ბიოლოგი მსოფლიოში „ყველაზე მარტოსულ“ მცენარეზე საუბრობს - ის დინოზავრებზე უფრო ძველია

მცენარეებიდან არცერთი არ არის ისეთი მარტოსული, როგორც ვუდის ციკადი. ამის შესახებ Forbes- ისთვის ამერიკელი ევოლუციური ბიოლოგი სკოტ ტრავერსი წერს .

ექსპერტის თქმით, ციკადი პირველად 1895 წელს სამხრეთ აფრიკაში, ონგოიეს ტყეში აღმოაჩინეს. ეს მცენარე მიეკუთვნება გვარს, რომელიც დინოზავრებზე უფრო ძველია. თუმცა, მისი მდგრადობის მიუხედავად, ეს სახეობა შესაძლოა მალე გადაშენდეს.

„აქამდე მხოლოდ მამრი ვუდის ციკადები იყო ნაპოვნი და ათწლეულების განმავლობაში ძებნის მიუხედავად, ვერცერთი მდედრი ვერ იქნა ნაპოვნი. დღეს ყველა ცოცხალი ვუდის ციკადი ამ ორიგინალური მამრის კლონია. ეს სახეობა მთელ მსოფლიოში ბაღებსა და სათბურებში არსებობს, ცოცხალია, მაგრამ ბუნებრივად ვერ მრავლდება - ბოტანიკური აჩრდილივითაა, რომელიც არსებობას ეჭიდება“, - თქვა ტრავერსმა.

როგორ ახერხებს მსოფლიოში ყველაზე მარტოსული მცენარე პარტნიორის პოვნას?

ათწლეულების განმავლობაში ძებნის მიუხედავად, ამ მცენარის მდედრი ეგზემპლარი ვერასდროს იპოვეს.

„ყვავილოვანი მცენარეებისგან განსხვავებით, ციკადების გამრავლებისთვის ცალკე მამრი და მდედრი მცენარეებია საჭირო. მდედრის გარეშე, ამ მცენარეს თესლის ბუნებრივად გამომუშავება არ შეუძლია. სიტუაციას ართულებს ციკადის ნელი მომწიფება, რომელსაც რეპროდუქციული ასაკის მიღწევას ხშირად ათწლეულები სჭირდება“, - ხაზგასმით აღნიშნა ბიოლოგმა.

ამიტომ, კონსერვაციონისტები ეძებენ შემოქმედებით გზებს, რათა კომპენსირება გაუწიონ მამრს მდედრის თანამგზავრობის ნაკლებობის გამო.

იმედი ხელოვნურ ინტელექტში?

ახლა ხელოვნურ ინტელექტს შეუძლია ციკადებს „სხვების გაცნობაში“ დაეხმაროს. კერძოდ, დრონებისა და ხელოვნური ინტელექტის გამოყენებით მკვლევრებს შეუძლიათ დაკარგული მდედრის პოვნა, რომელიც სადღაც ძალიან შორს არის დამალული.

„დრონები ტყეზე დაფრინავენ და მაღალი გარჩევადობის მულტისპექტრულ სურათებს იღებენ, რომლებსაც შემდეგ ღრმა სწავლების მოდელი ამუშავებს პოტენციური შესატყვისების დასადგენად. ჯერჯერობით ტყის 2%-ზე ნაკლებია გაანალიზებული, მაგრამ ძებნა გრძელდება“, - თქვა ტრავერსმა.