იტალიის პოლიციამ მაფიის ბოსის მეორე ბუნკერი იპოვა - სუნამოები, დიზაინერული ტანისამოსი - რას ინახავდა კიდევ მესინა დენარო

მეორე სამალავი, რომელსაც ბუნკერამდე მისასვლელად იყენებდა იტალიის ყველაზე ძებნილი მაფიოზი, მატეო მესინა დენარო, იპოვეს  კაბინეტში, კარადის უკან.

იტალიის პოლიციამ განაცხადა, რომ საიდუმლო ოთახში იპოვეს სამკაულები, ძვირფასი ქვები და ვერცხლის ჭურჭელი.

ასევე ნაპოვნი იქნა ცარიელი ქაღალდის ყუთები, რაც იმაზე მეტყველებს, რომ ორშაბათს მესინა დენაროს დაკავების შემდეგ დოკუმენტები გადამალეს.

დაკავებისას ის გადიოდა ქიმიოთერაპიას, სიცილიაში, კერძო კლინიკაში.

დაკავებიდან მალევე, მაფიის ბოსი გადაიყვანეს აკვილაში, იტალიის ცენტრალურ რეგიონში, სადაც ის აგრძელებს კიბოს მკურნალობას.

მესინა დენარომ უარი თქვა ვიდეოჩართვაზე, 1992 წელს, მოსამართლეების, ჯოვანი ფალკონესა და პაოლო ბორსელინოს მკვლელობის საქმეების მოსმენებზე.

მკვლელობები მხოლოდ ორი დანაშაულია, რომლებშიც დამნაშავედ ცნეს მესინა დენარო, ძლიერი ორგანიზებული დანაშაულებრივი ჯგუფის Cosa Nostra-ს ყოფილი ბოსი.

იტალიური მედია იუწყება, რომ არსებობს მინიშნებები იმის შესახებ, რომ მეორე ბუნკერი - პატარა სივრცე, რომელიც ძლივს ეტევა ერთი ადამიანი, - ახლახან გაჭრეს.

ბუნკერი მდებარეობს სახლში, მაფიის ბოსის პირველი სამალავიდან დაახლოებით 300 მეტრში, სიცილიის ქალაქ კამპობელო დი მაზარაში.

ჩანთაში ნაპოვნმა მანქანის გასაღებმა, რომელსაც მესინა დენაროს დაკავების დროს თან ჰქონდა, გამომძიებლები  პირველ ბუნკერამდე მიიყვანა. პოლიციამ გაჩხრიკა 60 კვ. მ ბუნკერი პირველ სართულზე, რომელიც აღწერილი იყო როგორც "კომფორტული".

იტალიური მედიის ცნობით, შემთხვევის ადგილზე აღმოჩენილია მდიდრული სუნამოები, ძვირად ღირებული ავეჯი და დიზაინერული ტანსაცმელი, ასევე ორი მობილური ტელეფონი და ვიაგრას აბი.

პოლიცია სამი ათეული წლის განმავლობაში ნადირობდა მაფიის ბოსზე. მან კლინიკაში ვიზიტი მოგონილი სახელით დანიშნა.
ფსევდონიმმა - ანდრეა ბონაფედე - პოლიციას ეჭვი გაუღვიძა, როდესაც მიხვდნენ, რომ ეს იყო მაფიის ბოსის გარდაცვლილი ძმისშვილის სახელი.

ორგანიზებული დანაშაულებრივი დაჯგუფების - Cosa Nostra Messina-ს სათავეში ყოფნის დროს დენარო აკონტროლებდა რეკეტს, ფულის გათეთრებასა და ნარკოტიკებით ვაჭრობას.
2002 წელს ის დაუსწრებლად გაასამართლეს მთელი რიგი მკვლელობების გამო.

გაჩნდა დეტალები იმის შესახებ, თუ როგორ ცხოვრობდა მესინა დენარო დაკავებამდე.

ის ცხოვრობდა მოკრძალებულ სახლში კამპობელო დი მაზარაში, პალერმოდან 116 კმ და მისი დაბადების ადგილიდან, კასტელვეტრანოდან მხოლოდ 8 კილომეტრში.

მეზობელმა იტალიურ ტელევიზიას განუცხადა, რომ ხშირად ხედავდა მამაკაცს და რომ ისინი რეგულარულად ესალმებოდნენ ერთმანეთს.