საზოგადოება • 1779198915

საქართველოსა და აზერბაიჯანს შორის შეთანხმება გაფორმდა, რომელიც საქართველოსთვის ბუნებრივი გაზის 20 წლის ვადით მიწოდებას ითვალისწინებს

საქართველოს ნავთობისა და გაზის კორპორაციის გენერალურმა დირექტორმა ეკატერინე სისაურმა და აზერბაიჯანის რესპუბლიკის ნავთობის სახელმწიფო კომპანიის (SOCAR) პრეზიდენტმა როვშან ნაჯაფმა ბუნებრივი გაზის ყიდვა-გაყიდვის ახალი ოცწლიანი ხელშეკრულების გაფორმების თაობაზე შეთანხმებას ხელი მოაწერეს.ხაზგასასმელია, რომ კორპორაციასა და შესაბამის მომწოდებელ კომპანიას შორის დამატებითი გაზის ყიდვა-გაყიდვის  2003 წელს გაფორმებული ხელშეკრულების ვადა 2026 წელს იწურება, შესაბამისად, 20-წლიანი ვადით ხელშეკრულების გაგრძელებას განსაკუთრებული მნიშვნელობა ენიჭება სამხრეთ-კავკასიური მილსადენის პროექტის ფარგლებში სტრატეგიული თანამშრომლობისთვის. მნიშვნელოვანია, რომ საქართველოს ნავთობისა და გაზის კორპორაცია  უზრუნველყოფილი იქნება ბუნებრივი გაზის მიწოდების ახალი, ალტერნატიული წყაროთი, რაც ხელს შეუწყობს ქვეყანაში რესურსების უწყვეტ მიწოდებას.ხელშეკრულებით გათვალისწინებული ბუნებრივი გაზის სრული მოცულობა საქართველოს სოციალური გაზის სექტორის მოთხოვნის დასაკმაყოფილებლად იქნება გამოყენებული და ჩაანაცვლებს დამატებითი გაზის მოცულობებს, რომლებიც საჭიროა სოციალური გაზის სექტორის მოთხოვნის დასაკმაყოფილებლად.აღნიშნული თანამშრომლობა კომპლექსურ ხასიათს ატარებს და მხოლოდ საქართველოსთვის ბუნებრივი გაზის მიწოდებით არ შემოიფარგლება - ის არაერთ მნიშვნელოვან მიმართულებას მოიცავს, მათ შორის, ისეთი საერთაშორისო სატრანზიტო პროექტების მხარდაჭერას,  როგორიცაა სამხრეთკავკასიური მილსადენი, ბაქო-თბილისი-ჯეიჰანის ნავთობსადენი და ბაქო-სუფსის ნავთობსადენი.ეკატერინე სისაური ბაქოში ეკონომიკისა და მდგრადი განვითარების მინისტრთან, მარიამ ქვრივიშვილთან ერთად, საქართველოს პრემიერ-მინისტრის ვიზიტის ფარგლებში იმყოფებოდა.

სამართალი • 1779167295

მედია: სან-დიეგოს ისლამურ ცენტრში სროლას სამი ადამიანი ემსხვერპლა

აშშ-ის კალიფორნიის შტატის ქალაქ სან-დიეგოში მდებარე ისლამურ ცენტრში ორმა მამაკაცმა ცეცხლი გახსნა, რის შედეგადაც სამი ადამიანი დაიღუპა. ინფორმაციას ამერიკული მედია ავრცელებს.ერთ-ერთი გარდაცვლილი ისლამური ცენტრის დაცვის თანამშრომელია. როგორც მოგვიანებით პოლიციამ განაცხადა, დაცვა „გმირულად მოქმედებდა“, რადგან მათ თავდამსხმელები შეაკავეს.ინციდენტის დროს ცენტრში ბავშვები იმყოფებოდნენ, თუმცა, მედიის ცნობით, არცერთი ბავშვი არ დაშავებულა. ორივე თავდამსხმელმა თავი მოიკლა.

პოლიტიკა • 1779111430

ირაკლი კობახიძე: გაფორმებული შეთანხმებები არის საქართველო-აზერბაიჯანს შორის საეტაპო მნიშვნელობის, შეთანხმებები დაკავშირებულია ეკონომიკური და ენერგეტიკული პარტნიორობის გაღრმავებასთან

