პოლიტიკა • 1770998250

მიხეილ ყაველაშვილი: დღეს დასრულდა ხორვატიის რესპუბლიკის პრეზიდენტის ვიზიტი საქართველოში, დიდი მადლობა ჩემს კოლეგას და მის მეუღლეს სტუმრობისთვის და ჩვენი ქვეყნის დაფასებისთვის

ხორვატიის რესპუბლიკის პრეზიდენტის ზორან მილანოვიჩისა და მისი მეუღლის, სანია მუსიჩ მილანოვიჩის ოფიციალური ვიზიტი საქართველოში დასრულდა, - წერს სოციალურ ქსელში საქართველოს პრეზიდენტი მიხეილ ყაველაშვილი.პრეზიდენტი მადლობას უხდის კოლეგას და მის მეუღლეს სტუმრობისთვის და ჩვენი ქვეყნის დაფასებისთვის.„დღეს დასრულდა ხორვატიის რესპუბლიკის პრეზიდენტის ზორან მილანოვიჩისა და მისი მეუღლის, სანია მუსიჩ მილანოვიჩის ოფიციალური ვიზიტი საქართველოში. მე და ჩემი მეუღლე ბედნიერები ვართ ბატონი ზორანის და ქალბატონი სანიას გაცნობით და იმედს გამოვთქვამთ, რომ კიდევ არაერთხელ შევხვდებით ერთმანეთს და საშუალება გვექნება ხორვატიისა და საქართველოს ურთიერთთანამშრომლობა უმაღლეს დონეზე ავიყვანოთ. დიდი მადლობა ჩემს კოლეგას და მის მეუღლეს სტუმრობისთვის და ჩვენი ქვეყნის დაფასებისთვის“, - წერს საქართველოს პრეზიდენტი.

პოლიტიკა • 1770891240

საქართველოსა და ხორვატიის პრეზიდენტებს შორის გაფართოებული ფორმატის შეხვედრა გაიმართა

საქართველოსა და ხორვატიის პრეზიდენტებს შორის გაფართოებული ფორმატის შეხვედრა გაიმართა.შეხვედრაზე ორმხრივი ურთიერთობის გაღრმავების თაობაზე იმსჯელეს, ყურადღება პოლიტიკური, ეკონომიკური, ტექნოლოგიური, კულტურულ-საგანმანათლებლო მიმართულებით თანამშრომლობის პერსპექტივებზე გამახვილდა.განსაკუთრებული აქცენტი გაკეთდა ეკონომიკური ურთიერთობის განვითარების მნიშვნელობაზე, რაც ხელს შეუწყობს როგორც ტურისტული ნაკადების ზრდას ორივე მიმართულებით, ისე დაკავშირებადობის, ეკონომიკური თანამშრომლობისა და ხალხთაშორისი კავშირის განმტკიცებას.როგორც შეხვედრაზე აღინიშნა, საქართველოს ხელისუფლების მიერ არჩეული მშვიდობის, სტაბილურობისა და ეკონომიკური კეთილდღეობის ვექტორი ურყევია. ამას კი მოწმობს საქართველოს ტრადიციული სამშვიდობო პოლიტიკა სამხრეთ კავკასიაში, რომელიც მიზნად ისახავს რეგიონში გრძელვადიანი, მდგრადი მშვიდობის მიღწევასა და მეზობელ ქვეყნებს შორის ურთიერთნდობისა და თანამშრომლობის გაღრმავებას.ამასთან, ხაზგასმით აღინიშნა, რომ ახალმა გეოპოლიტიკურმა რეალობამ მნიშვნელოვნად გაზარდა შუა დერეფნის მნიშვნელობა და საქართველო ყველაფერს აკეთებს მისი განვითარების, უსაფრთხოებისა და ეფექტიანი ფუნქციონირების ხელშეწყობისათვის.შეხვედრაზე ყურადღება გამახვილდა დარგობრივი თანამშრომლობის გაღრმავების მნიშვნელობაზეც, რომელიც გულისხმობს, მათ შორის, უმაღლეს საგანმანათლებლო დაწესებულებასა და სამეცნიერო-კვლევით ცენტრებს შორის პარტნიორობას, ასევე ინოვაციური ტექნოლოგიების, ხელოვნური ინტელექტის განვითარებისა და ახალგაზრდობის პოლიტიკის საკითხებზე გამოცდილების ურთიერთგაზიარებას.შეხვედრას სტუმართა მხრიდან ესწრებოდნენ: ხორვატიის რესპუბლიკის პრეზიდენტის კაბინეტის უფროსი ბარტოლ შიმუნიჩი, პრეზიდენტის მრჩეველი საგარეო და ევროპის საკითხებში ნევენ პელიცარიჩი, პრეზიდენტის სპეციალური მრჩეველი ეკონომიკურ საკითხებში ველიბორ მაჩკიჩი, ხორვატიის რესპუბლიკის საგანგებო და სრულუფლებიანი ელჩი საქართველოში ბრანკო ზებიჩი და პრეზიდენტის ადმინისტრაციის წარმომადგენლები.საქართველოს მხრიდან ესწრებოდნენ: საგარეო საქმეთა მინისტრის მოადგილე გიორგი ზურაბაშვალი, საქართველოს პარლამენტის საგარეო ურთიერთობათა კომიტეტის თავმჯდომარე ნიკოლოზ სამხარაძე, საქართველოს პარლამენტის ევროპასთან ინტეგრაციის კომიტეტის თავმჯდომარე, საქართველო-ხორვატიის საპარლამენტო მეგობრობის ჯგუფის ხელმძღვანელი ლევან მახაშვილი, საქართველოს საგანგებო და სრულუფლებიანი ელჩი ხორვატიის რესპუბლიკაში ზაალ გოგსაძე და პრეზიდენტის ადმინისტრაციის წარმომადგენლები.ინფორმაციას საქართველოს პრეზიდენტის ადმინისტრაცია ავრცელებს.

