შოტლანდიაში წყლით კრემაცია დაუშვეს - როგორ ხდება აკვამაცია

შოტლანდიაში კრემაციის ალტერნატიული მეთოდი – აკვამაცია (ე.წ. წყლით კრემაცია) ოფიციალურად დაუშვეს. აღნიშნული პრაქტიკა, რომელიც ასევე ცნობილია როგორც ბიოკრემაცია, რეზომაცია ან უალო კრემაცია, ნეშტის დამუშავებას ცეცხლის ნაცვლად წყლის გამოყენებით გულისხმობს.

პროცესი ეფუძნება ტუტე ჰიდროლიზს: ადამიანის ან ცხოველის ნეშტი თავსდება ჰერმეტულ კონტეინერში, სადაც მოთავსებულია წყლისა და კალიუმის ჰიდროქსიდის ნარევი. კონტეინერი 90-150°C-მდე ცხელდება და მასში წნევა იზრდება, რის შედეგადაც ხსნარი დუღილს არ იწყებს, თუმცა რამდენიმე საათის განმავლობაში ორგანულ ნივთიერებებს შლის. საბოლოოდ რჩება მხოლოდ ჩონჩხი.

აკვამაციის შედეგად მიღებული ნარჩენი ნაწილობრივ ჰგავს ტრადიციული კრემაციის ფერფლს, თუმცა განსხვავებით ნაცრისფერი ფერფლისგან, აქ დარჩენილი მასა თეთრი ფერისაა და მოცულობითაც მეტია. მიღებული ნარჩენი, ისევე როგორც კრემაციის შემთხვევაში, შესაძლებელია ახლობლებმა შეინახონ ან მიმოაბნიონ.

მეთოდის ერთ-ერთი უპირატესობა ის არის, რომ აკვამაციის წინ კარდიოსტიმულატორის ამოღება აუცილებელი არ არის. გარდა ამისა, პროცესის დროს სტომატოლოგიური მასალებიდან დარჩენილი ვერცხლისწყალი გადამუშავდება, რაც გარემოსთვის ნაკლებად საზიანოა.

სპეციალისტების შეფასებით, აკვამაცია ტრადიციულ კრემაციასთან შედარებით მნიშვნელოვნად ნაკლებ ენერგიას მოითხოვს – დაახლოებით შვიდჯერ ნაკლებს. ამასთან, პროცესის შედეგად მავნე ნივთიერებები და სათბურის აირები გაცილებით ნაკლები რაოდენობით გამოიყოფა, რაც ნახშირბადის კვალს დაახლოებით 75%-ით ამცირებს.

პროცესის ბოლოს დარჩენილი სითხე წარმოადგენს სტერილურ ორგანულ ნაერთთა ნაზავს – მარილებსა და ამინომჟავებს, რომელთა გამოყენება შესაძლებელია, როგორც სასუქი ან გარემოსთვის უსაფრთხო გზით განთავსება წყლის სისტემებში.

მიუხედავად ეკოლოგიური უპირატესობებისა, აკვამაცია ამ ეტაპზე ფართოდ ხელმისაწვდომი არ არის. თუმცა, ეკოლოგიური ცნობიერების ზრდასთან ერთად, სპეციალისტები ვარაუდობენ, რომ ამ მეთოდის გამოყენება მომავალში კიდევ უფრო გაფართოვდება. ამ დროისთვის გაერთიანებულ სამეფოში აღნიშნული პრაქტიკა პირველად სწორედ შოტლანდიაში დაკანონდა.