შეფერხებები იქნება სოციალურ ქსელებში, პრობლემები შეიქმნება ინტერნეტის მუშაობაში, სატელეფონო კავშირებში - ასტროლოგის გაფრთხილება

ასტროლოგი ხათუნა ნოელი საზოგადოებას აფრთხილებს. მისი თქმით, ოპტიკური ილუზიის გარდა, მერკურის ერთ წერტილში გაჩერება ნებისმიერ სფეროში მოახდენს გავლენას და მნიშვნელოვანი საქმეები 9 მაისამდე უნდა მოგვარდეს.

„ვიდრე რეტროგრადულობაზე გადავიდოდეს, 9 მაისიდან 12 მაისის პერიოდში, მერკური იქნება სტაციონარული. ეს ნიშნავს, პლანეტის სიჩქარე იმდენად დაბალია, რომ ის თითქმის გაჩერებულია ერთ წერტილში.

ამჯერად, მერკურის ასეთი „გაჩერება“ ტყუპების 04°50'-ზე ექნება. რასაკვირველია, ეს მხოლოდ ოპტიკური ილუზიაა, თუმცა დედამიწაზე მცხოვრებთათვის ეს ილუზია სრულიად რეალურ სირთულეებს ქმნის.

საქმე ისაა, რომ ნებისმიერი პლანეტის დაქვემდებარებაში მყოფი საქმეები/ საკითხები / მოვლენები ვითარდებიან ან ვერ ვითარდებიან ამ პლანეტის მოძრაობის სიჩქარის შესაბამისად. მერკურის მოძრაობის 4-დღიანი გაყინვა შეაფერხებს ჩვენს ცხოვრებაში მერკურიანულ საკითხებს - გონება, მოსმენილის თუ წაკითხულის სხარტად გააზრების და ათვისების უნარი მკვეთრად დაეცემა ყველა აქედან გამომდინარე შედეგებით.

დაიკლებს ურთიერთობის დამყარების სურვილი. შეფერხებები იქნება კომუნიკაციის/ სოციალურ ქსელებში, პრობლემები შეიქმნება ინტერნეტის მუშაობაში, სატელეფონო კავშირებში; ცუდად იმუშავებს ფოსტა, საკურიერო სამსახური. თქვენი შეკვეთა შეიძლება არასწორადაც გაიგონ, ან საერთოდ გამორჩეთ.

საცობებზე აღარც მკითხოთ - თავისთავად იგულისხმება.

ის კი არადა, შეფერხებებით იმუშავებენ მაღაზიებში სალაროებთან მდგომი კონსულტანტებიც, რაც აქაც „საცობებს“ წარმოქმნის. რიგების მიუხედავად, ვაჭრობა იკლებს.

12-ში მერკური რეტროგრადულობაზე გადავა და ნელ-ნელა სიჩქარეს აკრეფს. თუმცა ეს უკვე სხვა თემაა და მაგაზე უახლოეს მომავალში გესაუბრებით. დღეს კი სტაციონარულობაზე მინდოდა გამეფრთხილებინეთ, რომ თუ რაიმეს მოსწრება გინდათ, 9 მაისამდე მოასწროთ.“- აცხადებს ასტროლოგი.