კობახიძე

შალვა პაპუაშვილი ოპოზიციის აქციაზე: თარიღები ერევათ. პროტესტი დაიწყო 2024 წლის 26 ოქტომბერს, როდესაც გაიგეს, რომ დამარცხდნენ. გამოვიდა სალომე ზურაბიშვილი, არჩევნებს უწოდა „რუსული სპეცოპერაცია“, გაყალბება, „300 ათასი ზეციური ქართველი“

რატომ იკლებენ დღეებს არ ვიცი. 26 ოქტომბრიდან არის ეს პროტესტი, თარიღები ერევათ როგორც ჩანს, - ასე ეხმაურება საქართველოს პარლამენტის თავმჯდომარე შალვა პაპუაშვილი, ოპოზიციის მიერ დაგეგმილ აქციას, რომელიც როგორც რადიკალები აცხადებენ დაკავშირებულია იმ განცხადების წლისთავთან, რომელიც ირაკლი კობახიძემ გასულ წელს გააკეთა, „ქართული ოცნება“ 2028 წლამდე არ განიხილავს ევროკავშირთან მოლაპარაკებების გახსნას.შალვა პაპუაშვილის თქმით, როგორც ჩანს ოპოზიცია თარიღებში აირია.„რატომ იკლებენ დღეებს არ ვიცი. პროტესტი დაიწყო 2024 წლის 26 ოქტომბერს 8 საათსა და წუთებზე, როდესაც რადიკალურმა ოპოზიციამ, აქ მყოფმა რამდენიმე ელჩმა გაიგეს, რომ დამარცხდნენ პირწმინდად ქართველ ხალხთან. გამოვიდა სალომე ზურაბიშვილი და ამ ყველაფერს უწოდა ხან „რუსული სპეცოპერაცია“, გაყალბება, „300 ათასი ზეციური ქართველი“ და ა.შ.26 ოქტომბრიდან არის ეს პროტესტი, რომელიც მოდის მარტივი კაპრიზიდან, რომ უმცირესობამ უნდა მართოს უმრავლესობა. რომ გარედან უნდა იმართოს საქართველო და ცალ ფეხზე მდგომები უნდა იყვნენ ხელისუფლებაში და არა საქართველოს ინტერესების გამტარებლები. ასე, რომ თარიღები ერევათ როგორც ჩანს.ერთ წელზე მეტია მიმდინარეობს გარედან მართული ტერორი იმისთვის, რომ ანტიდემოკრატიული გზებით ჩაანაცვლონ ხელისუფლება“, - განაცხადა შალვა პაპუაშვილმა.მისი თქმით, 2024 წლის 26 ივნისს ბრიუსელმა, იმისთვის, რომ გავლენა მოეხდინა საქართველოს არჩევნებზე ცალმხრივად შეწყვიტა დიალოგი საქართველოს ხელისუფლებასთან გაწევრიანების საკითხებზე.შალვა პაპუაშვილის განცხადებით, ეს წერილობით აღიარა კიდეც ევროკავშირის საელჩომ.„ის რაც შეწყდა 2024 წლის ივნისში, ვერ შეჩერდებოდა 2024 წლის ნოემბერში, ეს ერთი. მეორე, რაც ითქვა მაშინ და რაც ჩანდა 26 ოქტომბრიდან 28 ნოემბრამდე მონაკვეთში, ჩანდა, რომ ქართველ ხალხთან დამარცხებული ზოგიერთი ევრობიუროკრატი და პოლიტიკოსი ცდილობდა, რომ ევროკავშირის საკითხი გამოეყენებინა შანტაჟის იარაღად ქართველი ხალხის წინააღმდეგ და ქართველი ხალხი და საქართველო ჰყოლოდა მუდმივი შანტაჟის ქვეშ, რომ ახლა მოლაპარაკებას გაგიხსნი ამ საკითხზე შენ თუ მარცხენა ფეხზე დადგები. მერე გაგიხსნი მეორე საკითხს თუ კი მარჯვენა ფეხზე დადგები. ასე დამამცირებელ მდგომარეობაში უნდოდათ დაეყენებინათ ქართველი ხალხი. ამიტომაც ითქვა, რომ საქართველოს ხელისუფლება აცხადებდა სრულ მზაობას, რომ საქართველოს ხელისუფლება გააგრძელებს ქვეყნის მომზადებას ევროკავშირის წევრობისთვის. არა ერთხელ გვითქვამს, რომ საქართველო იქნება 2030 წელს ყველაზე მომზადებული ევროკავშირის წევრობისთვის და ეს კვლავაც ასე რჩება. თუმცა ჩვენ მათხოვრობას ბრიუსელის ევრობიუროკრატიას არ დავიწყებთ“, - განაცხადა შალვა პაპუაშვილმა.

