ისტორია კაცზე, რომელმაც ოჯახს უთხრა, რომ უცხოპლანეტელებთან ერთად მიდიოდა და მას შემდეგ აღარავის უნახავს

1980 წლის 29 ნოემბრის ქარიშხლიან ღამეს გრეინჯერ ტეილორი გაუჩინარდა. მისი საიდუმლო დღემდე ნაწიოლობრივ ამოუხსნელია.

როგორც ამბობენ, ტეილორმა ოჯახს წერილი დაუტოვა, სადაც აცხადებდა, რომ უცხოპლანეტელთა კოსმოსური ხომალდით მოგზაურობისთვის ემზადებოდა, თუმცა იგი ახლობლებს დაჰპირდა, რომ დაბრუნდებოდა.

CBC-ის ცნობით, მისმა ახლობლებმა ის მექანიკურ ოსტატად აღწერეს, რომელმაც აღადგინა მანქანა, ბულდოზერი, მიტოვებული მატარებელი და მეორე მსოფლიო ომის დროინდელი თვითმფრინავი. ბავშვობაში ტეილორმა ადრე მიატოვა სკოლა, რათა მექანიკისადმი გატაცება განევითარებინა.

მას ბავშვობიდან სჯეროდა, რომ შეეძლო უცხოპლანეტელებთან კომუნიკაცია. ამ მიზნით ადგილობრივ ნაგავსაყრელზე დაგროვილი ნაწილებისგან კოსმოსური ხომალდის ნატურალური ზომის ასლი ააგო.

მისმა დამ განაცხადა, რომ ტეილორი გაუჩინარებამდე რამდენიმე ხნის წინ მჟავას დღეში რამდენჯერმე იღებდა და კანაფს ეწეოდა.

შემდეგ კი ის გაუჩინარდა, ოჯახს წერილი და მთელი თავისი მიწიერი ქონება დაუტოვა.

წერილში ტეილორი ამბობდა, რომ სამწელიწად-ნახევრის განმავლობაში ხანგრძლივ ვარსკვლავთშორის მოგზაურობაში მიემგზავრებოდა, თუმცა, როგორც ჩანს, იქიდან, სადაც წასული იყო, სახლში ვეღარასდროს დაბრუნდა.

მის წერილში ეწერა: „ძვირფასო დედა და მამა, მე წავედი უცხოპლანეტელთა კოსმოსურ ხომალდზე სასეირნოდ, რადგან სიზმრები 42-თვიან ვარსკვლავთშორის მოგზაურობას მპირდებოდა. ყველა ჩემს ნივთს თქვენ გიტოვებთ, რადგან აღარ დამჭირდება მისი გამოყენება. გთხოვთ, გამოიყენოთ ჩემს ანდერძში მოცემული ინსტრუქციები დახმარებისთვის. სიყვარულით, გრეინჯერ.“

მისი ოჯახი და მეგობრები თვეების განმავლობაში ეძებდნენ გრეინჯერს, თუმცა დაკარგული მამაკაცის კვალი არსად ჩანდა.

6 წლის შემდეგ, 1986 წლის მარტში, სატყეო მეურნეობის მუშები შემთხვევით წააწყდნენ აფეთქების ადგილს და დანგრეულ მანქანას მამაკაცის ოჯახის საცხოვრებელი ადგილიდან არც ისე შორს.

მოგვიანებით პოლიციამ დაადასტურა, რომ განადგურებული მანქანის რეგისტრაცია ემთხვეოდა მამაკაცის პიკაპის რეგისტრაციას.

ადგილზე ასევე იპოვეს ადამიანის ძვლის ფრაგმენტები და ტანსაცმლის ნაჭერი, რომელიც, სავარაუდოდ, ტეილორის ერთ-ერთი პერანგიდან იყო, თუმცა სრული ცხედარი ვერსად იპოვეს.

გამოძიებამ დაადგინა, რომ ტეილორი, სავარაუდოდ, აფეთქების დროს დაიღუპა, რამაც მანქანა გაანადგურა. პოლიციამ დაასკვნა, რომ აფეთქების დროს მას სატვირთო მანქანაში დინამიტი ჰქონდა.