პროკურატურა

პროკურატურამ დიდი ოდენობით თანხის თაღლითურად დაუფლების ფაქტზე ერთ პირს ბრალდება წარუდგინა

საქართველოს პროკურატურამ დიდი ოდენობით თანხის თაღლითურად დაუფლების ფაქტზე ერთ პირს ბრალდება წარუდგინა.შინაგან საქმეთა სამინისტროს მიერ ჩატარებული გამოძიებით დადგინდა, რომ ბრალდებული, დიდი ოდენობით თანხის მოტყუებით დაუფლების მიზნით, დაზარალებულს ერთ-ერთი საწარმოს წილის გადაფორმებას დაჰპირდა და საერთო ბიზნესის წარმოება შესთავაზა. დაზარალებული დაარწმუნა, რომ სასმელი წყლის საზღვარგარეთ ექსპორტს და რეალიზაციას განახორციელებდნენ, მიღებულ შემოსავალს კი თანაბრად გაინაწილებდნენ. ამ ხერხით, ბრალდებულმა დაზარალებულს 400 000 ლარი გამოართვა, რაც სრულად მიისაკუთრა და თანხის დაუფლებისთანავე საქართველოს ტერიტორია დატოვა.ბრალდებულის მიმართ სისხლისსამართლებრივი დევნა დაუსწრებლად დაიწყო. მას ბრალდება საქართველოს სისხლის სამართლის კოდექსის 180-ე მუხლის მე-3 ნაწილის ,,ბ“ ქვეპუნქტით (თაღლითობა დიდი ოდენობით ) წარედგინა, რაც სასჯელის სახედ და ზომად 9 წლამდე თავისუფლების აღკვეთას ითვალისწინებს.პროკურატურამ ბრალდებულისთვის აღკვეთის ღონისძიების სახით პატიმრობის შეფარდების შუამდგომლობით სასამართლოს უკვე მიმართა.