შეთანხმებები, რომელიც გაფორმდა, არის საქართველოსა და აზერბაიჯანს შორის ურთიერთობებში საეტაპო მნიშვნელობის, ეს შეთანხმებები დაკავშირებულია ეკონომიკური და ენერგეტიკული პარტნიორობის გაღრმავებასთან, ამის შესახებ საქართველოს პრემიერ-მინისტრმა, ირაკლი კობახიძემ ჟურნალისტებს ბაქოში განუცხადა.პრემიერის თქმით, განსაკუთრებით ხაზგასასმელია, რომ 20 წლიანი ხელშეკრულება სოციალურ გაზთან დაკავშირებით გახანგრძლივდა 20 წლით.„ასევე მნიშვნელოვანია ის შეთანხმებები, რომელიც გაფორმდა. ეს არის ჩვენს ურთიერთობებში საეტაპო მნიშვნელობის შეთანხმებები, რომელიც დაკავშირებულია ეკონომიკური და ენერგეტიკული პარტნიორობის გაღრმავებასთან. ეს შეთანხმებები უკავშირდება გაზის იმპორტს და ტრანზიტს. განსაკუთრებით ხაზგასასმელია, რომ 20 წლიანი ხელშეკრულება სოციალურ გაზთან დაკავშირებით გახანგრძლივდა 20 წლით. ამისათვის გაფორმდა ახალი ხელშეკრულება და ამას ექნება განსაკუთრებული მნიშვნელობა ჩვენი ქვეყნის ენერგეტიკული უსაფრთხოებისთვის“, – განაცხადა პრემიერმა.

პოლიტიკა • 1779109095

შალვა პაპუაშვილი: როდის იყო „ლელო“ სხვაგან და გვარამია სხვაგან, ან გახარია სხვაგან და მელია სხვაგან, მარგინალური ადამიანების ერთი ჯგუფია, უცხოელმა შეაქოთ, ამის იქეთ არაფერი აინტერესებთ

რასაც აკვირდებით, ყველაფერი ფარსია. როდის იყო „ლელო“ სხვაგან და გვარამია – სხვაგან, ან გახარია სხვაგან და მელია – სხვაგან. ერთი ჯგუფია, მარგინალური ადამიანების ჯგუფი, – ამის შესახებ საქართველოს პარლამენტის თავმჯდომარემ შალვა პაპუაშვილმა ჟურნალისტებს განუცხადა.პაპუაშვილის თქმით, ოპოზიციონერი პოლიტიკოსების მთავარი პრობლემაა, რომ მათ ღალატის ნაბიჯი გადადგეს.„აქ რაოდენობას მნიშვნელობა არ აქვს, რამდენიმე ასეულია, თუ რამდენიმე ათასია, მარგინალი ნიშნავს, რომ არიან საზოგადოების ისტორიული კონტექსტიდან ამოვარდნილი ადამიანები და ეს არის ერთი ჯგუფი, რომლებსაც აქვთ ერთადერთი მიზანი, რომ უცხოელმა შეაქოს. ჯგუფი ადამიანებისა აქამდე დეგრადირდა, რომ არათუ პატრიოტიზმზე და სამშობლოს სიყვარულზეა შესაძლებელი მათთან საუბარი, ადამიანებს თვალები აქვთ დაბნელებული, რომ უცხოელმა შეაქოთ, ინგლისურად გაიგონ რამდენიმე საქებარი სიტყვა. ამის იქეთ, არაფერი არ აინტერესებთ, რა დაემართება ჩვენს ქვეყანას.ამიტომ, პოლიტიკოსებს რაც შეეხება, მათი მთავარი პრობლემაა, რომ მათ გადადგეს ღალატის ნაბიჯი. ღალატში როცა შევა ადამიანი, ჩვენი ისტორიიდანაც ვიცით, რა შედეგები აქვს ამას. ყორღანაშვილსაც ექნებოდა თავისი გასამართლებელი რაღაც არგუმენტები ალბათ, როგორც ესენი მოიშველიებენ, მაგრამ ისტორიამ ამ ყველაფერს გასცა პასუხი. შენი ქვეყნის წინააღმდეგ  როცა მიდიხარ, სხვის ინტერესებს ითვალისწინებ და სხვისი ინტერესებით მოქმედებ, მაშინ ხარ ყორღანაშვილი“, – განაცხადა შალვა პაპუაშვილმა.

პოლიტიკა • 1779108954

საქართველოსა და აზერბაიჯანს შორის ენერგეტიკისა და ტრანსპორტის სექტორში რამდენიმე სტრატეგიული შეთანხმება გაფორმდა

