მამაკაცს ჭუჭყიანი წინდების სუნის გამო ფილტვების სოკოვანი ინფექცია განუვითარდა

ჩინელ მამაკაცს  ჭუჭყიანი წინდების სუნის გამო ფილტვების სოკოვანი ინფექცია განუვითარდა. მამაკაცი მუდმივი ხველის გამო საავადმყოფოში მოათავსეს. მამაკაცმა ექიმებს განუცხადა, რომ ბოლო დღეებში ხველის სიროფის მიღების მიუხედავად, მისი ხველა გაუარესდა და თვალები სისხლიანი ჰქონდა, რამაც სამედიცინო დახმარებისკენ უბიძგა.

კომპიუტერული ტომოგრაფიისა და მაგნიტურ-რეზონანსული ტომოგრაფიის ჩატარების შემდეგ, ექიმებმა მის მარჯვენა ფილტვის ქვედა ნაწილში საეჭვო ჩრდილები აღმოაჩინეს, ხოლო შემდგომმა ბრონქოსკოპიამ აჩვენა, რომ პაციენტს ასპერგილოზის ინფექციით გამოწვეული სოკოვანი ფილტვის დაავადება ჰქონდა. ინფექციის შესაძლო მიზეზების შესახებ დაკითხვისას ექიმებმა შეიტყვეს, რომ მამაკაცს საკუთარი ჭუჭყიანი წინდების სუნის შესუნთქვის ჩვევა განუვითარდა.

სამხრეთ-დასავლეთის საავადმყოფოს რესპირატორული მედიცინის განყოფილების მკურნალმა ექიმმა შეიტყო, რომ მამაკაცი სამსახურიდან სახლში დაბრუნებისას ყოველ ჯერზე, სანამ სარეცხ მანქანაში ჩაყრიდა, ჭუჭყიან წინდებს სუნავდა. მისი ჭუჭყიანი წინდების წყვილის ანალიზის შემდეგ, ექიმებმა ასპერგილოზის კვალი აღმოაჩინეს და დაადგინეს, რომ ინფექციის მიზეზი მისი არაჰიგიენური ჩვევა იყო.

გაცვეთილი წინდები შეიცავს ოფლს, მარილს, შარდოვანას, ხოლო ფეხსაცმლის შიგნით თბილი და ნოტიო გარემო ხელს უწყობს სოკოების ზრდას. ჭუჭყიანი წინდების სუნი, თუნდაც ისინი თქვენი იყოს, ზრდის საშიში სოკოებისა და ბაქტერიების შესუნთქვის რისკს. თუ ისინი ცხვირსა და ყელს გაცდება, შეიძლება ფილტვებში მოხვდეს და სოკოვანი ინფექციები გამოიწვიოს.