საზოგადოება • 1794427034

ტარიელ კაკაბაძე მიმართვას ავრცელებს

ეს ვიდეო მინდა მოისმინოს ნატა ვიბლიანის ყველა მხარდამჭერმა, - ამის შესახებ ადვოკატი ტარიელ კაკაბაძე აცხადებს და განმარტავს, რა მოხდა მათსა და დასაცავ პირს შორის.„მინდა, საზოგადოებას მადლობა გადავუხადო. ასევე, მსურს, მივმართო ნატა ვიბლიანის მხარდამჭერებს და საქმის კურსში ჩავაყენო. პირველ რიგში, შეგახსენებთ, რომ მე ამ საქმიდან თვითაცილება არ გამიკეთებია - ნატა ვიბლიანმა თავად გადაწყვიტა, რომ ადვოკატები არ სჭირდებოდა. ორი კვირის განმავლობაში, ის მეც და სხვა ადვოკატებსაც გვეუბნება, რომ ჩვენი აცილება სურს და ადვოკატი საერთოდ აღარ უნდა. რამდენჯერმე ისიც კი აღნიშნა, რომ გამოძიების გაგრძელებაც არ უნდა.მიუხედავად იმისა, რომ მან მსგავსი პოზიცია არაერთხელ დააფიქსირა, ჩვენ მაინც ვცდილობდით, ადამიანურად და დიპლომატიურად გვქონოდა კომუნიკაცია. მინდოდა, რომ ამ საქმეზე მუშაობა მის დასრულებამდე გამეგრძელებინა, რადგან მთელი ჩემი კარიერის განმავლობაში საქმე შუა გზაში არასდროს მიმიტოვებია და კლიენტს ბოლომდე ვიცავ ხოლმე. თუმცა, ბოლო დღეებში, განსაკუთრებით აგრესიული გახდა, რამდენიმე დღის განმავლობაში ჩემი საწინააღმდეგო, ღირსების შემლახველი პოსტები და კომენტარებიც დაწერა. კანონმდებლობის თანახმად, როდესაც კლიენტს ადვოკატი არ სურს, შენ არა მხოლოდ უფლება გაქვს, არამედ ვალდებული ხარ, სისხლის სამართლის საქმეს ჩამოცილდე.რატომ გახდა ნატა ვიბლიანი ჩემ მიმართ ასე უცებ აგრესიული? მას ბოლო დღეებში კომუნიკაცია აქვს ირაკლი ჯანყარაშვილთან. ეს არის ადამიანი, რომელზეც კარგად მოეხსენება მთელ საქართველოს - 50 ლარი რომ მისცე, საკუთარ დედაზეც კი სამარცხვინო პოსტს დაწერს. ის ამით ირჩენს თავს და საზღვარგარეთ მცხოვრები პირებისგან იმართება. ეს არის ადამიანი, რომელიც დიდი ხნის განმავლობაში აშავებდა ნატა ვიბლიანს, ლანძღავდა და უშვერი სიტყვებით მოიხსენიებდა მას და მეც, როგორც მის ადვოკატს. დღეს კი ვხედავ, რომ ნატა ვიბლიანი ირაკლი ჯანყარაშვილს დაუმეგობრდა. სწორედ მასთან კომუნიკაციის შემდეგ გახდა იგი აგრესიული და მოითხოვა ჩვენი საქმიდან ჩამოცილება.მინდა, მივმართო ნატას მხარდამჭერებს: ყურადღება მიაქციეთ ნატას! პირდაპირ გეუბნებით, რომ ეს ადამიანი ნატა ვიბლიანს დაღუპავს. საქმეს ნამდვილად ჰქონდა პერსპექტივა, პროკურატურაც გვეუბნებოდა, რომ შედეგი დაიდებოდა. საქმე, ფაქტობრივად, დასრულებულია და ძირითადი საგამოძიებო მოქმედებები ჩატარებულია, თუმცა ნატამ მოითხოვა როგორც ჩვენი, ისე გამომძიებლისა და პროკურორის აცილებაც. დარწმუნებული ვარ, სხვების დავალებით, მან წამოაყენა სრულიად აბსურდული მოთხოვნები - მაგალითად, რომ გამომძიებელი არ უნდა ყოფილიყო მეგრელი, სვანი და ა.შ.კიდევ ერთხელ მოგმართავთ: მის ამ აბსოლუტურად მიუღებელ გადაწყვეტილებებს მხარი კი არ უნდა დაუჭიროთ, არამედ სწორი რჩევები უნდა მისცეთ. დაუშვებელია იმ ადამიანის ადვოკატის გარეშე დატოვება, რომელსაც დაზარალებულის სტატუსი მოვუპოვეთ, რომლის წინააღმდეგაც უამრავი საჩივარი შევიდა და რომელსაც ყველგან უანგაროდ ვიცავდით.ვიცი, რომ ნატა ვიბლიანის მხარდამჭერებს მხოლოდ კეთილი ზრახვები გაქვთ და წარმატებას გისურვებთ. რა თქმა უნდა, წარმატებას ვუსურვებ ნატასაც და ვისურვებ, რომ მართლმსაჯულებამ იზეიმოს.მე უბრალოდ ვალდებული გავხდი, ადვოკატთა ეთიკის კოდექსისა და კანონმდებლობის შესაბამისად, საქმეს ჩამოვცილებოდი. რაც შეეხება იმას, თუ ვინ მართავს იმ პიროვნებას, რომელიც, თავის მხრივ, ნატა ვიბლიანს მართავს - საზოგადოება ამ ყველაფერს აუცილებლად გაიგებს და თქვენც ძალიან კარგად მიხვდებით“, - განაცხადა კაკაბაძემ.

სამართალი • 1794399020

„ფინანსურ დავაში „კანონიერი ქურდების“ ჩართვა გადაწყვიტეს...“ - პროკურატურამ 4 პირს ბრალი წარუდგინა

საქართველოს პროკურატურამ „ქურდული სამყაროს“ წევრობის და „ქურდული სამყაროს“ წევრისთვის მიმართვის ფაქტებზე 4 პირს ბრალდება წარუდგინა.საქართველოს შინაგან საქმეთა სამინისტროს იმერეთის პოლიციის დეპარტამენტში ჩატარებული გამოძიებით დადგინდა, რომ ,,ქურდული სამყაროს“ წევრები კრიმინალური ავტორიტეტის გამოყენებით, ორ მოქალაქეს შორის არსებული პირადი და ფინანსური დავის გადაწყვეტაში ჩაერთნენ და სადავო საკითხები ე.წ. „ქურდული ტრადიციების“ შესაბამისად, ერთ-ერთი მხარის სასარგებლოდ გადაწყვიტეს. ასევე, „ქურდული სამყაროს“ წევრს უთანხმოება მოუვიდა ორ „კანონიერ ქურდთან“ და იგი ცდილობდა კონფლიქტის მოგვარებას, როგორც საკუთარი კრიმინალური გავლენის გამოყენებით, ასევე, საზღვარგარეთ მყოფი სხვა „კანონიერ ქურდის“ მეშვეობით, რომლის მიზანი იყო ძალაუფლების და გავლენის მოპოვება, რის შედეგადაც ქურდული სამყაროს წევრსა და კანონიერ ქურდებთან არსებული დავა დროებით დასრულდა.ბრალდებულებს ბრალდება საქართველოს სისხლის სამართლის კოდექსის 223 პრიმა მუხლის პირველი ნაწილით (,,ქურდული სამყაროს“ წევრობა) და 223 კვარტა მუხლის პირველი ნაწილით („ქურდული სამყაროს“ წევრისთვის მიმართვა) წარედგინათ, რაც სასჯელის სახედ და ზომად 10 წლამდე თავისუფლების აღკვეთას ითვალისწინებს.პროკურატურა ბრალდებულებისთვის აღკვეთის ღონისძიების სახით პატიმრობის შეფარდების შუამდგომლობით სასამართლოს კანონით დადგენილ ვადაში მიმართავს.