პოლიტიკა • 1770889528

მიხეილ ყაველაშვილი: საბედნიეროდ, ევროკავშირში არიან ქვეყნები, რომლებიც უსამართლო მიდგომებზე თვალს არ ხუჭავენ და ევრობიუროკრატების აგრესიული რიტორიკის ნაცვლად დიალოგსა და დიპლომატიას ირჩევენ

ამჟამად საქართველო-ევროკავშირის ურთიერთობები მთელი რიგი გამოწვევების წინაშეა, თუმცა გვჯერა, კონსტრუქციული და აქტიური დიალოგით შესაძლებელია, რომ საქართველოსა და ევროკავშირის პოზიციებს შორის არსებული განსხვავებების გადალახვა და ნორმალიზება შეიძლება, მოხდეს და ამისთვის ალბათ მეტი ძალისხმევა დაგვჭირდება, – ამის შესახებ საქართველოს პრეზიდენტმა, მიხეილ ყაველაშვილმა ხორვატიის რესპუბლიკის პრეზიდენტ ზორან მილანოვიჩთან შეხვედრის შემდეგ პრესკონფერენციაზე განაცხადა.მისივე თქმით, ევროკავშირის გაფართოების პოლიტიკა არ უნდა იყოს მანიპულაციის ინსტრუმენტი, რასაც ხშირად მიმართავენ ევროპელი ბიუროკრატები„აქვე მნიშვნელოვანია აღვნიშნოთ, რომ ევროკავშირის გაფართოების პოლიტიკა არ უნდა იყოს მანიპულაციის ინსტრუმენტი, რასაც ხშირად მიმართავენ ევროპელი ბიუროკრატები და ჩვენ ვეცდებით, რომ ამ საკითხთან მიმართებაში ვიყოთ გულწრფელი. ჩვენს საზოგადოებას ყოველთვის ვაწვდით ინფორმაციას, რომ ჩვენი ეროვნული ინტერესიდან გამომდინარე ყოველთვის მზად ვართ, გავაგრძელოთ ურთიერთობები ნებისმიერ დონეზე, მიუხედავად იმისა, რა დამოკიდებულებითაც არ უნდა იყვნენ ევროპელი ბიუროკრატები. აქვე მინდა, აღვნიშნო, რომ საქართველომ ბოლო წლების განმავლობაში სამაგალითო მდგრადობა და პრინციპულობა აჩვენა, დაიცვა საკუთარი სუვერენიტეტი, ეროვნული ინტერესები და მშვიდობა, რისი დამსახურებაცაა ბოლო წლებში დაფიქსირებული მაღალი ეკონომიკური ზრდის მაჩვენებელი“,- განაცხადა მიხეილ ყაველაშვილმა.​საქართველოს პრეზიდენტის თქმით, „საბედნიეროდ, ევროკავშირში არიან ქვეყნები, რომლებიც უსამართლო მიდგომებზე თვალს არ ხუჭავენ და ხედავენ, ობიექტურად აფასებენ საქართველოს პროგრესს და ევრობიუროკრატების აგრესიული რიტორიკის ნაცვლად დიალოგსა და დიპლომატიას ირჩევენ“.„მხოლოდ ამ გზითაა ნამდვილი ევროპული ფასეულობების გადარჩენა შესაძლებელი. ვსარგებლობ შემთხვევით და მადლობას ვუხდი ჩემს კოლეგას, ბატონ პრეზიდენტს, რომელიც ამ ფასეულობების ერთგულია და იმედს ვიტოვებ, რომ ეს რიცხვი როგორც პოლიტიკოსების, ისე ქვეყნის ნამდვილად გაიზრდება და ბევრი ქვეყანა დააფასებს ჩვენს არსებულ რეალობასა და ძალისხმევას“,- განაცხადა მიხეილ ყაველაშვილმა.