პოლიტიკა • 1764324240

გიორგი შარაშიძე: „ნაციონალურ მოძრაობას“ ელემენტარული პასუხისმგებლობა რომ ჰქონდეს, ამ აქციას აღარ გაეკარებოდა, ბრძნული გამონათქვამია - „საცა არა სჯობს, გაცლა სჯობს“

მშვიდობიანი პროტესტი „ნაციონალური მოძრაობის“ უპასუხისმგებლო ქმედებებმა დააზიანა. მათ ამაზე პასუხისმგებლობა არ აუღიათ, არც ბოდიში მოუხდიათ, – ამის შესახებ პარტიის „გახარიას საქრათველოსთვის“ წევრმა, გიორგი შარაშიძემ პარლამენტში განაცხადა.შარაშიძის თქმით, „ნაციონალურ მოძრაობას“ რომ ელემენტარული პასუხისმგებლობა ჰქონდეს, ამ აქციას საერთოდ აღარ გაეკარებოდა.„მშვიდობიანი პროტესტი „ნაციონალური მოძრაობის“ უპასუხისმგებლო ქმედებებმა დააზიანა. მათ ამაზე პასუხისმგებლობა არ აუღიათ, არც ბოდიში მოუხდიათ. მათ რომ ელემენტარული პასუხისმგებლობა ჰქონდეთ, ამ აქციას საერთოდ აღარ გაეკარებოდნენ. დიდი ქართველის ბრძნული გამონათქვამია – „საცა არა სჯობს, გაცლა სჯობს“. როდესაც ქვეყანა მართლა გიყვარს და ქვეყნის ინტერესს საკუთარ პარტიულ ინტერესებზე მაღლა აყენებ, მაშინ კეთილი ინებე და გაეცალე, როგორც დიდმა ქართველმა ბრძენმა დაგიბარა. ვიდრე ის ძალა იქ არის და პროტესტს აზიანებს, არ გვინდა, პასუხისმგებლობა ამ პროტესტის დაზიანებაზე ავიღოთ, რადგან ამ პროტესტზე გული შეგვტკივა. დღეს იმიტომ ვართ აქ, რომ მიგვაჩნია, ჩვენი აქ ყოფნით გაცილებით სწორი და ეფექტური წინააღმდეგობის გაწევა შეგვიძლია „ოცნებისთვის“, ვიდრე ამ შემთხვევაში, ქუჩიდან. ეს არის და ეს, თორემ ჩემი პატივისცემა ყველა იმ ადამიანს, ვინც გულწრფელად აღშფოთებულია „ოცნების“ მოღალატეობრივი საქციელით. ამ პროცესზე სრული პასუხისმგებლობა „ოცნებას“ ეკისრება.28 ნოემბერი ქვეყნის ინტერესების ღალატის დღეა, რომელიც „ოცნებამ“ და კობახიძემ ჩაიდინეს.ამას პარლამენტის ტრიბუნიდან ვეუბნებოდით. დარწმუნებული ვარ, ამაზე მწვავე ვერცერთ განცხადებას ვერ მოისმენთ, მათ შორის ქუჩიდან. უბრალოდ, თქვენ მოგწონთ ქუჩიდან ყვირილი, ჩვენ უფრო კარგად გამოგვდის, მათ შორის ტრიბუნიდან საუბარი“, – განაცხადა გიორგი შარაშიძემ.