მსოფლიო • 1794396540

კაცი OpenAI-სა და სემ ალტმანს უჩივის - მისი მტკიცებით, ChatGPT-მ მეუღლეს ქმრის მოწამვლის გეგმის შემუშავებაში შეუწყო ხელი (უცხოეთი)

ამერიკელი მამაკაცი OpenAI-სა და სემ ალტმანს უჩივის - მისი მტკიცებით, ChatGPT-მ მეუღლეს ქმრის მოწამვლის გეგმის შემუშავებაში შეუწყო ხელი.ჯეიმს გეიტსი ამტკიცებს, რომ ხელოვნური ინტელექტი ქალს არა მხოლოდ სახიფათო ინფორმაციას აწვდიდა, არამედ თვეების განმავლობაში უმძაფრებდა ეჭვებს ქმრის მიმართ. საქმის დეტალებს გამოცემა Los Angeles Times ავრცელებს.ჯეიმსმა მეუღლე, შერილი, ChatGPT-ს თავად გააცნო. თავდაპირველად ქალი ჩატბოტს სამუშაოსა და ყოველდღიური საკითხების მოსაგვარებლად იყენებდა, თუმცა მოგვიანებით მასთან ოჯახურ პრობლემებზეც დაიწყო საუბარი.როდესაც წყვილმა განქორწინების შესაძლებლობა განიხილა, შერილმა ChatGPT-ს გაუზიარა შიში, თითქოს ქმარი მისთვის ფულისა და შვილების წართმევას აპირებდა. სარჩელის თანახმად, ჩატბოტი ქალის ეჭვებს ამყარებდა და ჯეიმსს სახიფათო, მანიპულაციისკენ მიდრეკილ ადამიანად წარმოაჩენდა.მოგვიანებით ქალმა ხელოვნურ ინტელექტს საწამლავი ნივთიერებებისა და მედიკამენტების შესახებ კითხვები დაუსვა. მოსარჩელის მტკიცებით, ChatGPT მას აწვდიდა ინფორმაციას სასიკვდილო დოზებზე, გაკვეთის დროს საწამლავის აღმოჩენის შესაძლებლობასა და დანაშაულის კვალის დაფარვაზე.სარჩელში მიმოწერის ფრაგმენტებიც არის მოყვანილი. ერთ-ერთი მათგანის მიხედვით, ჩატბოტი განმარტავდა, რატომ შეიძლებოდა ქმრისთვის ჩვეული ენერგეტიკული სასმელი უცხო გემოს დასაფარად გამოეყენებინათ.2025 წლის ზაფხულში ჯეიმსის ჯანმრთელობის მდგომარეობა მკვეთრად გაუარესდა. მისი თქმით, ერთ-ერთი მძიმე შეტევა დაახლოებით სამი დღე გაგრძელდა. მამაკაცს აწუხებდა მუცლის ტკივილი, ძლიერი სისუსტე, გულის მუშაობის დარღვევა და ცნობიერების დაბინდვა. როგორც თავად ამტკიცებს, მდგომარეობა იმდენად მძიმე იყო, რომ შეტყობინების გამართულად დაწერაც კი უჭირდა. გეიტსი ეჭვობს, რომ მისი ჯანმრთელობის გაუარესება შესაძლოა იმ ნივთიერებებს უკავშირდებოდეს, რომლებსაც მეუღლე სასმელში უმატებდა.2025 წლის სექტემბერში მამაკაცმა მეუღლის ხელნაწერი ჩანაწერები აღმოაჩინა. ფურცლებზე ჩამოთვლილი იყო საშიში ნივთიერებები, მათი დოზები და მინაწერი — „სასიკვდილო“. ჩანაწერის დასაწყისში ასევე მითითებული იყო შეხსენებები მიმოწერის წაშლისა და ChatGPT-დან გამოსვლის შესახებ.აღმოჩენის შემდეგ ჯეიმსმა პოლიციას მიმართა. შერილს მკვლელობის მცდელობისა და საკვებისა თუ სასმლის საშიში ნივთიერებებით დაბინძურების ბრალდებები წაუყენეს.თუმცა 2026 წლის აპრილში პროკურატურამ ქალის წინააღმდეგ სისხლისსამართლებრივი დევნა შეწყვიტა. მიზეზად მტკიცებულებების არასაკმარისობა დასახელდა. შესაბამისად, ჯეიმსის ბრალდებები მეუღლის მიერ მისი მოწამვლის შესახებ სასამართლოს მიერ დადასტურებული ფაქტი არ არის.მიუხედავად ამისა, მამაკაცი ახლა სამოქალაქო სარჩელით ცდილობს პასუხისმგებლობა დააკისროს OpenAI-სა და კომპანიის ხელმძღვანელს, სემ ალტმანს. მისი მტკიცებით, კომპანიამ მომხმარებელთა უსაფრთხოების უზრუნველსაყოფად აუცილებელი ზომები არ მიიღო.OpenAI-ში აცხადებენ, რომ შერილის ანგარიში დაბლოკეს და გამოძიების ფარგლებში სამართალდამცავ ორგანოებს შესაბამისი ინფორმაცია გადასცეს. კომპანიის წარმომადგენლის თქმით, მომხმარებელთა უსაფრთხოება დეველოპერის ერთ-ერთი მთავარი პრიორიტეტია.

