნა და მედეგობა, რაც საჭიროა შეკავებისა და თავდაცვისთვის, ჩვენი სამი ძირითადი ამოცანის – შეკავებისა და თავდაცვის, კრიზისის პრევენციის, მართვის და ერთობლივი უსაფრთხოებისთვის.
3. მოკავშირეები თანხმდებიან, რომ ეს 5%-იანი ვალდებულება შეიცავს თავდაცვითი ინვესტიციების ორ არსებით კატეგორიას. მოკავშირეები გამოყოფენ მთლიანი შიდა პროდუქტის მინიმუმ 3.5%-ს ყოველწლიურად, ნატო-ს თავდაცვითი ხარჯების შეთანხმებული განსაზღვრების საფუძველზე, 2035 წლისთვის, ძირითადი თავდაცვითი მოთხოვნების რესურსების უზრუნველსაყოფად და ნატო-ს შესაძლებლობების მიზნების მისაღწევად. მოკავშირეები თანხმდებიან, წარადგინონ ყოველწლიური გეგმები, რომლებიც აჩვენებს სანდო, ეტაპობრივ გზას ამ მიზნის მისაღწევად. მოკავშირეები ყოველწლიურად შეიტანენ მშპ-ს 1.5%-მდე, კერძოდ, ჩვენი კრიტიკული ინფრასტრუქტურის დასაცავად, ჩვენი ქსელების დასაცავად, ჩვენი სამოქალაქო მზაობის, მედეგობის უზრუნველსაყოფად, ინოვაციების დასანერგად და თავდაცვით-მრეწველობის ბაზების გასაძლიერებლად. ამ გეგმის ფარგლებში ხარჯვის ტრაექტორია და ბალანსი განხილული იქნება 2029 წელს, სტრატეგიული გარემოს და განახლებული შესაძლებლობების მიზნების გათვალისწინებით. მოკავშირეები კვლავ ადასტურებენ თავიანთ ურყევ სუვერენულ ვალდებულებებს უკრაინისთვის მხარდაჭერის გაწევაში, რომლის უსაფრთხოებაც ხელს უწყობს ჩვენს უსაფრთხოებას და ამ მიზნით, მოკავშირეები თავდაცვითი ხარჯების გაანგარიშებისას გაითვალისწინებენ პირდაპირ წვლილს უკრაინის თავდაცვასა და მის თავდაცვით ინდუსტრიაში.
4. ჩვენ კვლავ ვადასტურებთ ჩვენს საერთო ვალდებულებას, სწრაფად გავაფართოოთ ტრანსატლანტიკური თავდაცვითი ინდუსტრიული თანამშრომლობა და გამოვიყენოთ ახალი ტექნოლოგიები, ინოვაციური სულისკვეთება ჩვენი კოლექტიური უსაფრთხოების წინსვლისთვის. ჩვენ ვიმუშავებთ მოკავშირეებს შორის თავდაცვითი სავაჭრო ბარიერების აღმოსაფხვრელად და ინდუსტრიული თანამშრომლობის ხელშეწყობისთვის.
5. ჩვენ გამოვხატავთ მადლიერებას ნიდერლანდების სამეფოს მიერ ჩვენთვის გაწეული დიადი სტუმართმოყვარეობისთვის. მოუთმენლად ველოდებით ჩვენს შემდეგ შეხვედრას თურქეთში 2026 წელს, რასაც მოჰყვება შეხვედრა ალბანეთში.
ცნობისთვის, გასული წლის ნატო-ს დეკლარაცია 38 პუქნტისგან შედგებოდა.