პოლიტიკა • 1770874765

ირაკლი კირცხალია აშშ-სთან ურთიერთობაზე: მზად ვართ, რომ ისტორიულად ჩვენს სტრატეგიულ პარტნიორთან საერთოდ არ გავიხსენოთ მძიმე მემკვიდრეობა და თვისებრივად ახალ ეტაპზე გადავიყვანოთ და გავაგრძელოთ სტრატეგიული ურთიერთობა და პარტნიორობა

საპარლამენტო უმრავლესობის ლიდერმა ირაკლი კირცხალიამ გადაცემაში „ღამის კურიერი“ შეერთებულ შტატებთან ურთიერთობაზე ისაუბრა. მან აღნიშნა, რომ საქართველო მზად არის, აშშ-სთან ურთიერთობა თვისებრივად ახალ ეტაპზე გააგრძელოს.„ჩვენ მზად ვართ, რომ მართლაც ისტორიულად ჩვენს სტრატეგიულ პარტნიორთან საერთოდ არ გავიხსენოთ ის მძიმე მემკვიდრეობა, რომელსაც ხაზს უსვამენ ადმინისტრაცია და მათი წარმომადგენლები და თვისებრივად ახალ ეტაპზე გადავიყვანოთ და გავაგრძელოთ ჩვენი სტრატეგიული ურთიერთობა და პარტნიორობა; გავაგრძელოთ სწორედ იმ პოლიტიკური ხედვებით, იმ პოლიტიკური მსოფლმხედველობით, რომლის სრული თანხვედრა იყო და არის ამერიკის შეერთებულ შტატებთან“, - განაცხადა კირცხალიამ.როგორც ცნობილია, 6 თებერვალს საქართველოს პრეზიდენტი და საგარეო საქმეთა მინისტრი აშშ-ის ვიცე-პრეზიდენტ ჯეი დი ვენსსა და აშშ-ის სახელმწიფო მდივანს მარკო რუბიოს შეხვდნენ.

პოლიტიკა • 1770835365

საქართველოს პრეზიდენტისა და საგარეო საქმეთა მინისტრის აშშ-ის ადმინისტრაციის უმაღლეს წარმომადგენლებთან შეხვედრის მთავარი მესიჯი იყო ის, რომ მათ ბაიდენის ადმინისტრაციისგან მძიმე მემკვიდრეობა დახვდათ საქართველოსთან მიმართებით - ირაკლი კირცხალია