სამართალი • 1794389060

პროკურატურა: სტიქაროსან თემურ ხადურის გარდაცვალების საქმეზე, შსს-ს სამი ყოფილი თანამშრომელი ცრუ ინფორმაციის მიწოდების და სამსახურებრივი უფლებამოსილების ბოროტად გამოყენების ფაქტებზე დააკავეს

დასავლეთ საქართველოს საოლქო პროკურატურის საგამოძიებო სამმართველოს თანამშრომლებმა, თემურ ხადურის გარდაცვალების სისხლის სამართლის საქმეზე მიმდინარე გამოძიების ფარგლებში, შინაგან საქმეთა სამინისტროს სამი ყოფილი თანამშრომელი დააკავეს.როგორც საქართველოს პროკურატურის მიერ გავრცელებულ ინფორმაციაშია ნათქვამი, ცრუ ინფორმაციის მიწოდების ფაქტზე ორი პირია დაკავებული, ხოლო ცრუ ინფორმაციის მიწოდების ადა სამსახურებრივი უფლებამოსილების ბოროტად გამოყენების ფაქტებზე ერთი პირი.„გამოძიებით დადგინდა, რომ 2024 წლის 25 აგვისტოს თემურ ხადურმა თერჯოლის მუნიციპალიტეტის სოფელ სიმონეთის გადასახვევის მიმდებარედ არსებულ ცენტრალურ მაგისტრალზე, ქვების სროლით დააზიანა ავტომანქანები, მათ შორის შსს ტყიბულის რაიონული სამმართველოს უფროსის მოადგილის მართვის ქვეშ არსებული სამსახურებრივი ავტომანქანა. აღნიშნულის შესახებ მიღებული შეტყობინების საფუძველზე, შემთხვევის ადგილზე მივიდნენ თერჯოლის რაიონის სამმართველოს უფროსის მოადგილე და გამომძიებელი. სამართალდამცველებმა სცადეს თემურ ხადურის დაკავება, რომელიც არ დაემორჩილა მათ და გაიქცა, დევნის პროცესში პოლიციის თანამშრომლებმა ჰაერში სამი გასროლა განახორციელეს. აღნიშნული საპოლიციო ღონისძიების შედეგად თემურ ხადურის დაკავება ვერ მოხერხდა.2024 წლის 28 აგვისტოს თერჯოლის მუნიციპალიტეტის სოფელ ქვედა სიმონეთში მდებარე მდინარე ჭარჩხულას კალაპოტში ნაპოვნი იქნა გარდაცვლილი თემურ ხადური.გამოძიებით ასევე დადგინდა, რომ პოლიციის თანამშრომლებმა, მათთვის შესაძლო დისციპლინური პასუხისმგებლობის და თანამდევი სამართლებრივი შედეგების თავიდან აცილების მიზნით, თემურ ხადურის გარდაცვალების გარემოებების დასადგენად და ყოველმხრივი, სრული, ობიექტური გამოძიების ჩასატარებლად საჭირო ინფორმაცია დამალეს, მათ არ დააფიქსირეს გამოკითხვის ოქმში, თემურ ხადურის დაკავების მცდელობის, ასევე დევნის და ცეცხლსასროლი იარაღიდან გასროლების შესახებ, ამით ხელი შეუშალეს საქმის სხვა საგამოძიებო ორგანოსთვის გადაცემას და არსებითად შეაფერხეს მართლმსაჯულება.ასევე, გამომძიებელმა რომელიც თემურ ხადურის დასაკავებლად მიმდინარე ღონისძიების პროცესში შემთხვევის ადგილზე იმყოფებოდა, იცოდა რა ინფორმაციის სიყალბე, ბოროტად გამოიყენა სამსახურებრივი უფლებამოსილება და ერთ-ერთ მოწმის სახით გამოკითხვის ოქმში ცრუ ცნობები შეიტანა, რითაც არსებითად დაარღვია სისხლის სამართლის საქმის სრული და ობიექტური გამოძიების საჯარო ინტერესი. ბრალდებულების მიერ ჩადენილი ქმედება სასჯელის სახედ და ზომად 6 წლამდე თავისუფლების აღკვეთას ითვალისწინებს”,- ნათქვამია ინფორმაციაში.