ეკონომიკისა და მდგრადი განვითარების მინისტრმა, მარიამ ქვრივიშვილმა ბაქოში ხელი მოაწერა რამდენიმე სტრატეგიულ შეთანხმებას საქართველოსა და აზერბაიჯანს შორის ენერგეტიკისა და ტრანსპორტის სექტორში, მათ შორის ხაზგასასმელია საქართველოსთვის 20 წლის ვადით ბუნებრივი გაზის მიწოდების, ასევე ელექტროენერგიის მიწოდებისა და ტრანზიტის თაობაზე მთავრობათაშორისი შეთანხმებები, – ამის შესახებ ეკონომიკისა და მდგრადი განვითარების სამინისტროს მიერ გავრცელებულ ინფორმაციაშია ნათქვამი.უწყების ცნობით, ენერგეტიკულ სექტორში შეთანხმების ყოვლისმომცველი პაკეტი ორი ქვეყნის მთავრობებს შორის წარმატებით დასრულებული რამდენიმეთვიანი მოლაპარაკებების შედეგია, რაც ძალიან მნიშვნელოვანია საქართველოს ენერგეტიკული უსაფრთხოების გაძლიერებისა და რეგიონული ენერგეტიკული დერეფნის განვითარებისთვის.„აღსანიშნავია, რომ აზერბაიჯანიდან დამატებითი გაზის ყიდვა-გაყიდვის ხელშეკრულებას, რომელიც 2003 წელს არის გაფორმებული, ვადა ამოეწურა, შესაბამისად, ახალი ხელშეკრულების გაფორმებას და 20 წლის ვადით გაგრძელებას განსაკუთრებული მნიშვნელობა აქვს სტრატეგიული თანამშრომლობისთვის სამხრეთკავკასიური მილსადენის პროექტის ფარგლებში. ბაქოში ვიზიტის ფარგლებში აგრეთვე ხელი მოეწერა ახალ შეთანხმებას ბაქო-სუფსის ნავთობსადენის ქართულ სექციასთან დაკავშირებით საოპერაციო ხელშეკრულების გაფორმების თაობაზე, რაც უზრუნველყოფს ცენტრალური აზიიდან საქართველოს გავლით ევროპაში ნავთობის ტრანზიტის განახლებას და მნიშვნელოვნად გაზრდის ჩვენი ქვეყნის ბიუჯეტის შემოსავლებს. განსაკუთრებით ხაზგასასმელია, რომ გაფორმდა ორმხრივი საკოორდინაციო საბჭოს პროტოკოლი, რომლითაც ბაქო – თბილისი – ყარსის ახალი სარკინიგზო მონაკვეთი სრულ ექსპლუატაციაში შევა. დოკუმენტს ხელი მოაწერეს საქართველოს ეკონომიკისა და მდგრადი განვითარების მინისტრმა, მარიამ ქვრივიშვილმა და აზერბაიჯანის ციფრული განვითარებისა და ტრანსპორტის მინისტრმა რაშად ნაბიევმა. ასევე ძალიან მნიშვნელოვანია, რომ მხარეებს შორის მიღწეული გადაწყვეტილებით, 6-წლიანი პაუზის შემდეგ თბილისსა და ბაქოს შორის ყოველდღიური სამგზავრო სარკინიგზო მიმოსვლა მიმდინარე წლის 26 მაისს აღდგება. საქართველოსა და აზერბაიჯანს შორის ენერგეტიკულ სექტორში გაფორმებული ყოვლისმომცველი პაკეტი ისტორიული მნიშვნელობის შეთანხმებაა, რომელიც კიდევ უფრო გააღრმავებს ქვეყნებს შორის ეკონომიკურ კავშირებს და გააძლიერებს საქართველოს ენერგეტიკულ უსაფრთხოებას“, – ნათქვამია გავრცელებულ ინფორმაციაში.მარიამ ქვრივიშვილთან ერთად ბაქოში იმყოფებოდნენ მინისტრის მოადგილე თამარ იოსელიანი, ასევე საქართველოს ნავთობისა და გაზის კორპორაციის, საქართველოს სახელმწიფო ელექტროსისტემისა და ესკოს ხელმძღვანელები.

პოლიტიკა • 1779013695

ოჯახი, უპირველესად, ზნეობრივი სკოლაა, რომელიც ჩვენს უნიკალურ კულტურას, სახელმწიფოებრივ ცნობიერებასა და ეროვნულ იდენტობას ინახავს. როგორც ჩვენს წინაპრებს, დღეს ჩვენც ღრმად გვწამს, რომ მორალურად მტკიცე ოჯახი ძლიერი სახელმწიფოს საწინდარია - მიხეილ ყაველაშვილი