პოლიტიკა • 1764314520

კახა კალაძე: ბოლო ერთი წლის განმავლობაში დავანახეთ მსოფლიოს, რომ თითის დაქნევით ქართულ სახელმწიფოს არ უნდა ელაპარაკოს

ბოლო ერთი წლის განმავლობაში ქვეყანა კიდევ უფრო გაძლიერდა, მეტად სუვერენული და დამოუკიდებელი გავხდით, - ასე უპასუხა თბილისის მერმა მედიის კითხვას, თუ როგორ შეაფასებდა საქართველოში ბოლო ერთ წელს მიმდინარე აქციების ჭრილში.კახა კალაძის განმარტებით, საქართველოს ევროინტეგრაციის საკითხი მთავრობაზე და ქვეყანაზე ზეწოლისთვის გამოიყენება.„მოვისმინეთ, ოფიციალური განცხადება, რომ ევროპასთან მოლაპარაკებების თემა მანამდე იყო შეჩერებული, ვიდრე ირაკლი კობახიძე გააკეთებდა ამასთან დაკავშირებით განცხადებას, თუმცა ამას არსებითი მნიშვნელობა არ აქვს. უშუალოდ პრემიერმა, პარლამენტარებმა, მეც ბევრჯერ ვთქვით, რომ საქართველოს ხელისუფლება მზადაა, დაიწყოს მოლაპარაკებები, მაგრამ ამის ინტერესი არ გააჩნიათ, რადგან პოლიტიკური პროცესი მიმდინარეობს. ისინი ცდილობენ, რომ ევროინტეგრაციის გზა გამოიყენონ მთავრობაზე, ქვეყანაზე ზეწოლისთვის. ამის მთავარი მიზეზებია, რომ არ დავემორჩილეთ მათ ბრძანებებს - არ გავხსენით მეორე ფრონტი, არ შევუერთდით სანქციებს. ეს გახდა მთავარი მამოძრავებელი იმ სპეკულაციებისა და სიბინძურისა, რასაც ბოლო თვეების განმავლობაში ზოგიერთი ევროპელი ბიუროკრატისგან ვისმენთ“, - განაცხადა კახა კალაძემ.მისივე განმარტებით, მთავარი არის ქართველი ხალხი, რომლის ინტერესებიდან გამომდინარეც მოქმედებს საქართველოს ხელისუფლება.„ბოლო ერთი წლის განმავლობაში ქვეყანა კიდევ უფრო გაძლიერდა, მეტად სუვერენული გავხდით, დავანახეთ მსოფლიოს, რომ თითის დაქნევით ქართულ სახელმწიფოს არ უნდა ელაპარაკოს. დამოუკიდებელი სახელმწიფო ვართ, რომელიც ჩვენმა წინაპრებმა სისხლით მოიპოვეს და არავის მივცემთ უფლებას, რომ ეს ყველაფერი ფეხქვეშ გათელოს. შეიძლება, რომ არა ჩვენი პრინციპული პოზიცია და პოლიტიკა, ჩვენც იმ უბედურებაში აღმოვჩენილიყავით, რაშიც 2008 წელს აღმოვჩნდით. პირველ რიგში, სამშობლოა. სამშობლოს მნიშვნელობა უნდა გაითავისოთ. ჩვენ იმიტომ აგვირჩია ქვეყნის მოსახლეობის უმრავლესობამ, ამ ქვეყანაში მცხოვრები ადამიანების ინტერესები რომ დავიცვათ, შევინარჩუნოთ მშვიდობა, რაც მნიშვნელოვანია ისე, როგორც არასდროს. მშვიდობას მოაქვს განვითარება და წინსვლა“, - აღნიშნა კახა კალაძემ.

პოლიტიკა • 1764313759

კახა კალაძე: გიორგი შერმადინს მთელი დარბაზი ტაშს უკრავდა, არსებითი მნიშვნელობა არ აქვს, 30 ცალი „ნაცი“ რაღაცას თუ გააპროტესტებს

