ყველაზე საშიში სერიული მკვლელის, "ჯამბაზის" უკანასკნელი მსხვერპლის ისტორია და სასიკვდილო განაჩენი

1978 წლის 11 დეკემბერს, ილინოისის შტატში, 15 წლის რობერტ პისტი ჩვეულებრივ დღეს ატარებდა. წარმატებული მოსწავლე, მშრომელი ბიჭი, რომელიც ნახევარ განაკვეთზე მუშაობდა დეს პლეინსის აფთიაქში, უბრალოდ ელოდებოდა საღამოს, რომ დედამისთან ერთად სახლში დაბრუნებულიყო. მაგრამ იმ დღეს რობერტის გზა გადაიკვეთა ერთ-ერთ ყველაზე სასტიკ სერიულ მკვლელთან ამერიკის ისტორიაში - ჯონ ვეინ გეისისთან.

ეს იყო მომენტი, რომელმაც 15 წლის რობერტის სიცოცხლეს წერტილი დაუსვა. ამავე დროს, სამუდამოდ დაასრულებდა "მკვლელი ჯამბაზის" სისხლიან ისტორიას.

ჯონ ვეინ გეისი - ორმაგი ცხოვრება კლოუნის ნიღაბის უკან

ჯონ ვეინ გეისი საზოგადოებისთვის ცნობილი იყო როგორც მხიარული, მეგობრული ადამიანი. ის ხშირად გამოდიოდა ჯამბაზი “პოგოს” ფორმაში ადგილობრივ საავადმყოფოებში და საქველმოქმედო ღონისძიებებზე.

მისი ცხოვრება ერთი შეხედვით ჩვეულებრივი იყო - წარმატებული სამშენებლო ბიზნესი, კავშირები საზოგადოებასთან და ღიმილიანი სახე. მაგრამ მისი სახის მიღმა იმალებოდა საშინელი რეალობა: გეისი იყო სერიული მკვლელი, რომელიც წლების განმავლობაში სასტიკად აუპატიურებდა და კლავდა მოზარდ ბიჭებსა და ახალგაზრდებს.

მისი დანაშაულები 1972 წელს დაიწყო და არაერთი წელი გაგრძელდა — მან სულ 33 ადამიანი იმსხვერპლა. მსხვერპლს შორის იყვნენ სახლიდან გაქცეულები ან ისეთი ახალგაზრდები, რომლების გაუჩინარება ხშირად არც კი აინტერესებდა პოლიციას.

საბედისწერო შეხვედრა

1978 წლის 11 დეკემბერს გეისი მივიდა "ნისონის აფთიაქში", სადაც რობერტი მუშაობდა, რათა აფთიაქის მფლობელთან რემონტზე ელაპარაკა. რობერტმა გაიგო, რომ გეისის საზაფხულო სამუშაოს შემოთავაზება ჰქონდა და დაინტერესდა — ხელფასი ორჯერ მეტი იქნებოდა, ვიდრე მაშინ იღებდა.

საღამოს, როცა რობერტის დედა მივიდა მის წასაყვანად, ბიჭმა სთხოვა, დაეცადა - “იმ კონტრაქტორთან” უნდა მესაუბრა სამუშაოზე, თქვა და დაამატა: “მალე დავბრუნდები”.

10 წუთიც არ იყო გასული, რომ მისმა თანამშრომელმა, კიმ ბაიერსმა დაიწყო ძებნა — რობერტი არსად ჩანდა. ბიჭის დედაც გარეთ გავიდა. ისინი მხოლოდ ფეხის ნაკვალევსა და საბურავების კვალს წააწყდნენ ყინულსა და თოვლში.

სასტიკი მკვლელობა და დაკარგული შვილი

როცა რობერტი სახლში არ დაბრუნდა, მისმა მშობლებმა იმავე ღამით, 11:29-ზე, განაცხადეს პოლიციაში შვილის გაუჩინარების შესახებ. მაგრამ ამ დროისთვის რობერტი უკვე მკვდარი იყო.