სამართალი • 1794382951

თერჯოლაში სტიქაროსნის გარდაცვალების საქმეზე რამდენიმე პოლიციელი დააკავეს - რას წერს ოჯახის ადვოკატი

სტიქაროსნის, თემურ ხადურის გარდაცვალების საქმეზე თერჯოლის პოლიციის თანამშრომლები დააკავეს. ამის შესახებ ოჯახის ადვოკატი სოციალურ ქსელში წერს.„მადლობა საქართველოს პროკურატურას, მთავარ პროკურორს გიორგი გვარაკიძეს, დასავლეთ საქართველოს პროკურორს ზაზა მეტონიძეს, ქალბატონ თამარ ბეჟუაშვილს, გიორგი ხაჩიძეს, ყველა მედიას, საინფორმაციო გამოშვებას, განსაკუთრებული მადლობა ნოდარ მელაძესა და მის გუნდს. ორი წლის დაუღალავი შრომის შემდეგ, თემურ ხადურის საქმეზე, თერჯოლის პოლიციის თანამშრომლები არიან დაკავებულები”, - წერს ლედი ტუკვაძე.ცნობისთვის, 23 წლის სტიქაროსანი თემურ ხადური 2024 წლის 25 აგვისტოს მას შემდეგ გაუჩინარდა, პოლიციის ავტომობილს ქვები დაუშინა და სამართალდამცველები დაედევნნენ. სამდღიანი ძებნის შემდეგ, 28 აგვისტოს, მისი ცხედარი მწყემსმა თერჯოლის სოფელ სიმონეთთან, მდინარეში იპოვა.

სამართალი • 1794380840

პროკურორის და პროკურატურის გამომძიებლის უფლებამოსილების განმახორციელებელ სტაჟიორთა კონკურსის მესამე ეტაპი დაიწყო

პროკურორის და პროკურატურის გამომძიებლის უფლებამოსილების განმახორციელებელ სტაჟიორთა კონკურსის მესამე ეტაპი დაიწყო. სტაჟიორობის კანდიდატები საქართველოს გენერალური პროკურორის მუდმივმოქმედი სათათბირო ორგანოს - კარიერის მართვის, ეთიკისა და წახალისების საბჭოსთან გასაუბრებას გადიან.სტაჟიორთა კონკურსი 2026 წლის ივნისში გამოცხადდა. სულ კონკურსში მონაწილეობის მისაღებად 1120 კანდიდატი დარეგისტრირდა. საიდანაც კონკურსის მეორე ეტაპზე - ტესტირება სპეციალობაში 1008 კანდიდატი გადავიდა.კონკურსის მეორე ეტაპისა და ინტელექტის საკვლევი ტესტის (IQ) გავლის შემდეგ, კონკურსის მესამე ეტაპზე- გასაუბრებაში მონაწილეობას 133 კანდიდატი იღებს.საბჭოს მიერ შერჩეული კანდიდატები, ორთვიანი მოსამზადებელი კურსის გავლის შემდეგ, საქართველოს პროკურატურაში პროკურორის ან პროკურატურის გამომძიებლის უფლებამოსილებით სტაჟიორებად დაინიშნებიან.საქართველოს პროკურატურაში სტაჟირება ანაზღაურებადია და სტაჟიორების ხელფასი 1390 ლარს შეადგენს.სტაჟირების სისტემის მიზანს ღია კონკურსის გზით საუკეთესო კადრების შერჩევა წარმოადგენს. პროკურატურის სისტემაში ახალი კადრების შერჩევის ძირითადი კრიტერიუმები - კანდიდატის პროფესიული ცოდნა, უნარები და მაღალი მოტივაციაა.

