ესტონეთი რუსებისთვის ვიზების გაცემას წყვეტს

ესტონეთში 18 აგვისტოს ძალაში შევიდა მთავრობის განკარგულება რუსეთის მოქალაქეებისთვის ვიზების გაცემისა და ესტონეთში გაცემული შენგენის ვიზით ქვეყანაში შესვლის შეზღუდვის შესახებ. 

"ჩვენ ვხედავთ რუსეთის იმ მოქალაქეების რაოდენობის მასობრივ ზრდას, რომლებიც ესტონეთში ჩამოდიან ან ესტონეთის საზღვარს კვეთენ. ესტონეთის მასობრივად მონახულების ან ესტონეთის გავლით ევროპაში მოგზაურობის შესაძლებლობა არ შეესაბამება ჩვენ მიერ დაწესებული სანქციების არსს. სანქციების დაწესებით ესტონეთს სურს, რომ აგრესორ სახელმწიფოს, ასევე მისი ცალკეული მოქალაქეების დონეზე, არ ჰქონდეს შესაძლებლობა, რომ საერთაშორისო დონეზე გააგრძელოს ჩვეულებრივი ცხოვრება", - მოჰყავს ესტონეთის საგარეო საქმეთა მინისტრ ურმას რეინსლაუს სიტყვები რუსულ სააგენტო "ინტერფაქსს".

ესტონეთის სასაზღვრო პოლიციის წარმომადგენლების თქმით, შეზღუდვები ვრცელდება ტურისტულ, სპორტულ და კულტურულ ღონისძიებებზე დასასწრებად და შენგენის ზონაში გასართობი მიზნით მოგზაურობებზე.

გამონაკლისს წარმოადგენენ რუსეთის ის მოქალაქეები, რომლებიც ესტონეთში გრძელვადიანი ბინადრობის უფლებით სარგებლობენ ან ესტონეთში ჰყავთ ახლო ნათესავები. შეზღუდვა არ შეეხებათ ასევე პირებს, რომლებსაც აქვთ შენგენის სივრცეში შესვლის კანონიერი უფლება ან ესტონეთში ჰუმანიტარული მიზნებით მიემგზავრებიან.