მეცნიერებმა აღმოაჩინეს, რომ ადამიანის გული ინფარქტის შემდეგ კუნთის აღდგენას შეძლებს

ავსტრალიელმა მეცნიერებმა მნიშვნელოვანი აღმოჩენა გააკეთეს - ადამიანის გულს ინფარქტის შემდეგ ახალი კუნთოვანი უჯრედების წარმოქმნა შეუძლია. კვლევა აჩვენებს, რომ დაზიანებული გულის აღდგენის უნარი შესაძლოა იმაზე მეტი იყოს, ვიდრე აქამდე მიიჩნეოდა.

მეცნიერებმა შეისწავლეს გულის ქსოვილი, რომელიც ინფარქტგადატანილ პაციენტებს გულის შემოვლითი ოპერაციის დროს აუღეს. შედეგად, მათ აღმოაჩინეს, რომ გულის კუნთის ზოგიერთი უჯრედი დაყოფას იწყებს. ეს პროცესი ახალი უჯრედების წარმოქმნას უწყობს ხელს. 

ინფარქტის დროს გულის ნაწილს სისხლი და ჟანგბადი აღარ მიეწოდება, რის გამოც კუნთოვანი უჯრედები ზიანდება ან კვდება. დაზიანებულ ადგილას ხშირად ნაწიბუროვანი ქსოვილი წარმოიქმნება, რომელიც გულის შეკუმშვისა და სისხლის გადატუმბვის უნარს ამცირებს. სწორედ ამიტომ, ინფარქტის შემდეგ ზოგიერთ პაციენტს გულის უკმარისობა უვითარდება.

მკვლევრების განცხადებით, ახალი აღმოჩენა მომავალში შესაძლოა გულის უკმარისობის სამკურნალო ახალი მეთოდების შექმნას დაეხმაროს. მათი მიზანია გაარკვიონ, როგორ შეიძლება გულის ბუნებრივი აღდგენის პროცესის გაძლიერება და ახალი კუნთოვანი უჯრედების წარმოქმნის ხელშეწყობა. 

თუმცა მეცნიერები აღნიშნავენ, რომ აღმოჩენა ჯერ არ ნიშნავს, თითქოს ინფარქტის შემდეგ გული სრულად აღდგება. კვლევა აჩვენებს უჯრედების დაყოფის პროცესს, მაგრამ დამატებითი კვლევებია საჭირო იმის დასადგენად, რამდენად შეუძლია ამ პროცესს დაზიანებული გულის ფუნქციის გაუმჯობესება.