მკვლელობა შურისძიების მიზნით გურჯაანში, სავარაუდო ბრალდებული დაკავებულია - რას ამბობენ მეზობლები

გურჯაანის მუნიციპალიტეტის სოფელ კალაურში შუახნის მამაკაცმა მეზობელს სასიკვდილო ჭრილობა სანადირო თოფით მიაყენა. მკვლელობა სავარაუდოდ, შურისძიების გამო მოხდა.

2013 წელს, გარდაცვლილმა, სავარაუდო ბრალდებულის დისშვილი მოკლა. მეზობლები ვარაუდობენ, რომ დღევანდელი ფაქტი, წარსულში მომხდარ მკვლელობას უკავშირდება.

შინაგან საქმეთა სამინისტროს კახეთის პოლიციის დეპარტამენტის თანამშრომლებმა ცხელ კვალზე ჩატარებული ოპერატიული და საგამოძიებო ღონისძიებების შედეგად გურჯაანის მუნიციპალიტეტში მომხდარი მკვლელობის ფაქტი გახსნეს, განზრახ მკვლელობის ბრალდებით დაკავებულია 1961 წელს დაბადებული გ. მ.

დანაშაული 7-დან 15 წლამდე ვადით თავისუფლების აღკვეთას ითვალისწინებს.

გამოძიებით დადგინდა, რომ ბრალდებულმა მიმდინარე წლის 26 იანვარს, გურჯაანის მუნიციპალიტეტის სოფელ კალაურში ურთიერთშელაპარაკების შედეგად, სანადირო თოფიდან გასროლით სასიკვდილო ჭრილობები მიაყენა თანასოფლელს - 1985 წელს დაბადებულ გ. ჩ.-ს. პოლიციამ ნივთმტკიცების სახით დანაშაულის ჩადენის იარაღი - სანადირო თოფი ამოიღო.

განზრახ მკვლელობის ფაქტზე გამოძიება სისხლის სამართლის კოდექსის 108-ე მუხლით მიმდინარეობს.