ადამიანი სამშობლოს სიყვარულს, უპირველეს ყოვლისა, ოჯახში, მშობლიურ კერასთან ეზიარება. ქართულ ხალხურ ტრადიციაში დედის ლოცვა, მამის დარიგება და წინაპართა ხსოვნა მუდამ იყო ის უხილავი ძალა, რომელიც ადამიანს სწორ გზაზე აყენებდა. როგორც ჩვენს წინაპრებს, დღეს ჩვენც ღრმად გვწამს, რომ მორალურად მტკიცე ოჯახი ძლიერი სახელმწიფოს საწინდარია“, - განაცხადა საქართველოს პრეზიდენტმა მიხეილ ყაველაშვილმა სამების საკათედრო ტაძარში, სადაც ოჯახის სიწმინდისა და მშობლების პატივისცემის დღისადმი მიძღვნილ წირვას დაესწრო.საქართველოს პრეზიდენტის განცხადებით, ოჯახი, უპირველესად, ზნეობრივი სკოლაა, რომელიც ჩვენს უნიკალურ კულტურას, სახელმწიფოებრივ ცნობიერებასა და ეროვნულ იდენტობას ინახავს. „დღეს, 17 მაისს, ჩვენ განსაკუთრებულ დღესასწაულს - ოჯახის სიწმინდისა და მშობლების პატივისცემის დღეს აღვნიშნავთ. ოჯახი, უპირველესად, ზნეობრივი სკოლაა, რომელიც ჩვენს უნიკალურ კულტურას, სახელმწიფოებრივ ცნობიერებასა და ეროვნულ იდენტობას ინახავს.საქართველოს წარსული მოწმობს, რომ ქვეყნის გადარჩენის ბედი არა მხოლოდ ბრძოლის ველზე, არამედ ხშირად ქართულ ოჯახში წყდებოდა, როდესაც ომიანობის დროს ჩვენი სახელმწიფოებრიობა და ეკლესია დარტყმის ქვეშ აღმოჩნდებოდა, ოჯახურ კერაში იწრთობოდა ჩვენი ენა, ტრადიციები, მტკიცდებოდა სარწმუნოება, სამშობლოს სიყვარული და თავისუფლების იდეა თაობებს გადაეცემოდა. ადამიანი სამშობლოს სიყვარულს, უპირველეს ყოვლისა, ოჯახში, მშობლიურ კერასთან ეზიარება. ქართულ ხალხურ ტრადიციაში დედის ლოცვა, მამის დარიგება და წინაპართა ხსოვნა მუდამ იყო ის უხილავი ძალა, რომელიც ადამიანს სწორ გზაზე აყენებდა. როგორც ჩვენს წინაპრებს, დღეს ჩვენც ღრმად გვწამს, რომ მორალურად მტკიცე ოჯახი ძლიერი სახელმწიფოს საწინდარია“, - განაცხადა მიხეილ ყაველაშვილმა. საქართველოს პრეზიდენტის განცხადებით, ქვეყნისათვის უმნიშვნელოვანესი ფასეულობის დაცვასა და შენარჩუნებაში უდიდესია დედაეკლესიის როლი. მანვე უწმინდესისა და უნეტარესის, ილია II-ის წვლილზე გაამახვილა ყურადღება და აღნიშნა, რომ სწორედ მისი ინიციატივით დაწესდა ოჯახის სიწმინდისა და მშობლების პატივისცემის დღე.„ამ უმნიშვნელოვანესი ფასეულობის დაცვასა და შენარჩუნებაში უდიდესია ჩვენი დედაეკლესიის როლი. დღეს, როდესაც ოჯახის სიწმინდეზე ვსაუბრობთ, შეუძლებელია, უდიდესი მადლიერებით არ გავიხსენოთ სრულიად საქართველოს კათოლიკოს-პატრიარქის, უწმინდესისა და უნეტარესის, ილია II-ის ეპოქალური მემკვიდრეობა. სწორედ მისი ინიციატივით დაწესდა ოჯახის სიწმინდისა და მშობლების პატივისცემის დღე. მისმა უწმინდესობამ ქვეყნისათვის უმძიმეს პერიოდში იტვირთა ერის სულიერი მამობა. განუზომელია მისი ღვაწლი დემოგრაფიის მხარდაჭერის საქმეში. მის მიერ მესამე და მომდევნო შვილების მონათვლის ინიციატივამ ათასობით ქართულ ოჯახს გამბედაობა და რწმენა ჩაუნერგა. ამ ტრადიციამ ახალი სული შთაბერა ჩვენს დემოგრაფიულ მომავალს და თითოეულ ჩვენგანს დაანახა, რომ ყოველი ახალი სიცოცხლე ქვეყნის უდიდესი სიმდიდრეა“, - განაცხადა საქართველოს პრეზიდენტმა. როგორც მიხეილ ყაველაშვილმა სიტყვით გამოსვლისას აღნიშნა, ფასდაუდებელ სულიერ მემკვიდრეობას დღეს ღირსეულად აგრძელებს უწმინდესი და უნეტარესი, კათოლიკოს-პატრიარქი შიო III. „ამ ფასდაუდებელ სულიერ მემკვიდრეობას დღეს ღირსეულად აგრძელებს უწმინდესი და უნეტარესი, კათოლიკოს-პატრიარქი შიო III. მისი წინამძღოლობით ეკლესია კვლავაც მყარად დგას მშვიდობის, ერთობის, ოჯახური ღირებულებებისა და მორალური სიმტკიცის სადარაჯოზე. თანამედროვე სამყაროს გლობალური გამოწვევების ფონზე, ჩვენი ვალია, დავიცვათ და გავაძლიეროთ ის წმინდა სივრცე, სადაც სიყვარული, ერთგულება და თაობათაშორისი კავშირი ცოცხლობს. გილოცავთ ოჯახის სიწმინდის დღეს! ღმერთმა დალოცოს, გაამრავლოს და გააძლიეროს ყოველი ქართული ოჯახი. ღმერთმა გააძლიეროს ჩვენი სამშობლო -საქართველო!“, - განაცხადა საქართველოს პრეზიდენტმა.

