აბას არაღჩი: ირანი მიესალმება ჩინეთის ნებისმიერ დიპლომატიურ ძალისხმევას შეერთებულ შტატებთან კონფლიქტის დეესკალაციის მიზნით

ირანი მიესალმება ჩინეთის ნებისმიერ დიპლომატიურ ძალისხმევას შეერთებულ შტატებთან კონფლიქტის დეესკალაციის მიზნით, – ამის შესახებ ირანის საგარეო საქმეთა მინისტრმა, აბას არაღჩიმ განაცხადა.

არაღჩიმ ასევე აღნიშნა, რომ პაკისტანის შუამავლობის მცდელობები არ ჩავარდნილა, თუმცა „ძალიან რთული გზის წინაშე დგას, ძირითადად ამერიკელების საქციელის გამო“.

„ჩინეთის მიერ დიპლომატიის მხარდაჭერის მიზნით განხორციელებულ ნებისმიერ ძალისხმევას ირანის ისლამური რესპუბლიკა მიესალმება“, – განაცხადა ირანის საგარეო უწყების ხელმძღვანელმა ნიუ დელიში გამართულ პრესკონფერენციაზე.

დასავლური მედიის შეფასებით, ჩინეთი ირანის ახლო დიპლომატიური პარტნიორი და მისი ნავთობის უმსხვილესი მყიდველია და ომის განმავლობაში თავს მშვიდობის მომხრედ წარმოაჩენდა.