გეისიმ ის საკუთარ სახლში წაიყვანა ნორვუდ პარკ თაუნშიფში. ზუსტად არავინ იცის, რა მოხდა იმ ღამით, მაგრამ ცნობილია გეისის ხელწერა — მსხვერპლებს აიყოლიებდა თამაშში და აიძულებდა, ხელბორკილები გაეკეთებინათ, შემდეგ უჭერდა ყელზე თოკს და ნელ-ნელა ახრჩობდა. ამას ემატებოდა სექსუალური ძალადობა.

გეისი მსხვერპლს ზოგჯერ ახრჩობდა გონების დაკარგვამდე, შემდეგ ასულიერებდა, რომ ტანჯვა გაეხანგრძლივებინა.

იმ ღამესაც, როდესაც გეისიმ თავი მოაჩვენა, თითქოს არაფერ შუაში იყო, სახლში დაბრუნდა, რობერტის ცხედარი სხვენიდან გამოიტანა, ჩადო მანქანის საბარგულში და გადააგდო დეს პლეინსის მდინარეში.

დატოვებული კვალი

მიუხედავად იმისა, რომ გეისიმ ყველაფერი გააკეთა კვალის წასაშლელად, პოლიციამ მალევე აიღო ეჭვი. 13 დეკემბერს, გეისის სახლში ჩხრეკისას იპოვეს ფოტოაპარატის ფირის ქვითარი, რომელიც ეკუთვნოდა რობერტის თანამშრომელს, კიმ ბაიერსს. ქვითარი შემთხვევით ჩაუდია რობერტის ქურთუკის ჯიბეში — ქურთუკი, რომელიც მოგვიანებით გეისის სახლში აღმოჩნდა. ასევე იპოვეს ბეჭედი, რომელიც ეკუთვნოდა ერთ-ერთ სხვა გაუჩინარებულ ახალგაზრდას, ჯონ შიცს.

და ბოლოს, 21 დეკემბერს პოლიციამ გეისის სახლში ცხედრების ნაშთების აღმოჩენა დაიწყო. ერთი დღის შემდეგ, 22 დეკემბერს, გეისიმ აღიარა დანაშაული. თქვა, რომ 32 ახალგაზრდა ბიჭი ჰყავდა მოკლული სექსუალური აქტის შემდეგ.

გამოძიებამ 29 ცხედარი იპოვა მის სახლში, ხოლო დანარჩენი ოთხი — მათ შორის რობერტ პისტის ცხედარი მდინარეებში აღმოჩნდა.

რობერტის ცხედარი მხოლოდ 1979 წლის აპრილში ამოიცნეს.

სასამართლო, განაჩენი და დაგვიანებული სამართალი

1980 წლის მარტში, გეისის 33 მკვლელობაში ცნეს დამნაშავედ. მას მიესაჯა სასიკვდილო განაჩენი. ის ლეტალური ინექციით 1994 წლის 10 მაისს სიკვდილით დასაჯეს.

ათეულობით ახალგაზრდის გაუჩინარებამ მხოლოდ მაშინ მიიპყრო პოლიციის სერიოზული ყურადღება, როდესაც საქმე შეეხო რობერტ პისტს — წარმატებულ მოსწავლესა და პოლიციელის შვილის თანაკლასელს.

ბევრი ექსპერტი თვლის, რომ გეისის შეჩერება გაცილებით ადრე შეიძლებოდა, მსხვერპლების უფრო ღრმა გამოძიება რომ ჩატარებულიყო.

რობერტ პისტის მკვლელობა გახდა ბოლო წერტილი გეისის სისხლიან სერიალში. მისი გაუჩინარება ის გარდამტეხი მოვლენა აღმოჩნდა, რომელმაც პოლიცია მიიყვანა მკვლელის კარებთან.

ეს იყო ტრაგედია, რომელმაც ასობით ადამიანს ტკივილი მიაყენა, მაგრამ ამავე დროს სიმართლე გამოააშკარავა და შეაჩერა ერთ-ერთი ყველაზე ბოროტი ადამიანი ამერიკის ისტორიაში.