პოლიტიკა • 1753127880
თუ ყაველაშვილის შეწყალებას არ აღიარებ, ყაველაშვილის და კობახიძის დანიშნულ არჩევნებს რანაირად აღიარებ? აქ ხდება მარტივი რამ - „დიფ სთეითმა“ გადაწყვიტა, გამოეყვანა ეს ადამიანები პარლამენტიდან და შეეყვანა ციხეში, ეს არის რეალობა, - განაცხადა საქართველოს პრემიერ-მინისტრმა ირაკლი კობახიძემ „ღამის კურიერში“ ოპოზიციური პარტიების წარმომადგენლების პატიმრობასთან დაკავშირებით დასმული კითხვის.მთავრობის მეთაურმა აღნიშნა, რომ კანონი, რომლის საფუძველზეც ამ პირებს შეეფარდათ პატიმრობა, საქართველოში უკვე 30 წელია, მოქმედებს.„ეს არის პარლამენტის რეგლამენტი, რომელიც დამტკიცდა თავიდან 1995 წელს პირვანდელი სახით და თავიდანვე, ევროპული სტანდარტების შესაბამისად, მითითებული იყო, რომ თუ ვინმე აარიდებდა თავს საგამოძიებო კომისიაში მისვლას, მას შეეფარდებოდა 1 წლამდე თავისუფლების აღკვეთა. 30-წლიანი ისტორია აქვს ამ მუხლს. 1 წლამდე თავისუფლების აღკვეთა არის განსაზღვრული ჯერ რეგლამენტით და შემდეგ სისხლის სამართლის კოდექსით და ამ პირებს შეეფარდათ 7-8 თვით თავისუფლების აღკვეთა. დანაშაული რომ იქნა ჩადენილი ამ დისპოზიციის მიხედვით, ეს ყველასთვის ნათელია. სისხლის სამართლის კოდექსში და რეგლამენტში პირდაპირ წერია მარტივი რამ - პირს ევალება კომისიაში მისვლა და თუ არ მივა, გათვალისწინებული 1 წლამდე თავისუფლების აღკვეთა. არ მივიდნენ, თან უხეში ფორმით გააკეთეს ეს, რაც არის დამამძიმებელი გარემოება. მათ უხეში ფორმით თქვეს უარი კომისიაში მისვლაზე და შეეფარდათ 1 წელიწადზე ნაკლები სასჯელი - 7-8 თვე. სამართლის უზენაესობას თუ ვინმე სცემს პატივს, ყველაფერი დღესავით ნათელია, მაგრამ სამართლის უზენაესობა საქართველოში არ უნდა მოქმედედეს. არის ქვეყნები ჩვენს გარშემო, სადაც პოლიტიკოსებს და დეპუტატებს იჭერენ, მაგრამ პირიქით, ეს არის შესაქები ამბავი. საქართველოში არ შეიძლება არც ერთ პოლიტიკოსის დაჭერა. თან ეს არჩევნებთან დააკავშირეს და თქვეს, რომ ამ პირობებში არჩევნები შეიძლება კონკურენტულად ვერ შეფასდეს. გამოვიდა ქვეყნის პრეზიდენტი მიხეილ ყაველაშვილი და განაცხადა, რომ ყველა პოლიტიკოსი, რომელიც განაცხადებს, რომ სურს არჩევნებში მონაწილეობა და შესაბამისი განცხადებით მიმართავს პრეზიდენტს, იქნება დაუყოვნებლივ შეწყალებული. არ ვაღიარებთ მიხეილ ყაველაშვილს და ასეთი სისულელეები ისმის. თუ ყაველაშვილის შეწყალებას არ აღიარებ, ყაველაშვილის და კობახიძის დანიშნულ არჩევნებს რანაირად აღიარებ? აქ ხდება მარტივი რამ - „დიფ სთეითმა“ გადაწყვიტა, გამოეყვანა ეს ადამიანები პარლამენტიდან და შეეყვანა ციხეში. ეს არის რეალობა“, - განაცხადა ირაკლი კობახიძემ.მთავრობის მეთაურის შეფასებით, ეს რადიკალიზაციის სცენარია.„სასოწარკვეთილი რადიკალიზაციის სცენარია. ვერანაირად ვერ აირია ეს ქვეყანა, რომ ჩართულიყო ომში, გახსნილიყო მეორე ფრონტი და ეს არის კიდევ ერთი უსუსური მცდელობა, რომ ჩვენს ქვეყანაში წაახალისონ რადიკალიზმი. სხვა რა ახსნა აქვს? პარლამენტში შევიდა მთელი ოპოზიცია 61 მანდატით. უპრეცედენტო მაჩვენებელია ჩვენი ქვეყნის ისტორიაში. ამ დროს უარს ამბობ ამ მანდატებზე. 4 წელი შეგიძლია, შენ აკრიფო რესურსი, როცა ამხელა რესურსი გაქვს პარლამენტის მანდატების სახით, დღეს საერთოდ გააქრეს, საერთოდ დაიკარგა მთელი ეს ოპოზიცია, იმიტომ, რომ ბოლომდე გაწყვეტაზე მუშაობენ, რადიკალიზაციის მაქსიმალური სცენარია დაგეგმილი და ამის გამო, გამოიყვანეს პარლამენტიდან და შეიყვანეს ციხეში. ეს ხომ ჩვენ არ გაგვიკეთებია. ჩვენ მარტივად ვაცხადებთ - არის კანონი, კანონს უნდა სცეს პატივი ყველამ. უფრო მეტიც, გამოვიდა საქართველოს პრეზიდენტი მიხეილ ყაველაშვილი და განაცხადა, რომ კანონდამრღვევებსაც კი შეიწყალებს, თუ ისინი იტყვიან, რომ სურთ არჩევნებში მონაწილეობის მიღება. აქ ხომ დღესავით ნათელია ყველაფერი, ვის აქვს ეს თვითმიზანი, რომ შეიყვანოს ეს ხალხი ციხეში და ვის არა. ჩვენ რომ გვქონოდა თვითმიზანი, სხვანაირად ვიმოქმედებდით“, -აღნიშნა პრემიერმა.