რა არის იმაში ცუდი, რომ სპორტსმენი სახელმწიფოს მიმართ მადლიერებას გამოხატავს იმის გამო, რომ სახელმწიფო ბოლო წლებში ამ მიმართულებთ უამრავ კარგ საქმეს აკეთებს?, – ამის შესახებ დედაქალაქის მერმა მედიასთან ისაუბრა.კახა კალაძის თქმით, არაფერია იმაში ცუდი, რომ ქართველმა კალათბურთელმა, გიორგი შერმადინმა თავისი სანაკრებო კარიერის ბოლო მატჩის დასრულების შემდეგ მადლობა პრემიერ-მინისტრ ირაკლი კობახიძესაც გადაუხადა.„ცუდი რა არის იმაში, როდესაც სპორტსმენი გამოხატავს მადლიერებას სახელმწიფოს მიმართ. ბოლო წლების განმავლობაში სახელმწიფომ სპორტის მიმართულებით ძალიან ბევრი კარგი საქმე გააკეთა. თქვენ როგორ ფიქრობთ, ის შედეგები, რაც მივიღეთ კალათბურთში, ფეხბურთში, ძიუდოში ან სპორტის სხვა სახეობებში, ეს შემთხვევით მოვიდა? ეს ყველაფერი არის ზუსტად იმის შედეგი, რომ სპორტსმენებმა იშრომეს თავდაუზოგავად, მათთვის შეიქმნა შესაბამისი ინფრასტრუქტურა, პირობები. ამას უდიდესი მნიშვნელობა აქვს სპორტსმენისთვის. მაგალითად, ფეხბურთელი რომელიც საზღვარგარეთ რომელიმე კლუბში თამაშობს და თავის ნაკრებში სათამაშოდ ჩამოდის, ფიქრობს მხოლოდ და მხოლოდ ერთ რამეზე – როგორ აჩვენოს თავისი საუკეთესო შესაძლებლობები. გიორგი შერმადინს მთელი დარბაზი ტაშს უკრავდა. არსებითი მნიშვნელობა არ აქვს, 30 ცალი „ნაცი“ რაღაცას თუ გააპროტესტებს. საბედნიეროდ, მსგავსი ადამიანები არიან უმცირესობაში. ხოლო ქვეყნის უმრავლესობა რეალურად ხედავს, რა ხდება, რა პროცესები მიდის, როგორც ქვეყნის შიგნით, ასევე ქვეყნის გარეთ. ლიბერალური ფაშიზმი მსოფლიოში მარცხდება და რა თქმა უნდა, დამარცხებულია საქართველოშიც“, – აღნიშნა კახა კალაძემ.

პოლიტიკა • 1764248220

უკიდურესი დილეტანტიზმია, რომ სამშენებლო პროექტის დეველოპერული ბიზნეს გარიგება ექვემდებარებოდეს გრიფით საიდუმლოს - თაზო დათუნაშვილი "იგლ ჰილსზე"

პრემიერ-მინისტრის ინტერპელაცია და პოლიტიკური შეფასებები - ირაკლი კობახიძემ დეტალურად ისაუბრა "იგლ ჰილსის" უპრეცედენტო ინვესტიციაზე, რომლის მოცულობაც 6.5 მილიარდზე მეტია და იმ დადებით ეფექტზე, რასაც ის ქვეყანას მოუტანს. პრემიერის განცხადებით, პროექტი ეკონომიკას 11 მილიარდით გაამდიდრებს. განხორციელების ეტაპზე შეიქმნება 24 ათასზე მეტი სამუშაო ადგილი, დასრულების შემდეგ კი 8 ათასზე მეტი. პროექტი სახელმწიფო ბიუჯეტში წელიწადში საშუალოდ 700-ს მილიონს შეიტანს.ირაკლი კობახიძე გამოეხმაურა პროექტის წინააღმდეგ დაწყებულ დეზინფორმაციულ კამპანიასაც. მისი განცხადებით, სახელმწიფო არ იღებს არავითარ ფინანსურ ვალდებულებას "იგლ ჰილსის" სასარგებლოდ და პარტნიორ კომპანიას არ აქვს მიწის გასხვისების შესაძლებლობა.ოპოზიციაში აქცენტს იმ დეტალზე აკეთებენ, რომ "იგლ ჰილსის" პროექტის პირობები გასაიდუმლოებულია."საქართველოს სახელმწიფო ამბობს, რომ 33%-იან წილში შევიდა იმ მიწის საფასურით, რომელ მიწაზეც ეს დეველოპერული პროექტი უნდა განვითარდეს. ამ ვითარებაში ჩვენ პირველ რიგში გვაინტერესებს იმ მიწის საფასურის შესაბამისი 23-ის წილის შესაბამისი აგრეთვე თანხა, სად არის განთავსებული და რა ინვესტიცია შემოდის პირველ ეტაპზე არაბული მხარე იმისთვის, რომ განვსაზღვროთ, რომ პირველ ეტაპზე თუ ეს არის, შემდეგ ეტაპებზე სადღაც შეიძლება ეს თანხა 6 მილიარდამდე ავიდეს. დღეის მდგომარეობით ამის არავითარი მაჩვენებელი არ არის. უკიდურესი დილეტანტიზმია, რომ სამშენებლო პროექტის დეველოპერული ბიზნეს გარიგება ექვემდებარებოდეს გრიფით საიდუმლოს", - აცხადებს პარტია "ლელო - ძლიერი საქართველოს" პოლიტიკური საბჭოს წევრი თაზო დათუნაშვილი.