საზოგადოება • 1779008452

მინდა საქართველოს მივულოცო ეს არაჩვეულებრივი დღე, რომელსაც, მართალია არც თუ ისე დიდი ხნის ისტორია აქვს, მაგრამ ამის მიუხედავად, მან უკვე უზარმაზარი ბრწყინვალება შეიძინა - მიხეილ სარჯველაძე

მიხეილ სარჯველაძემ საქართველოს ოჯახის სიწმინდის დღე მიულოცა. ჯანდაცვის მინისტრმა აღნიშნა, რომ ხანმოკლე ისტორიის მიუხედავად, ამ დღემ უკვე მოასწრო „უზარმაზარი ბრწყინვალების შეძენა“.„დრომ აჩვენა და გამოცდილებამაც, რომ ეს არამც თუ უბრალოდ მნიშვნელოვანი დღეა ჩვენი ერისთვის, არამედ მიჭირს ვთქვა, რომელია უფრო მეტად მნიშვნელოვანი - დღე, როდესაც ერთიანდება ერი და ბერი - ყველაზე მეტად, მკაფიოდ და ცხადად სწორედ დღევანდელ დღეს არის ეს ყველაფერი გადმოცემული, განხორციელებული. ვფიქრობ, რომ ეს განაპირობებს კიდეც ამ დღის მნიშვნელობას. მინდა ამ შესაძლებლობით ვისარგებლო და მთელ საქართველოს მივულოცო ეს არაჩვეულებრივი დღე, რომელსაც, მართალია არც თუ ისე დიდი ხნის ისტორია აქვს, მაგრამ ამის მიუხედავად, მან უკვე მოასწრო და უზარმაზარი ბრწყინვალება შეიძინა“, - განაცხადა მინისტრმა.

პოლიტიკა • 1778949816

ხალხი, რომელიც მონაწილეობდა გადატრიალებაში, პოლიციელს ურტყამდა და ადმინისტრაციულ შენობას წვავდა, პოლიტიკური პატიმრები არიან?! - ირაკლი კირცხალია

სახელმწიფოს გადატრიალების მცდელობა მშვიდობიანი აქცია იყო?! - ამ კითხვით მიმართა საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარემ ირაკლი კირცხალიამ პოლიტოლოგ ნიკა ჩიტაძის გადაცემაში „ღია ეთერი - დებატები“, სადაც პოლიტოლოგმა განაცხადა, რომ არანაირი სახელმწიფო გადატრიალებას ადგილი არ ჰქონია და დაკავებულებს პოლიტპატიმრები უწოდა. "რას ჰქვია გადატრიალების მცდელობა არ იყო?! პარლამენტის შენობას წვავდნენ, დაასახიჩრეს პოლიციელები. რომელია პოლიტიკური პატიმარი, ერთი მითხარით! ხალხი, რომელიც მონაწილეობას იღებდა გადატრიალებაში, რომელიც პოლიციელს ურტყამდა და ადმინისტრაციულ შენობას წვავდა, ესენი არიან პოლიტიკური პატიმრები?! თქვენ, ნებსით თუ უნებლიედ, როგორც ბატონმა ჰერჩინსკის და მის დამქაშებს, როგორც ცრუ აღქმებში შეჰყავდათ ჩვენი საზოგადოება, ახლა თქვენ იმავეს იმეორებთ“, - განაცხადა ირაკლი კირცხალიამ.

პოლიტიკა • 1778840501

ირაკლი ზარქუა: მუშაობას რომ ვასრულებთ, „გახარიები“ პარლამენტში მერეც რჩებიან, ისე მოეწონათ აქაურობა, ეტყობა, გვარამია გახარიას მიმდევრებზე ეჭვიანობს

