იტალიის 18 ქალაქში სიცხის გამო საფრთხის უმაღლესი დონეა გამოცხადებული

იტალიის 18 ქალაქში სიცხის გამო საფრთხის უმაღლესი დონეა გამოცხადებული. ინფორმაციას ამის შესახებ ინფორმაციას „გარდიანი“ ავრცელებს.

როგორც მედია წერს, ძლიერი სიცხის ფონზე, 24 საათში ხუთი ადამიანი დაიღუპა.

დაღუპულთა შორის არიან: ორი მამაკაცი, რომელიც მინდორში მუშაობისას დაიღუპა, ერთი პირი, რომელსაც სიცხის ფონზე გულის შეტევა დაემართა, ერთი უსახლკარო და ერთი მუშა, რომელმაც სამშენებლო ობიექტზე გონება დაკარგა.

ექსტრემალურმა სიცხემ იტალიაში ასევე გამოიწვია შეფერხებები ელექტროსისტემის ქსელში. ამის გამო, ფლორენციაში, უფიცის გალერეაში კონდიცირების სისტემა შეფერხებებით მუშაობდა. მუზეუმის ადმინისტრაცია იძულებული გახდა შეეზღუდა ვიზიტორთა რაოდენობა და დროებით შეეჩერებინა ბილეთების გაყიდვა.

რამდენიმე რეგიონულმა მთავრობამ სამშენებლო და საკურიერო მომსახურების თანამშრომლებს აუკრძალა ღია სივრცეში მუშაობა, დღის ყველაზე ცხელ საათებში.