მონაცემთა სერვერები მალე კოსმოსშიც განთავსდება - ბეზოსი

Amazon-ის დამფუძნებელმა და აღმასრულებელმა თავმჯდომარემ ჯეფ ბეზოსმა, ტურინში, იტალიური ტექნოლოგიების კვირეულის ფარგლებში, იწინასწარმეტყველა, რომ მომდევნო 10-20 წლის განმავლობაში კოსმოსში გიგავატიანი მონაცემთა დამუშავების ცენტრები აშენდება. მისი აზრით, უწყვეტად ხელმისაწვდომი მზის ენერგია მათ საშუალებას მისცემს გადააჭარბონ დედამიწაზე არსებულ ანალოგებს.

როგორც სააგენტო Reuters იუწყება, ბეზოსის თქმით, ეს იდეა უკვე ფართოდ იზიდავს ტექნოლოგიურ გიგანტებს, რადგან დედამიწაზე მდებარე მონაცემთა ცენტრები სულ უფრო მეტ ელექტროენერგიასა და წყალს მოითხოვენ სერვერების გასაგრილებლად.

„ამ გიგანტური კლასტერების აშენება კოსმოსში უფრო სწორია, რადგან იქ მზის ენერგია 24 საათის განმავლობაში ხელმისაწვდომია. არ არის ღრუბლები, წვიმა, ცუდი ან კარგი ამინდი,“ – განაცხადა ბეზოსმა. მისი თქმით, ეს რეალობად შეიძლება იქცეს მომდევნო რამდენიმე ათწლეულის განმავლობაში. ბეზოსი აღნიშნავს, რომ კოსმოსური ინფრასტრუქტურისკენ გადახრა წარმოადგენს ფართო ტენდენციის ნაწილს — კოსმოსის გამოყენება დედამიწაზე ცხოვრების გასაუმჯობესებლად. მაგალითად, მან დაასახელა მეტეოროლოგიური და საკომუნიკაციო სატელიტები.

„შემდეგი ნაბიჯი იქნება მონაცემთა დამუშავების ცენტრები, ხოლო მოგვიანებით – სხვა სახის წარმოება,“ – დაამატა მან.

ასევე, Amazon-ის აღმასრულებელმა თავმჯდომარემ ხელოვნური ინტელექტის ბოლოდროინდელი ბუმი შეადარა 2000-იანი წლების დასაწყისის ინტერნეტის ბუმს. თუმცა მან საზოგადოებას ოპტიმიზმისკენ მოუწოდა. მისი თქმით, AI-ის ტალღას ბევრი საერთო აქვს dot-com ეპოქასთან, როცა დიდი აჟიოტაჟის შემდეგ ბევრი კომპანია დაინგრა.

„უნდა ვიყოთ უკიდურესად ოპტიმისტურად განწყობილნი იმასთან დაკავშირებით, რომ საზოგადოებრივი და სასარგებლო შედეგები, რაც ხელოვნურ ინტელექტს შეუძლია მოიტანოს – ისევე როგორც ინტერნეტმა 25 წლის წინ – რეალურია და გაგრძელდება.“ – განაცხადა ბეზოსმა.