„ლელო“, გახარიები, გვარამიები, სააკაშვილები და თენგოც კოლექტიური „ნაცმოძრაობა“ არიან, მათი პატრონი და დამფინანსებელიც ერთია და რა გაერთიანებაზე საუბრობენ? – ამის შესახებ ჟურნალისტებს საქართველოს პარლამენტის დიასპორის საკითხთა კომიტეტის თავმჯდომარემ, ირაკლი ზარქუამ განუცხადა.დეპუტატის თქმით, როგორც ჩანს, გვარამია გახარიას მიმდევრებზე ეჭვიანობს, რადგან თავის დროზე ეს ერთი კოლექტიური „ნაცმოძრაობა“ იყო.„ჩვენ გახარია რატომ განგვიდგა? პრემიერ-მინისტრი იყო და კრიტიკულ მომენტში გადახტა, მელიას ვერ დავიჭერო. მელია ვინაა? „ნაცია“. ეს ავიწყდებათ? ახლა ერთმანეთზე ეჭვიანობენ. მათ ერთი პატრონი, ერთი დამფინანსებელი ჰყავთ. მათი ამოცანაა, როგორმე საქართველოში პროვოკაცია იყოს და მერვე ტალღაზე რევოლუცია განახორციელონ. გახარია მათი არაა? წინასაარჩევნოდ ერთად არ დარბოდნენ? ახლა არიან ცალ-ცალკე? ახლა „გახარიები“ დაწინაურდნენ, გონს მოეგნენ და მიხვდნენ, რომ პარლამენტში სხედან. ჩვენ რომ მუშაობას ვასრულებთ, „გახარიები“ პარლამენტში მერეც რჩებიან, ისე მოეწონათ, შენობიდან ბოლოს გადიან. ახლა მათზე დანარჩენები ეჭვიანობენ, ჩვენც უნდა შვსულიყავითო“, – განაცხადა ზარქუამ.ცნობისთვის, „ოპოზიციის ალიანსის“ ერთ-ერთი ლიდერი ნიკა გვარამია მიიჩნევს, რომ პარტიები „ლელო – ძლიერი საქართველო“ და „გახარია საქართველოსთვის“ ალიანსში უნდა მიიღონ.

საზოგადოება • 1778766372

„ტოიოტა ცენტრი თეგეტამ“ სრულიად ახალი, მე-6 თაობის Toyota RAV4 წარადგინა

თანამედროვე ციფრული სისტემები, კომფორტი, უსაფრთხოების მოწინავე გადაწყვეტები და მრავალფეროვნება, რომელიც წლების განმავლობაში ამ მოდელის სავიზიტო ბარათად იქცა - „ტოიოტა ცენტრი თეგეტამ“ საქართველოში მე-6 თაობის უახლესი RAV4 წარადგინა.ახალი ავტომობილის წარდგენის ღონისძიება კახეთში, Hotel Meteo-ში გაიმართა, სადაც მომხმარებლებსა და პარტნიორ კომპანიებს ბრენდის ერთ-ერთი ყველაზე ცნობადი და მოთხოვნადი SUV ადგილზე გააცნეს. სტუმრებს შესაძლებლობა ჰქონდათ, ავტომობილი თავად გაეტესტათ და მისი მონაცემები შეეფასებინათ.ღონისძიებას თან სდევდა სხვადასხვა ტიპის აქტივობებიც, რაც გარემოს კიდევ უფრო უნიკალურსა და დასამახსოვრებელს ხდიდა. მარიამ მელიაშვილი, „ტოიოტა ცენტრი თეგეტას“ დირექტორი: „Toyota RAV4 წლების განმავლობაში მომხმარებლებისა და პარტნიორების ერთ-ერთი ყველაზე საყვარელი და მოთხოვნადი SUV მოდელია. მოხარულები ვართ, რომ მისი სრულიად ახალი, მე-6 თაობის წარდგენა სწორედ მათთან ერთად შევძელით. ეს ავტომობილი უკვე გაცილებით მეტია, ვიდრე უბრალოდ განახლებული მოდელი. ის აერთიანებს თანამედროვე ტექნოლოგიებს, კომფორტსა და იმ თავისუფლების შეგრძნებას, რასაც RAV4 ყოველთვის ატარებდა. ჩვენთვის მნიშვნელოვანია, რომ ასეთი პრეზენტაციები მხოლოდ პროდუქტის წარდგენას არ ემსახურებოდეს. გვინდოდა, სტუმრებს რეალურად გამოეცადათ ახალი RAV4“.ღონისძიების ცენტრალური მომენტი საღამოს ოფიციალური ნაწილი იყო, სადაც სტუმრებმა პირველად იხილეს მე-6 თაობის Toyota RAV4. პრეზენტაციაზე დეტალურად წარმოაჩინეს ავტომობილის განახლებული დიზაინი, თანამედროვე ინტერიერი და ტექნოლოგიური შესაძლებლობები, რომლებიც ახალ თაობას წინა მოდელისგან მკვეთრად განასხვავებს. ახალი მოდელი მორგებულია როგორც ქალაქის გზებზე, ისე ქალაქგარეთ სამოგზაუროდ. ღონისძიება „ტოიოტა ცენტრი თეგეტას“ პარტნიორი კომპანიების მხარდაჭერით გაიმართა. მათ შორის, „თიბისი დაზღვევის“, „თიბისი ლიზინგის“, „ალდაგის“, „ჯიპიაი ჰოლდინგის“, „მეტროპოლის“, Bridgestone-ისა და „სარაჯიშვილის“.მე-6 თაობის Toyota RAV4-ის წარდგენით „ტოიოტა ცენტრი თეგეტამ“ კიდევ ერთხელ დაადასტურა თავისი ერთგულება მომხმარებლების მიმართ და ბაზარზე იმ მაღალი სტანდარტის შენარჩუნება, რომელიც ბრენდს ათწლეულებია გამოარჩევს. ახალი მოდელის შეკვეთა, ტესტდრაივის დაჯავშნა და RAV4-ის პოტენციალის ადგილზე გამოცდა „ტოიოტა ცენტრი თეგეტას“ შოურუმშია შესაძლებელი. „თეგეტა ჰოლდინგის“ ერთ-ერთ მიმართულებაში, „თეგეტა ქარსში“ შემავალი კომპანია „ტოიოტა ცენტრი თეგეტა“ საქართველოს ბაზარზე 2014 წლიდან ოპერირებს. კომპანია მონობრენდულია და მისი მომსახურება სრულიად ტოიოტას ავტომობილებზეა ფოკუსირებული. ამ ეტაპზე კომპანია მომხმარებელს სთავაზობს ტოიოტას უახლესი მოდელების ავტომობილებს, მაღალი ხარისხის ორიგინალ ავტოსათადარიგო ნაწილებს, აქსესუარებსა და მომსახურებას. სერვისი აღჭურვილია თანამედროვე ავტორიზებული პროგრამებითა და კვალიფიციური პერსონალით.