საპარლამენტო უმრავლესობის ლიდერის, პარლამენტის ფრაქცია "ქართული ოცნების" თავმჯდომარის, ირაკლი კირცხალიას თქმით, საქართველოს პრეზიდენტისა და საგარეო საქმეთა მინისტრის აშშ-ის ადმინისტრაციის უმაღლეს წარმომადგენლებთან შეხვედრის მთავარი მესიჯი იყო ის, რომ მათ ბაიდენის ადმინისტრაციისგან ძალიან მძიმე მემკვიდრეობა დახვდათ საქართველოსთან მიმართებით.როგორც კირცხალიამ "ღამის კურიერის" ეთერში განმარტა, ეს არის ერთ-ერთი მთავარი და ამოსავალი წერტილი."რაც შეეხება იმ შეხვედრას, რომელიც განხორციელდა ბატონი მიხეილ ყაველაშვილის და ქალბატონ მაკა ბოჭორიშვილის მონაწილეობით აშშ-ის ადმინისტრაციის უმაღლეს წარმომადგენლებთან, მთავარი მესიჯი და ფაქტი, რაც კომუნიკაციის დროს მათ დააფიქსირეს, რომ რეალურად, მათ ადმინისტრაციაში დახვდათ ძალიან მძიმე მემკვიდრეობა, კონკრეტულად და ხაზგასმით საქართველოსთან მიმართებით. ეს არის ერთ-ერთი მთავარი და ამოსავალი წერტილი. თავი რომ დავანებოთ, ზოგადად, კონკრეტულ ქვეყნებთან მიმართებაში რაც გაჟღერდა, ჩვენ ყველამ კარგად ვიცით, ვხედავთ და ისინიც კარგად ხედავენ, ყველა ქვეყანასთან მიმართებით ეკონომიკური, პოლიტიკური კუთხით და ა.შ. თუ როგორი მემკვიდრეობა დარჩა ბაიდენის ადმინისტრაციის შემდეგ პრეზიდენტ ტრამპს და მის ადმინისტრაციას", - განაცხადა ირაკლი კირცხალიამ.

პოლიტიკა • 1770735015

საქართველოს 11-13 თებერვალს ოფიციალური ვიზიტით ხორვატიის რესპუბლიკის პრეზიდენტი ზორან მილანოვიჩი ეწვევა

საქართველოს 11-13 თებერვალს ოფიციალური ვიზიტით ხორვატიის რესპუბლიკის პრეზიდენტი, ზორან მილანოვიჩი მეუღლესთან, სანია მუსიჩ მილანოვიჩთან და თანმხლებ დელეგაციასთან ერთად ეწვევა. ინფორმაციას საქართველოს პრეზიდენტის ადმინისტრაცია ავრცელებს.მიხეილ ყაველაშვილი ზორან მილანოვიჩს საქართველოს პრეზიდენტის სასახლეში უმასპინძლებს, სადაც დახვედრის ოფიციალური ცერემონია გაიმართება.დაგეგმილია მიხეილ ყაველაშვილისა და ზორან მილანოვიჩის შეხვედრები პირისპირ და გაფართოებულ ფორმატში, რის შემდეგაც მედიისთვის ერთობლივი განცხადება გაკეთდება.ასევე, ვიზიტის ფარგლებში დაგეგმილია ხორვატიის რესპუბლიკის პრეზიდენტის შეხვედრა საქართველოს პრემიერ-მინისტრთან, ირაკლი კობახიძესთან და პარლამენტის თავმჯდომარესთან, შალვა პაპუაშვილთან.

პოლიტიკა • 1770709414

ირაკლი ქადაგიშვილი: დიდი ხანია უკვე გაცხადებული გვაქვს, რომ გვსურს აშშ-სთან სტრატეგიული ურთიერთობის ახალი ფურცლიდან დაწყება. ძალიან საინტერესო გზავნილი იყო სახელმწიფო მდივნის მხრიდანაც

მოგეხსენებათ, ჩვენ დიდი ხანია უკვე გაცხადებული გვაქვს, რომ გვსურს ამერიკის შეერთებულ შტატებთან სტრატეგიული ურთიერთობის ახალი ფურცლიდან დაწყება, - განუცხადა ჟურნალისტებს პარლამენტის რეგიონული პოლიტიკისა და თვითმმართველობის კომიტეტის თავმჯდომარე, ირაკლი ქადაგიშვილმა.ქადაგიშვილის თქმით, ძალიან საინტერესო გზავნილი იყო სახელმწიფო მდივნის, რუბიოს მხრიდანაც.„თქვა, რომ საკმაოდ მძიმე მემკვიდრეობა დაახვედრა წინა ადმინისტრაციამ საქართველოსთან მიმართებაში და რომ ისინი აპირებენ ამ ვითარების კარდინალურად გადახედვას. ალბათ ახლო მომავალში ჩვენ ამერიკის შეერთებული შტატებისგან ამ მიმართულებით კონკრეტული ნაბიჯები შეიძლება ვიხილოთ“, - აღნიშნა ირაკლი ქადაგიშვილმა.6 თებერვალს საქართველოს პრეზიდენტი და საგარეო საქმეთა მინისტრი აშშ-ის ვიცე-პრეზიდენტ ჯეი დი ვენსსა და აშშ-ის სახელმწიფო მდივანს მარკო რუბიოს შეხვდნენ.