სამართალი • 1794379749

პროკურატურამ პირადი ცხოვრების საიდუმლოს ხელყოფის ფაქტზე ერთი პირი დააკავა

საქართველოს პროკურატურის თანამშრომლებმა პირადი ცხოვრების საიდუმლოს ხელყოფის ფაქტზე ერთი პირი დააკავეს.„კახეთის საოლქო პროკურატურის საგამოძიებო სამმართველოს მიერ ჩატარებული გამოძიებით დადგინდა, რომ ბრალდებულმა უკანონოდ მოიპოვა და მობილურ ტელეფონში ინახავდა დაზარალებულის პირადი ცხოვრების საიდუმლოს ამსახველ ვიდეოს, რაც უკანონოდ გაავრცელა“, – აღნიშნულია პროკურატურის მიერ გავრცელებულ ინფორმაციაში.დაკავებულს ბრალდება საქართველოს სისხლის სამართლის კოდექსის 157-ე პრიმა მუხლის პირველი ნაწილით (პირადი ცხოვრების საიდუმლოს უკანონოდ მოპოვება, შენახვა და გავრცელება) წარედგინა, რაც სასჯელის სახედ და ზომად შვიდ წლამდე თავისუფლების აღკვეთას ითვალისწინებს.„პროკურატურამ ბრალდებულისთვის აღკვეთის ღონისძიების სახით პატიმრობის გამოყენების შუამდგომლობით სასამართლოს უკვე მიმართა“, – აცხადებენ უწყებაში.

სამართალი • 1794378378

იმერეთის პოლიციამ "ქურდულ სამყაროსთან" კავშირში მყოფი 4 პირი დააკავა

შინაგან საქმეთა სამინისტროს იმერეთის პოლიციის დეპარტამენტის თანამშრომლებმა, დასავლეთ საქართველოს საოლქო პროკურატურასთან ერთად ჩატარებული კომპლექსური ოპერატიული ღონისძიებებისა და საპროცესო მოქმედებების შედეგად, მოსამართლის განჩინების საფუძველზე, „ქურდული სამყაროს“ წევრობისა და „ქურდული სამყაროს“ წევრისთვის მიმართვის ბრალდებით, იმერეთის რეგიონში 4 პირი დააკავეს."სამართალდამცველების მიერ ინტენსიურ რეჟიმში ჩატარებული ფარული საგამოძიებო მოქმედებების შედეგად დადგინდა, რომ „ქურდული სამყაროს“ წევრობის ბრალდებით დაკავებულები, კრიმინალური ავტორიტეტის გამოყენებით, ორ მოქალაქეს შორის არსებული პირადი და ფინანსური დავის მოგვარებაში ჩაერთნენ და სადავო საკითხები ე.წ. „ქურდული ტრადიციების“ შესაბამისად, ერთ-ერთი მხარის სასარგებლოდ გადაწყვიტეს.გამოძიებით ასევე დადგინდა, რომ ბრალდებულები პირადი სარგებლის მიღების მიზნით, კრიმინალური ავტორიტეტის გამოყენებით, მოქალაქეებს შორის არსებული ფინანსური დავების მოგვარებაში სისტემატურად ერთვებოდნენ. ისინი მოდავე მხარეებთან ერთად აწყობდნენ ე.წ. „ქურდულ გარჩევებს“ და ერთ-ერთი მხარის სასარგებლოდ იღებდნენ ე.წ. „ქურდულ გადაწყვეტილებებს“. დაკისრებული ვალდებულებების შეუსრულებლობის ან განსაზღვრული ვადის დარღვევის შემთხვევაში კი მოქალაქეებს ფიზიკური ანგარიშსწორებითა და სიცოცხლის მოსპობით ემუქრებოდნენ.პოლიციამ ჩატარებული ჩხრეკის შედეგად ნივთმტკიცებად ამოიღო ბრალდებულების მობილური ტელეფონები, რომელთა საშუალებითაც ისინი ერთმანეთს უკავშირდებოდნენ", - აღნიშნულია შსს-ს განცხადებაში.გამოძიება სისხლის სამართლის კოდექსის 223-ე პრიმა და 223-ე კვარტა მუხლების პირველი ნაწილებით მიმდინარეობს, რაც 10 წლამდე ვადით თავისუფლების აღკვეთას ითვალისწინებს.