პოლიტიკა • 1764233399

ვიკა ფილფანი: ვერცერთი მცდელობა ვერ დავინახეთ, რომ „ქართულ ოცნებას“ დასავლურ სამყაროსთან დიალოგი სურდა, საკუთარი განცხადებების საპირისპიროდ იქცევიან

„ქართულმა ოცნებამ“ ერთი წლის განმავლობაში ისეთი კანონები მიიღო, რომლებიც ასოცირების ხელშეკრულებასთან ფუნდამეტურ წინააღმდეგობაში მოდის, არღვევს ადამიანის უფლებებს და გამოხატვის თავისუფლებას, – ამის შესახებ პარტიის „გახარია საქართველოსთვის“ წევრმა, ვიკა ფილფანმა განაცხადა.ვიკა ფილფანი გამოეხმაურა გერმანიის ელჩის, პეტერ ფიშერის ინტერვიუს „რადიო თავისუფლებასთან“, სადაც დიპლომატი ამბობს, რომ „დიდი ალბათობით, დეკემბრის ევროპულ საბჭოზე, როცა სახელმწიფოებისა და მთავრობების მეთაურები შეიკრიბებიან, საქართველოს ფაილი დაიხურება“.„სამწუხარო განცხადებაა, რადგან ეს ცუდი იქნება ჩვენი ქვეყანისთვის. ეს მოსალოდნელი იყო ყველა იმ ქმედების შემდეგ, რასაც „ქართული ოცნება“ 2021 წლის შემდეგ ახორციელებს. ირაკლი კობახიძემ თავად განაცხადა, მათ ევროინტეგრაციის გზა შეაჩერეს. ერთი წლის განმავლობაში, „ქართულმა ოცნებამ“ ისეთი კანონები მიიღო, რომლებიც ასოცირების ხელშეკრულებასთან ფუნდამეტურ წინააღმდეგობასთან მოდის, რომელიც ფუნდამენტურად არღვევს ადამიანის უფლებებს და გამოხატვის თავისუფლებას. ქვეყანასა და გაერთიანებას შორის სტრატეგიული პარტნიორობა საერთო შეთანხმებებს ეფუძნება. ეს საერთო შეთანხმება თუ ირღვევა, ლოგიკური შედეგი დგება. რამდენიც არ უნდა თქვას „ქართულმა ოცნებამ“ ევროპა რაღაცებს გვაძალებს, ასე არ არის“, – განაცხადა ვიკა ფილფანმა.მისი თქმით, ერთი წელია, „ქართული ოცნების“ წარმომადგენლები ლანძღვენ და თავს ესხმიან ევროკავშირის წარმომადგენლებას, არ ასრულებენ არცერთ ნაკისრ ვალდებულებას.„ევროკავშირის წარმომადგენლები ცხადად ამბობენ, რომ მზად არიან საქართველო გაერთიანებაში მიიღონ, თუ მოთხოვნები შესრულდება – არ დაირღვევა ადამიანის ფუნდამენტური უფლებები და სასამართლო დამოუკიდებელი იქნება. რაც შეეხება დიალოგს, ერთი წლის განმავლობაში, „ქართული ოცნების“ მხრიდან ვერცერთი მცდელობა ვერ დავინახეთ, რომ მას დასავლურ სამყაროსთან რეალური დიალოგი სურდა. ამის მაგალითები არ არის. „ქართული ოცნების“ ხელისუფლებას დიალოგი თუ სურდა, ყველაფერი უნდა გაეკეთებინა, რომ დიალოგი დაეწყო. რასაც ამბობენ, იმის საპირისპიროდ იქცევიან“, – განაცხადა ვიკა ფილფანმა.

