დემოკრატი კონგრესმენი ალ გრინი აცხადებს, რომ ტრამპის იმპიჩმენტის საკითხის დაყენებას გეგმავს

დემოკრატი კონგრესმენი ალ გრინი დონალდ ტრამპის იმპიჩმენტის საკითხის დაყენებას გეგმავს. ამის შესახებ „აქსიოსი“ წერს.

პალატის სხდომაზე სიტყვით გამოსვლისას გრინმა გააკრიტიკა ტრამპის განცხადება, რომელიც აშშ-ის პრეზიდენტმა, ისრაელის პრემიერ-მინისტრთან, ბენიამინ ნეთანიაჰუსთან ერთობლივ პრესკონფერენციაზე გააკეთა, რა დროსაც ტრამპმა აღნიშნა, რომ შეერთებული შტატები მზადაა, აიღოს პასუხისმგებლობა ღაზის სექტორზე.

„ეთნიკური წმენდა ღაზაში არ არის ხუმრობა, განსაკუთრებით მაშინ, როცა ეს აშშ-ის პრეზიდენტისგან მოდის. ვაცხადებ, რომ პრეზიდენტის იმპიჩმენტის მოძრაობა დაიწყო. მე წარვადგენ იმპიჩმენტის მუხლებს პრეზიდენტის წინააღმდეგ“, – განაცხადა გრინმა.

თეთრ სახლში ამ საკითხთან დაკავშირებით კომენტარი არ გაკეთებულა.