სამართალი • 1794330867

პროკურატურა განცხადებას ავრცელებს

საქართველოს პროკურატურამ მცხეთის მუნიციპალიტეტში მომხდარი ორი პირის განზრახ მკვლელობის მცდელობის ფაქტზე, ისეთი საშუალებით, რომელიც განზრახ უქმნის საფრთხეს სხვათა სიცოცხლეს და ჯანმრთელობას, ასევე, ასაფეთქებელი მოწყობილობის მართლსაწინააღმდეგო შეძენა, შენახვა, ტარების ფაქტებზე ერთ პირს ბრალდება წარუდგინა, - ამის შესახებ განცხადებას პროკურატურა ავრცელებს.„შინაგან საქმეთა სამინისტროს მიერ ჩატარებული გამოძიებით დადგინდა, რომ 2024 წლის 5 ნოემბერს, მცხეთის მუნიციპალიტეტის სოფელ წიწამურში, ბრალდებულმა წინასწარ დაამონტაჟა მის მიერ უკანონოდ შეძენილი „RGD-5“-ის მოდელის ხელის მსხვრევადი ყუმბარა და მითითებულ ადგილას ორი მოქალაქე შეცდომაში შეყვანის გზით მიიყვანა. დაზარალებულების ადგილზე მისვლის შემდეგ ასაფეთქებელი მოწყობილობა ამოქმედდა, რის შედეგადაც, ერთი პირი ადგილზე გარდაიცვალა, ხოლო მეორეს გაწეული სამედიცინო დახმარების შედეგად სიცოცხლე შეუნარჩუნდა.საქმეზე ჩატარებული კომპლექსური საგამოძიებო და საპროცესო მოქმედებების შედეგად, სამართალდამცველებმა ბრალდებული 2026 წლის 9 ნოემბერს, სასამართლოს განჩინების საფუძველზე დააკავეს. დაკავებულს ბრალდება საქართველოს სისხლის სამართლის კოდექსის 19,109-ე მუხლის „ბ” და „ლ“ ქვეპუნქტებით (განზრახ მკვლელობის მცდელობა ორი პირის მიმართ, ისეთი საშუალებით, რომელიც განზრახ უქმნის საფრთხეს სხვათა სიცოცხლეს და ჯანმრთელობას) და 236-ე მუხლის მესამე და მეოთხე ნაწილებით (ასაფეთქებელი მოწყობილობის მართლსაწინააღმდეგო შეძენა-შენახვა და ტარება) წარედგინა, რაც სასჯელის სახედ და ზომად 20 წლამდე ან უვადო თავისუფლების აღკვეთას ითვალისწინებს.პროკურატურა ბრალდებულისთვის აღკვეთის ღონისძიების სახით პატიმრობის გამოყენების შუამდგომლობით, სასამართლოს კანონით დადგენილ ვადაში მიმართავს“, - აღნიშნულია განცხადებაში.

სამართალი • 1794329058

ნატა ვიბლიანი მიმართვას ავრცელებს

ნატა ვიბლიანი სოციალურ ქსელში მიმართვას ავრცელებს და ადვოკატებთან თანამშრომლობის შეწყვეტას ეხმაურება. მისი თქმით, ადვოკატების საქმიდან ჩამოცილება დიდი ხნის წინ სურდა. ვიბლიანი აცხადებს, რომ სამართლებრივ ბრძოლას უფრო აქტიურად გააგრძელებს და შესაბამის გადაწყვეტილებებს გაასაჩივრებს.„ესენი ჩემი ადვოკატები არ ყოფილან, მოგზავნილები იყვნენ და გამოჩნდა, საჯაროდ ვიხილეთ.ტესტი ვარშავიდან საქართველოში კაკაბაძემ წაიღო ისე, რომ მე არ დამიპლომბავს და მისი ნომერიც არ დამიმახსოვრებია. კიდევ ბევრი რამ არის, რაზეც საუბარი შემიძლია.კვირას მინდოდა ადვოკატებისთვის აცილების გაკეთება, თუმცა სამი დღე მთხოვეს.დღეიდან ისინი ჩემი ადვოკატები აღარ არიან. აუცილებლად გავასაჩივრებ ყველაფერს და ამ საქმეს უფრო დიდი შემართებითა და ძალით მივხედავ.ადვოკატები უნდა გისმენდნენ და როცა ურეკავ, გპასუხობდნენ. ძალიან დიდი ხნის წინ მინდოდა მათი ამ საქმიდან ჩამოცილება.დაზარალებულად პროკურატურამ მცნო. ამიერიდან კიდევ უფრო ეფექტურ ბრძოლას გპირდებით“, – წერს ნატა ვიბლიანი.ცნობისთვის, ადვოკატმა ნუცა თოფურიამ სოციალურ ქსელში განცხადება გაავრცელა, რომელშიც აღნიშნავს, რომ ნატა ვიბლიანის ინტერესებს აღარ იცავს.

