ფინეთის ევროპის მინისტრი: ფინეთი დიდი ალბათობით NATO-ს შეუერთდება

ფინეთის მინისტრი ევროპულ საქმეთა საკითხებში, ტიტი ტუპურაინენი აცხადებს, რომ დიდი ალბათობით ფინეთი ნატოს შეუერთდება, განაცხადის პროცესი რაც შეიძლება სწრაფი უნდა იყოს. ამის შესახებ მან მედიასთან საუბრისას განაცხადა.  

„როგორც ჩანს, ფინეთის მოსახლეობამ უკვე მიიღო გადაწყვეტილება და ქვეყნის ნატოში გაწევრიანებას მხარს დიდი უმრავლესობა უჭერს. რა თქმა უნდა, ეს ყველაფერი არ არის. ჩვენ ვართ საპარლამენტო დემოკრატიის მქონე სახელმწიფო, ამიტომ ეს საკითხი ჯერ ჩვენს პარლამენტში უნდა განვიხილოთ. ამ ეტაპზე მე ვიტყოდი, რომ დიდი ალბათობაა, მაგრამ გადაწყვეტილება ჯერ მიღებული არ არის“, - განაცხადა ტიტი ტუპურაინენმა.

მისი თქმით, ვლადიმერ პუტინი დაუნდობელი დიქტატორია, რომელსაც ყოფილი საბჭოთა რუსეთის უკან დაბრუნება სურს.

„ყველა ქვეყანას აქვს უფლება განახორციელოს საკუთარი უსაფრთხოების ზომები. ამიტომ, ჩვენ უნდა ვიყოთ ძალიან ფრთხილად, რათა ჩვენი მანევრი გარე ფაქტორების გამო, არ შევზღუდოთ. ასე რომ, რასაც რუსეთი უსაფრთხოების ფაქტორებზე ამბობს, ჩვენ რა თქმა უნდა, გვესმის, მაგრამ ჩვენ ჩვენს გადაწყვეტილებებს ჩვენივე ინტერესებიდან და პირობებიდან გამომდინარე, ჩვენი საერთო სიტუაციის გათვალისწინებით ვიღებთ. უკვე ვნახეთ, რისი გაკეთება შეუძლია რუსეთს, რისი გაკეთება შეუძლია ვლადიმერ პუტინს. ის დაუნდობელი დიქტატორია და მას ყოფილი საბჭოთა რუსეთის უკან დაბრუნება სურს. ჩვენ არ შეგვიძლია, ამის უფლება მივცეთ. ასე რომ, უნდა გავაკეთოთ ის, რაც უნდა გავაკეთოთ, როგორც დასავლურმა ქვეყნებმა, როგორც ლიბერალური ღირებულებებისა და ლიბერალური დემოკრატიის დამცველებმა და უნდა ვიმოქმედოთ გაერთიანებულად. ჩვენ უნდა მოვახდინოთ რუსეთის იზოლაცია“, - დასძინა ფინეთის მინისტრმა.