პოლიტიკა • 1778763240

მსგავსი ტიპის რეზოლუციები არ ემსახურება საქართველოს ეროვნულ ინტერესებსა და ქვეყნის სტაბილურობას, განსაკუთრებით მიუღებელია, რომ რეზოლუციის განხილვაში მონაწილეობდა სალომე ზურაბიშვილი - ილია ინჯია საფრანგეთის ეროვნული ასამბლეის რეზოლუციაზე

მსგავსი ტიპის რეზოლუციები არ ემსახურება საქართველოს ეროვნულ ინტერესებსა და ქვეყნის სტაბილურობას, განსაკუთრებით სამწუხარო და მიუღებელია, რომ აღნიშნული რეზოლუციის განხილვაში მონაწილეობდა სალომე ზურაბიშვილი - ასე აფასებს საქართველოს პარლამენტის ვიცე-სპიკერი, პოლიტიკური ჯგუფის „ევროპელი სოციალისტები“ ლიდერი ილია ინჯია რეზოლუციას, რომელიც საფრანგეთის ეროვნულმა ასამბლეამ 68 ხმით 28-ის წინააღმდეგ დაამტკიცა. სხდომას ესწრებოდა სალომე ზურაბიშვილი.როგორც ინჯია აღნიშნავს, საფრანგეთის ეროვნული ასამბლეის მიერ საქართველოსთან დაკავშირებით მიღებული რეზოლუცია არის უსამართლო, პოლიტიკურად მიკერძოებული და რეალურ ფაქტებს აცდენილი დოკუმენტი, რომელიც აგებულია ცალმხრივ შეფასებებსა და დეზინფორმაციაზე.„საფრანგეთის ეროვნული ასამბლეის მიერ საქართველოსთან დაკავშირებით მიღებული რეზოლუცია არის უსამართლო, პოლიტიკურად მიკერძოებული და რეალურ ფაქტებს აცდენილი დოკუმენტი, რომელიც აგებულია ცალმხრივ შეფასებებსა და დეზინფორმაციაზე.მსგავსი ტიპის რეზოლუციები არ ემსახურება საქართველოს ეროვნულ ინტერესებს, ქვეყნის სტაბილურობასა და საზოგადოებაში ჯანსაღი პოლიტიკური პროცესების განვითარებას.განსაკუთრებით საგანგაშოა, როდესაც საქართველოს მიმართ მსგავსი შინაარსის პოლიტიკური გზავნილები ეფუძნება იმ ნარატივებს, რომლებიც მიზანმიმართულად აზიანებს ქვეყნის საერთაშორისო იმიჯს და ქმნის მცდარ წარმოდგენას საქართველოში მიმდინარე პროცესების შესახებ.ხაზგასასმელია ის ფაქტი, რომ აღნიშნული რეზოლუციის განხილვაში მონაწილეობდა სალომე ზურაბიშვილი, რაც განსაკუთრებით სამწუხარო და მიუღებელია. როდესაც საქართველოს ყოფილი პრეზიდენტი მონაწილეობს პროცესში, რომელიც პირდაპირ აზიანებს საკუთარი ქვეყნის საერთაშორისო პოზიციებს და ხელს უწყობს საქართველოს წინააღმდეგ მტრული პოლიტიკური გზავნილების გაძლიერებას, ეს ბუნებრივად იწვევს მწვავე პოლიტიკურ შეფასებებს. ქვეყნის ინტერესების დაცვა, განსაკუთრებით საერთაშორისო პლატფორმებზე, თითოეული პოლიტიკური ფიგურის პასუხისმგებლობაა.საქართველოს ეროვნული ინტერესები უნდა იდგეს ნებისმიერ პოლიტიკურ განსხვავებაზე მაღლა, ხოლო ქვეყნის წინააღმდეგ მიმართულ კამპანიებში მონაწილეობა ვერ იქნება შეფასებული როგორც სახელმწიფოს ინტერესებზე ორიენტირებული ქმედება“, - წერს ილია ინჯია.საფრანგეთის ეროვნულმა ასამბლეამ საქართველოს წინააღმდეგ რეზოლუცია - „საქართველოს მთავრობის არალიბერალური და ავტორიტარული გადახრის დაგმობა და საქართველოს ევროპული მომავლის მიმართ ჩვენი მხარდაჭერის ხელახლა დადასტურება“ მიიღო. 