პოლიტიკა • 1770705110

დავით ქართველიშვილი: მილანის შეხვედრამ, თუნდაც არაოფიციალურმა და ხანმოკლემ - საზოგადოებას მისცა განცდა, რომ ვაშინგტონთან არხი დახურული არ არის

ჩვენ ვხედავთ შიდა კონკურენციას თვით ამერიკულ სისტემაში. მილანმა აჩვენა, რომ აშშ-ის რეალური პოლიტიკა საქართველოს მიმართ ბევრად უფრო რთული და პრაგმატულია, ვიდრე სქემა „დავაწვეთ და აღვზარდოთ - თუ არ გამოვიდა, დავსაჯოთ, - ასე ეხმიანება სოციალურ ქსელში „ხალხის ძალის“ წევრი დავით ქართველიშვილი ჰელსინკის ჯგუფის მიერ 11 თებერვალს ჩანიშნულ შეხვედრას, რომელზეც საქართველოს საკითხი განიხილება.ექსპერტი ხაზგასმით აღნიშნავს, რომ ამ შეხვედრით ჰელსინკის ჯგუფს მილანური შეხვედრების, სადაც საქართველოს პრეზიდენტი, მიხეილ ყაველაშვილი აშშ-ს ვიცე-პრეზიდენტსა და სახელმწიფო მდივანს შეხდა, პოზიტიური სიგნალის ჩახშობა სურს. ქართველიშვილი წერს, რომ ჰელსინკის ჯგუფი არ არის ამერიკაში გადაწყვეტილებების მიმღები ორგანო, არამედ არის ღრმად პოლიტიზირებული სტრუქტურა.„ეუთოს „მოსკოვის პროცედურა" მასხრად აიგდეს საქართველოში და ეს არაა საკმარისი - დაახლოებით ეს იყო ჯო ვილსონის ლოგიკა, როდესაც მან დააანონსა საქართველოში „დემოკრატიის უკუსვლის" თემაზე აშშ-ს ჰელსინკის ჯგუფის მიერ გამოძიების წამოწყება. ამ პროცედურის დაწყების თარიღიც (11 თებერვალი) შემთხვევითი არაა - იგი იდეალურად არის ჩასმული დღის წესრიგში სწორედ რომ მილანში ჩატარებული ორი ქვეყნის ხელმძღვანელების სამუშაო შეხვედრის შემდეგ.იგი ინიცირებულია სწორედ იმ მომენტში, როდესაც საქართველოში რეალურად დაიწყო მოქმედება მნიშვნელოვანმა სიგნალმა: უმაღლეს დონეზე კონტაქტმა აშშ-ის გადაწყვეტილების მიმღებ რეალურ ცენტრებთან. მილანის შეხვედრამ, თუნდაც არაოფიციალურმა და ხანმოკლემ - საზოგადოებას მისცა განცდა, რომ ვაშინგტონთან არხი დახურული არ არის, რომ პრაგმატული დიალოგი შესაძლებელია და საქართველო იზოლაციაში არ იმყოფება.ფორმალურად, ჰელსინკის კომისიის „გამოძიება“ დანიშნულია თემაზე „საქართველოში განსხვავებული აზრის მიმართ ზეწოლის ესკალაცია“, მათ შორის ფინანსური გამჭვირვალობის კანონები, სასამართლო პროცესები და საპროტესტო აქციების დროს პოლიციის მოქმედებები. ანუ, ყველაფერ იმაზე, რაც პრეზიდენტ ყაველაშვილთან, არც დი ვენსს და არც რუბიოს, ერთი წინადადებითაც არ უხსენებია. ჰელსინკის კომისია მოქმედებს სრულიად სხვა ლოგიკით, ვიდრე აშშ-ის აღმასრულებელი ხელისუფლება. იქ, სადაც თეთრი სახლი და სახელმწიფო დეპარტამენტი შეიძლება დაეყრდნოს სამუშაო კონტაქტებს, სიჩუმესა და მოქნილობას, კომისია ცხოვრობს საჯარო ზეწოლითა და მორალისტური კატეგორიულობით. მის შემადგენლობაში შედიან აშშ-ის სენატორები და კონგრესმენები, ორივე პარტიიდან, აგრეთვე სახელმწიფო დეპარტამენტის, პენტაგონისა და ეროვნული უსაფრთხოების საბჭოს წარმომადგენლები (სულ 21 წევრი). ანუ, ეს არის კონგრესის სტრუქტურა ძლიერი იდეოლოგიური ფრთით და არა აღმასრულებელი ხელისუფლების ორგანო. მისი ინსტრუმენტია არა მოლაპარაკება, არამედ ხმამაღალი სათაური; არა კომპრომისი, არამედ მარკირება.ამიტომ 11 თებერვალს აქვს თავისი კონკრეტული დანიშნულება: არ დაუშვას „მილანის" პოზიტიური ეფექტის გამყარება და სასწრაფოდ დააბრუნოს დისკურსი ბრალდებების რეჟიმში. ფაქტობრივად, ჩვენ ვხედავთ შიდა კონკურენციას თვით ამერიკულ სისტემაში. მილანმა აჩვენა, რომ აშშ-ის რეალური პოლიტიკა საქართველოს მიმართ ბევრად უფრო რთული და პრაგმატულია, ვიდრე სქემა „დავაწვეთ და აღვზარდოთ - თუ არ გამოვიდა, დავსაჯოთ“. კომისია 11 თებერვლიდან შეეცდება „ბაიდენისტური“ ნორმატიული მონოპოლიის აღდგენას - კვლავ „ილაპარაკოს ამერიკის სახელით“, მაგრამ არა სახელმწიფოებრივი, არამედ იდეოლოგიური მნიშვნელობით. აქედან მოდის მომენტის არჩევანიც: შეაჩეროს კონტაქტის ეფექტი მანამ, სანამ ის ნორმალიზაციის მყარ განცდად ჩამოყალიბდება.11 თებერვალი ეს არ არის პროცედურა დემოკრატიის და არც საქართველოს „დაცვის“ შესახებ - ეს არის „ბაიდენის კარადიდან" ნაფტალინით გაჟღენთილი ნარატივის (კონტროლის) გამოღების მცდელობა. მილანის ეპიზოდმა აჩვენა, რომ საქართველო შეიძლება იყოს დიალოგის სუბიექტი და არა აღზრდის ობიექტი. და სწორედ ამას ცდილობს კომისია - სასწრაფოდ ჩაახშოს „გამოძიების“ ხმაურით, თუნდაც არა თვით მომხდარი და მათთვის უკიდურესად უსიამოვნო ფაქტის გაუქმებით, არამედ მისი პოლიტიკური წონის გაუფასურებით,“ - წერს დავით ქართველიშვილი.