პოლიტიკა • 1764231031

ირაკლი კობახიძე საქართველოში ისრაელის ახლად დანიშნულ ელჩს, ვალიდ აბუ ჰაიას შეხვდა

საქართველოს პრემიერ-მინისტრი ირაკლი კობახიძე საქართველოში ისრაელის სახელმწიფოს ახლად დანიშნულ ელჩს, ვალიდ აბუ ჰაიას შეხვდა.გაცნობითი ხასიათის შეხვედრაზე მთავრობის მეთაურმა ელჩს დიპლომატიური მისიის დაწყება მიულოცა და წარმატებები უსურვა.შეხვედრაზე ხაზი გაესვა საქართველოსა და ისრაელს შორის არსებულ მრავალსაუკუნოვან მეგობრობას და მჭიდრო პარტნიორობას. განიხილეს სხვადასხვა სფეროში ურთიერთობების შემდგომი გაღრმავების შესაძლებლობები. საუბარი შეეხო სავაჭრო-ეკონომიკური კავშირების გაძლიერებასა და ტურიზმის მიმართულებით არსებული თანამშრომლობის მნიშვნელობას.ყურადღება დაეთმო ახლო აღმოსავლეთში არსებულ ვითარებას. მთავრობის მეთაურმა ხაზი გაუსვა ხანგრძლივი მშვიდობისა და სტაბილურობის უზრუნველყოფის მნიშვნელობას.

პოლიტიკა • 1764178080

დავით ქართველიშვილი: არ გამოვრიცხავ, რომ ამ „არაბული დეზინფორმაციის“ გავრცელებაში ზოგი ძალის „ლიდერშიფი“ „პირად ინვესტიციას" იღებს, ზოგიერთი კი, „გულწრფელი გაუნათლებლობის" გამო, ამისთვის უსასყიდლოდ ეკლესიის კათედრას იყენებს

პარტია „ხალხის ძალის“ წევრი დავით ქართველიშვილი „Eagle Hills“-ის ინვესტიციებთან დაკავშირებით პრემიერ-მინისტრის მიერ გაკეთებულ განცხადებებს სოციალურ ქსელში ეხმიანება.„რაც შეეხება „არაბოფობების“ ზოგად ფენომენს — მათი დაწვრილმანება ვიწროპარტიულ ნიშნით „თლა“ მართებული არ იქნებოდა. მათ გაცილებით უფრო მსხვილი ძალები მართავენ. ესენია: „დიპ სტეიტის“ მართული ევრობიუროკრატია, რომელსაც ეკონომიკურად ძლიერი საქართველო არ აწყობს“, - განაცხადა ექსპერტმა და აღნიშნა, რომ პრემიერ-მინისტრმა პარლამენტში, ინტერპელაციის ფარგლებში არგუმენტირებულად უპასუხა „Eagle Hills“-ის ინვესტიციებთან დაკავშირებულ ყველა ფობიას.„დღეს, პარლამენტში, პრემიერ-მინისტრმა, კიდევ ერთხელ, არგუმენტირებული პასუხი გასცა „არაბულ ინვესტიციებზე“ გაჩენილ ყველა ორკესტრირებულ ფობიას, რომლებშიც შეთანხმებულად გაერთიანებულია მემარცხენე და მემარჯვენე პოლიტიკური სპექტრი. დღეს მაღალი ტრიბუნიდან პირველად იქნა ერთხმად წარმოდგენილი ამ ფობიების გამავრცელებლები: „ნაცმოძრაობა“, „ლელო“ და „ალტი-ინფო“.თავის უკბილო შეკითხვაში ქვეყნის პრემიერ-მინისტრის მიმართ, საქართველოს საკანონმდებლო ორგანოში ლეგიტიმურად წარმოდგენილმა, სადეპუტატო მანდატის მფლობელმა, ძებნილი, ემიგრანტი გახარიას წარმომადგენელმა (გიორგი შარაშიძემ) ირაკლი კობახიძეს ვერც მისი ოფიციალური თანამდებობით და ვერც „ბატონო ირაკლის“ სახით მიმართვა ვერ გარისკა აკაცუკების მხრიდან გაროზგვის შიშით და სამგზის მას „ბატონო მომხსენებელო“-თი მიმართა.რაც შეეხება „არაბოფობების“ ზოგად ფენომენს — მათი დაწვრილმანება ვიწროპარტიულ ნიშნით „თლა“ მართებული არ იქნებოდა. მათ გაცილებით უფრო მსხვილი ძალები მართავენ. ესენია: „დიპ სტეიტის“ მართული ევრობიუროკრატია, რომელსაც ეკონომიკურად ძლიერი საქართველო არ აწყობს; და ისინიც, ვინც საკუთარ ქვეყანას განიხილავს მაქსიმუმ რუსეთის ფედერაციის 90-ე რეგიონის პოზიციაზე.ამ კატეგორიებს უკვე „სპიკერების“ სახით წარმოადგენენ ზოგი პოლიტიკოსი იქნება, თუ ზოგი (რაც ყველაზე სამწუხაროა) სასულიერო პირი. მე არც იმას გამოვრიცხავ, რომ ამ „არაბული დეზინფორმაციის“ გავრცელებაში ზოგი ძალის „ლიდერშიფი“ სერიოზულ "პირად ინვესტიციას" იღებს, ზოგიერთი კი, "გულწრფელი გაუნათლებლობის" გამო, ამისთვის უსასყიდლოდ ეკლესიის კათედრას იყენებს. რაც შეეხება ამ ორივე მიმართულების "სამრევლოს" - ირაკლი კობახიძის დღევანდელი ამომწურავი მოხსენების შემდეგ, რომელ ახალ სიგიჟეს გამოიგონებენ, საკითხავი მხოლოდ ესაა...“, - წერს დავით ქართველიშვილი სოციალურ ქსელში