პოლიტიკა • 1778681773

ორი ერთმანეთისგან გამომრიცხავი შეფასებებია გაკეთებული. გვაქვს ობიექტური კვლევა, რომელსაც არანაირი პოლიტიკური ქვეტექსტი არ შეიძლება ჰქონდეს. და მეორე მხრივ, ჩვენ გვაქვს რეზოლუცია, რომელსაც პოლიტიკური კონტექსტი აქვს - გიორგი კახიანი

საქართველოს პარლამენტის თავმჯდომარის მოადგილემ გიორგი კახიანმა „დღის ქრონიკასთან“ იმ მიდგომებზე ისაუბრა, რომელიც ევრობიუროკრატებს საქართველოსთან მიმართებით აქვს.მისი თქმით, ერთ მხარს დგას დემოკრატიის აღქმის 2026 წლის ანგარიში, რომელშიც საქართველო მთავრობის გამჭვირვალეობით ევროპაში ერთპიროვნულად ლიდერობს, არჩევნების პოზიტიური გავლენით ევროპაში მეორე ადგილზეა, გლობალური აღქმის ინდექსით კი ევროპის საუკეთესო ოცეულშია. მეორე მხარეს კი დგას საფრანგეთში მიღებული რეზოლუცია, რომ თურმე საქართველოში არჩევნები გაყალბდა და არის დემოკრატიული უკუსვლა.გიორგი კახიანის განცხადებით, როდესაც მიდგომა არის ობიექტური საქართველო არის ლიდერი ყველა მიმართულებით.„ორი ერთმანეთისგან სრულიად გამომრიცხავი შეფასებებია გაკეთებული. ერთი მხრივ გვაქვს ობიექტური კვლევა, რომელსაც არანაირი პოლიტიკური ქვეტექსტი არ შეიძლება ჰქონდეს. და მეორე მხრივ, ჩვენ გვაქვს საფრანგეთის ეროვნული საბჭოს რეზოლუცია, რომელიც ემყარება ისეთ მოსაზრებებს, რომელიც მაგალითად, იყო აღწერილი ევროპარლამენტის მიერ მიღებულ არაერთ რეზოლუციაში. ანუ არის აღქმებზე, არარეალურ ფაქტებზე დამყარებული დოკუმენტი, რომელსაც პოლიტიკური კონტექსტი აქვს.ეს ძალიან ბევრი რამის მთქმელია. მხოლოდ ბოლო ორი დღის განმავლობაში - ეს ერთი კვლევა და რეზოლუცია მოვიყვანე მაგალითად, თორემ ასეთი მაგალითი ხომ ძალიან ბევრი გვაქვს ბოლო წლების განმავლობაში.ეს რაზე მიუთითებს, რას გვედავებიან? რატომ თვლიან, რომ საქართველოში არის დემოკრატიული უკუსვლა და რატომ გვესაუბრებიან სანქციებისა და შანტაჟის ენით? თუნდაც საფრანგეთის რეზოლუცია რომ ნახოთ, იქ ისეთი კონტექსტია, თითქოს 2024 წლის არჩევნებში გაყალბებას ჰქონდა ადგილი. ანუ ის აღქმა, რომელიც შეიქმნა 2024 წლის არჩევნების დროს, რომ თითქოს არჩევნები გაყალბდა, ეს აღქმა მოჰყვება დღევანდელ დღემდე“, - განაცხადა გიორგი კახიანმა.