პოლიტიკა • 1770698774

პროცესი დაიწყო, ვინაიდან უკვე კონკრეტულ საქმეზე ისაუბრა სახელმწიფო დეპარტამენტის ხელმძღვანელმა, რუბიომ თქვა, რომ შექმნის ტექნიკურ ჯგუფს, რომელიც შეისწავლის ამ პრობლემატიკას - თენგიზ შარმანაშვილი

 მეორე დღეა პოლიტიკური განხილვის საგანია აშშ-საქართველოს ურთიერთობები. მმართველი გუნდის წარმომადგენლები აცხადებენ, რომ წინა ადმინისტრაციის მხრიდან უსამართლო გადაწყვეტილებები გააზრებული იქნა ახალი მმართველობის პირობებში.ასევე, განმარტავენ, რომ ქართული მხარე მზად არის შემხვედრი ნაბიჯები გადადგას ურთიერთობების სუფთა ფურცლიდან დასაწყებად. "პროცესი დაიწყო - ვინაიდან უკვე კონკრეტულ საქმეზე ისაუბრა სახელმწიფო დეპარტამენტის ხელმძღვანელმა რუბიომ, მან თქვა, რომ შექმნის ტექნიკურ ჯგუფს, რომელიც შეისწავლის ამ პრობლემატიკას, ეს ნიშნავს, რომ უკვე მუშაობა დაიწყება. რაღაც პოლიტიკური გადაწყვეტილება კი არ იქნება მუშაობის დაწყებისა, უკვე ეს გადაწყვეტილება მიღებულია და უკვე ამ ჯგუფმა მუშაობა უნდა დაიწყოს. რა თქმა უნდა, მათ ინტენსიური ურთიერთობა ექნებათ საქართველოს საგარეო უწყებასთან და გაივლიან ყველა შესაბამის საკითხს", - აცხადებს პარლამენტის თავდაცვისა და უსაფრთხოების კომიტეტის თავმჯდომარის პირველი მოადგილე თენგიზ შარმანაშვილი.მიხეილ ყაველაშვილი და მაკა ბოჭორიშვილი შტატების სახელმწიფო მდივანს და ვიცე- პრეზიდენტს, მილანში, ოლიმპიადის ფარგლებში გამართულ მიღებაზე შეხვდნენ. საქართველოს პრეზიდენტი აცხადებს, რომ სახელმწიფო მდივანმა საუბრისას თქვა, რომ საქართველოსთან მიმართებაში წინა ადმინისტრაციისგან საკმაოდ დიდი ნეგატივი დახვდათ და უახლოეს მომავალში დაიწყება მზადება ურთიერთობების აღსადგენად.

