აშშ-ის ტარიფები სრულიად გაუმართლებელია, ეს არ არის მეგობრის ქმედება - ავსტრალიის პრემიერი

ტარიფები სრულიად გაუმართლებელია, ეს არ არის მეგობრის ქმედება, – ამის შესახებ ავსტრალიის პრემიერ-მინისტრმა, ენტონი ალბანესმა განაცხადა.

ავსტრალიის პრემიერ-მინისტრის თქმით, აშშ-ის მიერ დაწესებული ახალი სავაჭრო ტარიფები სრულიად გაუმართლებელია და შეცვლის ორი ქვეყნის ურთიერთობის აღქმას. ავსტრალიას, რომელიც აშშ-ის ახლო მოკავშირეა, ათპროცენტიანი ტარიფი დაუწესდა.

„ეს ტარიფები მოულოდნელი არ იყო, მაგრამ მინდა, ნათელი ვიყო – ისინი სრულიად დაუსაბუთებელია. ეს არ არის მეგობრის ქმედება. დღევანდელი გადაწყვეტილება გაურკვევლობას გაზრდის გლობალურ ეკონომიკაში და ეს გაზრდის ხარჯებს ამერიკული ოჯახებისთვის“, – განაცხადა ალბანესმა.

ალბანესის თქმით, ავსტრალიასა და აშშ-ს შორის საერთო ისტორია, მეგობრობა და ალიანსი „უფრო დიდია, ვიდრე ცუდი გადაწყვეტილება“, მაგრამ ამ ნაბიჯმა შეიძლება, შეცვალოს ავსტრალიელების წარმოდგენები ქვეყნის აშშ-სთან ურთიერთობების შესახებ.

ამასთან, ალბანესმა გამორიცხა შეერთებულ შტატებზე რამე საპასუხო ტარიფების დაწესება.