სამართალი • 1794323832

„სამწუხაროდ, რეალობა სრულიად მოულოდნელი და მძიმე აღმოჩნდა... ნატა ვიბლიანის ინტერესებს აღარ ვიცავ“ – ადვოკატის საგანგებო განცხადება

ადვოკატი ნუცა თოფურია სოციალურ ქსელში განცხადებას ავრცელებს და ნატა ვიბლიანის ინტერესების დაცვაზე უარს აცხადებს. ადვოკატის თქმით, ის კოლეგებთან, ტარიელ კაკაბაძესა და მარიამ ბარსონიძესთან ერთად, თვეების განმავლობაში უანგაროდ მუშაობდა ვიბლიანის სამართლებრივ დაცვაზე, თუმცა მოგვიანებით, მათ შორის ურთიერთობა მკვეთრად დაიძაბა. ადვოკატი ნატა ვიბლიანს უსაფუძვლო მოთხოვნების წამოყენებასა და მისი კოლეგების დისკრედიტაციაში ადანაშაულებს.„საზოგადოების მაღალი ინტერესებიდან გამომდინარე მსურს, საჯაროდ გამოვეხმაურო და მკაფიოდ განვმარტო მიმდინარე მოვლენები.ამ პერიოდის განმავლობაში, კოლეგა ადვოკატ ტარიელ კაკაბაძესთან და მარიამ ბარსონიძესთან ერთად, სრულიად უანგაროდ ვიცავდით ნატა ვიბლიანის ინტერესებს.არაერთ მნიშვნელოვან საქმეში. ჩვენი ძალისხმევით, პროკურატურასა და შინაგან საქმეთა სამინისტროში არაერთი საჩივარი შევიდა, რამაც საბოლოო ჯამში, გარდამტეხი როლი ითამაშა მის სამართლებრივ დაცვასა და რეაბილიტაციაში.ჩვენი უზარმაზარი დაუღალავი შრომის შედეგად, ნატა ვიბლიანი ოფიციალურად იქნა ცნობილი დაზარალებულად სექსუალური ძალადობის საქმეზე. ამ სტატუსის საფუძველზე მან მიიღო საფრანგეთში ლეგალურად ცხოვრების უფლება, ასევე გადაეცა საცხოვრებელი ბინა, ფულადი დახმარება და არაერთი მნიშვნელოვანი სოციალური თუ მატერიალური ბენეფიტი.სამწუხაროდ, რეალობა სრულიად მოულოდნელი და მძიმე აღმოჩნდა. ყოველგვარი ლოგიკისა და ეთიკის საწინააღმდეგოდ, პიროვნება, რომლის გადასარჩენადაც თვეების განმავლობაში ვიბრძოდით, უკიდურესად აგრესიული გახდა.მიუხედავად ჩემი მრავალჯერადი მცდელობისა, ამეხსნა მისთვის, რომ მისი მტრები არ ვიყავით, ნატა ვიბლიანმა დაიწყო ისეთი აბსოლუტურად საფუძველმოკლებული მოთხოვნების წამოყენება, რომელთა დაკმაყოფილებაც ფიზიკურად და სამართლებრივად შეუძლებელი იყო.უფრო მეტიც, მან პირადად ტარიელ კაკაბაძეს საჯარო შავი პიარით და ისეთი ბრალდებების გავრცელებით დაემუქრა, რომლებსაც რეალობასთან არანაირი შეხება არ აქვს.იმის ფონზე, რაც ჩვენ ამ თვეების განმავლობაში მისთვის გავაკეთეთ, სამწუხაროდ, დაიწყო ტარიელ კაკაბაძისა და მარიამ ბარსონიძის დისკრედიტაცია.მიუხედავად იმისა, რომ გვაქვს უდიდესი პროფესიული სურვილი, დაწყებული საქმე ბოლომდე მივიყვანოთ, მსგავსი მტრული დამოკიდებულების ფონზე, იძულებულნი ვართ, აღნიშნულ საქმეს სრულად ჩამოვშორდეთ.ადვოკატსა და კლიენტს შორის ურთიერთობა უნდა ემყარებოდეს ორმხრივ ნდობას, პატივისცემასა და ეთიკურ სტანდარტებს. სადაც ეს პრინციპები ირღვევა, პროფესიული თანამშრომლობა შეუძლებელია. შესაბამისად, დღემდე არსებული მონაცემებით და მოცემულობით, მე, როგორც ადვოკატი, ნატა ვიბლიანის ინტერესებს აღარ ვიცავ!“, - წერს ადვოკატი ნუცა თოფურია სოციალურ ქსელში.