პოლიტიკა • 1770697742

აშშ-ში მნიშვნელოვნად იცვლება საქართველოსთან დაკავშირებული საკითხები - ნინო წილოსანი

 მეორე დღეა პოლიტიკური განხილვის საგანია აშშ-საქართველოს ურთიერთობები. მმართველი გუნდის წარმომადგენლების განცხადებით, წინა ადმინისტრაციის მხრიდან უსამართლო გადაწყვეტილებები გააზრებული იქნა ახალი მმართველობის პირობებში.მიხეილ ყაველაშვილი და მაკა ბოჭორიშვილი შტატების სახელმწიფო მდივანს და ვიცე- პრეზიდენტს, მილანში, ოლიმპიადის ფარგლებში გამართულ მიღებაზე შეხვდნენ. საქართველოს პრეზიდენტის თქმით, სახელმწიფო მდივანმა საუბრისას აღნიშნა, რომ საქართველოსთან მიმართებაში წინა ადმინისტრაციისგან საკმაოდ დიდი ნეგატივი დახვდათ და უახლოეს მომავალში დაიწყება მზადება ურთიერთობების აღსადგენად."ამერიკის შეერთებულ შტატებში მნიშვნელოვნად იცვლება საქართველოსთან დაკავშირებული საკითხები. უპირველეს ყოვლისა, მივესალმებით იმას, რომ რაღაც ფორმით გაანალიზებული იქნა ის პრობლემები, რომლებიც წინა ადმინისტრაციასთან დაკავშირებით არსებობდა; ის უსამართლო გადაწყვეტილებები, რომელსაც წინა ადმინისტრაცია საქართველოსთან დაკავშირებით იღებდა და ეს მკაფიოდ იქნა აღნიშნული მარკო რუბიოს მხრიდან, რაც გვაძლევს იმის ფიქრის საშუალებას, რომ უკვე დაიწყო პროცესი იმ წინა ცუდი გამოცდილების გადააზრების", - აცხადებს პარლამენტის თავმჯდომარის მოადგილე ნინო წილოსანი.

პოლიტიკა • 1770634345

ირაკლი კირცხალია: ძალიან პოზიტიური მესიჯებია აშშ-ის ადმინისტრაციის უმაღლესი თანამდებობის პირების მხრიდან. დაველოდოთ მოვლენების განვითარებას

