ლიეტუვაში, ათასობით ადამიანი მედიის თავისუფლებასთან დაკავშირებულ საკანონმდებლო ცვლილებებს აპროტესტებს

ლიეტუვაში ათასობით ადამიანი მედიის თავისუფლებასთან დაკავშირებულ საკანონმდებლო ცვლილებებს აპროტესტებს.

ლიეტუვის პარლამენტის მიმდებარე ტერიტორიაზე დაახლოებით 10 000 ადამიანი შეიკრიბა. აქციის მონაწილეებს ეკავათ პლაკატები წარწერებით: „სიტყვის თავისუფლებისა და მედიის თავისუფლებისთვის“; „ხელები შორს“.

აქციის გამართვის მიზეზი საზოგადოებრივი მაუწყებლის კანონში ცვლილებებია, რომელიც ამარტივებს საზოგადოებრივი მაუწყებლის ხელმძღვანელობის გათავისუფლებას და ზღუდავს საბჭოსა და გენერალური დირექტორის უფლებამოსილებებს.

საპროტესტო აქციის ორგანიზატორი ჟურნალისტები აცხადებენ, რომ საზოგადოებრივი მაუწყებლის დირექტორის გათავისუფლებასთან დაკავშირებული ცვლილებები არაკონსტიტუციურია, ეწინააღმდეგება ევროპულ კანონმდებლობას და ქმნის პირობებს სარედაქციო საქმიანობაში პოლიტიკური ჩარევისთვის. ორგანიზატორები მმართველ უმრავლესობას მოუწოდებენ, გააუქმონ წინადადება საზოგადოებრივი მაუწყებლის დირექტორის გათავისუფლების პროცედურის შეცვლის შესახებ.