„ყველა ქალის სხეული პლაჟისთვის მზადაა“ - ესპანეთის მთავრობამ ახალი კამპანია წამოიწყო

ესპანეთის თანასწორობის სამინისტრომ საზაფხულო კამპანია წამოიწყო, რომლის მიზანიც იმ ქალების მხარდაჭერაა, რომლებიც ღელავენ იმის გამო თუ როგორ გამოიყურებიან პლაჟზე, საცურაო კოსტიუმში. ამის შესახებ BBC წერს.

გამოცემის ინფორმაციით, კამპანიის სლოგანია „ზაფხული ჩვენიც არის“, მის პოსტერზე კი 5 სხვადასხვა ზომისა და ფორმის ქალია წარმოდგენილი. ავტორებს მიაჩნიათ, რომ ქალებს უნდა ჰქონდეთ საშუალება დატკბნენ ზაფხულით, სტერეოტიპებისა და სხეულების მიმართ ესთეტიკური ძალადობის გარეშე.

კამპანიას ესპანეთში კრიტიკოსებიც ჰყავს. ნაწილი მიიჩნევს, რომ ავტორებს ინიციატივა იმ კაცებზეც უნდა გაევრცელებინათ, ვისაც ე.წ. სტანდარტული სხეულები არ აქვთ, ნაწილი კი აცხადებს, რომ ქალებს პლაჟზე გასასვლელად სამინისტროს ნებართვა არ სჭირდებათ.