ჩვენი ხელისუფლება მზად არის გადავიდეს ჩვენს ისტორიულად სტრატეგიულ პარტნიორთან თვისობრივად ახალ ურთიერთობაზე, - განაცხადა საპარლამენტო უმრავლესობის ლიდერმა ირაკლი კირცხალიამ, საქართველოს ხელისუფლების წარმომადგენლებისა და აშშ-ის ადმინისტრაციის მაღალჩინოსნების შეხვედრასთან დაკავშირებით.მისი თქმით, გაჟღერდა მნიშვნელოვანი მესიჯები და ახლა საჭიროა დაველოდოთ რა ნაბიჯებს გადადგმას ტრამპის ადმინისტრაცია.„რაც შეეხება ამ შეხვედრას, ცალსახად მისასალმებელია და ძალიან პოზიტიური მოვლენაა. ძალიან პოზიტიური მესიჯებია [აშშ-ის] ადმინისტრაციის უმაღლესი თანამდებობის პირების მხრიდან.რაც შეეხება ჩვენს პოზიციას, ეს ძალიან კარგად არის ცნობილი ჩვენი საზოგადოებისთვის, ახალი ადმინისტრაციისთვის, რომ ჩვენი ქვეყანა და ჩვენი ხელისუფლება მზად არის თვისობრივად ახალი ურთიერთობებისთვის აშშ-სთან.გამოსაყოფი და ხაზგასასმელია ამ შეხვედრებიდან გამომდინარე, რომ გაჟღერდა მათი მხრიდან, რომ რეალურად მათ დახვდათ ძალიან მძიმე მემკვიდრეობა, არა ზოგადად, არამედ საქართველოსთან მიმართებით.დაველოდოთ მოვლენების განვითარებას თუ როგორ განვითარდება ორ ქვეყანას შორის, თამამად შემიძლია ვთქვა -ორ სტრატეგიულ პარტნიორს შორის ურთიერთობები. ის დაზიანებული ურთიერთობები, როგორ აღდგება, რომელიც დააზიანა წინა ადმინისტრაციამ, რაც პირდაპირ და ხაზგასმით აღნიშნეს ჩვენმა ამერიკელმა მეგობრებმა“, - განაცხადა ირაკლი კირცხალიამ.საქართველოს პრეზიდენტი და საგარეო საქმეთა მინისტრი, მილანში ტრამპის ადმინისტრაციის მაღალჩინოსნებს შეხვდნენ. მიხეილ ყაველაშვილი და მაკა ბოჭორიშვილი, მარკო რუბიოს და ჯეი დი ვენსს ესაუბრნენ.

სპორტი • 1770486900

აღლუმი, დროშის აღმართვა და ფიცის დადების ცერემონიალი - ზამთრის 25-ე ოლიმპიური თამაშები გახსნის ცერემონია და საქართველოს ნაკრების შედეგები ამ დროისთვის

აღლუმი, დროშის აღმართვა და ფიცის დადების ცერემონიალი - ზამთრის 25-ე ოლიმპიური თამაშები ოფიციალურად გაიხსნა. მილანსა და კორტინაში ოლიმპიური ცეცხლი აინთო.საქართველოს ოლიმპიური დელეგაციის მედროშეები ფიგურული მოციგურავეები - ლუკა ბერულავა და დიანა დევისი იყვნენ. ორ საათზე ნაკლები დრო რჩება ნიკა ეგაძის გამოსვლამდე. ქართველი მოციგურავე მამაკაცთა ერთეულებში მოკლე პროგრამას წარადგენს – ევროპის მოქმედი ჩემპიონის გამოსვლის შემდეგ, თუ საქართველოს ნაკრები ხუთ საუკეთესო გუნდს შორის მოხვდება, მედლებისთვის ბრძოლას გააგრძელებს.ზამთრის ოლიმპიურ თამაშებზე ქვეყნის ღირსებას 8 სპორტსმენი ორ სახეობაში, სამთო-სათხილამურო სპორტის სახეობასა და ფიგურულ ციგურაობაში იცავს.ოლიმპიურ თამაშებზე ფიგურულ ციგურაობაში გუნდური შეჯიბრება უკვე გაიმართა. პირველ დღეს საქართველოს ნაკრები დიანა დევისისმა და გლებ სმოლკინის წყვილმა წარადგინეს, სპორტულ ცეკვებში კი ანასტასია მეტელკინასა და ლუკა ბერულავას წყვილმა საქართველოს სახელით იასპარეზა, ქალთა შორის მოკლე პროგრამით ანასტასია გუბანოვა წარდგა.პირველი დღის შედეგების გათვალისწინებით, საქართველოს ნაკრები 20 ქულით აშშ-ის, იაპონიისა და იტალიის შემდეგ მეოთხე ადგილზეა.მილანსა და კორტინაში ზამთრის ოლიმპიური თამაშების გახსნის ცერემონიას საქართველოს პრეზიდენტი დელეგაციასთან ერთად ესწრებოდა. მიხეილ ყაველაშვილმა და მაკა ბოჭორიშვილმა ქართველ სპორტსმენებს წარმატება უსურვეს და იმედი გამოთქვეს, რომ საქართველოს ნაკრების გამოსვლა ოლიმპიურ თამაშებზე შედეგიანი იქნება.მოლოდინი დიდია, სურვილი ერთი - საქართველომ 2026 წლის ზამთრის ოლიმპიადაზე ისტორია დაწეროს და პირველი ოქროს მედალი მოიპოვოს.