პოლიტიკა • 1764165300

პრემიერი: განათლების რეფორმა ერთ-ერთი უმთავრესი ეროვნული ამოცანაა, უნდა ვაღიაროთ, ამ მიმართულებით ყველაზე ნაკლები გაკეთდა და ეს გვაკისრებს მეტ პასუხისმგებლობას, რომ მაქსიმალურად ვიზრუნოთ უმაღლესი განათლების რეფორმის გატარებაზე

განათლების რეფორმა არის ერთ-ერთი უმთავრესი ეროვნული ამოცანა, უნდა ვაღიაროთ, რომ ეს არის ის მიმართულება, სადაც ყველაზე ნაკლები გაკეთდა გასული 13 წლის განმავლობაში და ეს გვაკისრებს კიდევ უფრო მეტ პასუხისმგებლობას, რომ მაქსიმალურად ვიზრუნოთ უმაღლესი განათლების რეფორმის გატარებაზე, - განაცხადა საქართველოს პრემიერ-მინისტრმა ირაკლი კობახიძემ პარლამენტში, ინტერპელაციის წესით მოსმენისას.როგორც მთავრობის მეთაურმა აღნიშნა, როდესაც არის საკითხები, გამოწვევები, გადაჭრის გზები, მნიშვნელოვანია თითოეული საკითხი სიღრმისეულად განხილვა.„მე მგონია, რომ ისეთივე წარმატებით გავატარებთ ამ რეფორმას, როგორც წარმატებით პირადად მე უზუნველვყავი 7 არჩევნების მოგება, როგორც შტაბის ხელმძღვანელმა. ამიტომ მე ვფიქრობ, რომ ზოგადი განცხადებების ნაცვლად მომავალში მნიშვნელოვანია, სიღრმისეულად ვიმსჯელოთ ხოლმე ყველა თემაზე. როდესაც არის საკითხები, გამოწვევები, გადაჭრის გზები, მნიშვნელოვანია, რომ თითოეული საკითხი სიღრმისეულად განვიხილოთ. ჩვენი მხრიდან მომავალშიც იქნება სრული მზაობა ამისათვის და იმედი მაქვს, რომ შემდეგი ინტერპელაციები, განხილვები, ანგარიშის მოსმენები წარიმართება სწორედ ასეთ ფორმატში. კიდევ ერთხელ გამოვთქვამ რწმენას, რომ განათლების რეფორმა წარმატებით განხორციელდება. მადლობა განათლების მინისტრს ჩვენი ინიციატივის მხარდაჭერისთვის“, - განაცხადა ირაკლი კობახიძემ.

პოლიტიკა • 1764164129

ირაკლი კობახიძე: კონცენტრაცია არის პრობლემა თანაბარი განვითარების კუთხით, ამიტომ დეკონცენტრაცია არის ერთ-ერთი თანმდევი ნაბიჯი, რომელიც უნდა გადაიდგას, რათა ხელი შევუწყოთ რეგიონების თანაბარ განვითარებას

დეკონცენტრაცია არის ერთ-ერთი ნაბიჯი, რომ ხელი შევუწყოთ რეგიონების თანაბარ განვითარებას, პირდაპირ კავშირში ეს განათლების ხარისხთან რა თქმა უნდა, არ არის, - განაცხადა საქართველოს პრემიერ-მინისტრმა ირაკლი კობახიძემ პარლამენტში, ინტერპელაციის წესით მოსმენისას.როგორც მთავრობის მეთაურმა აღნიშნა, როდესაც საქმე ეხება დეკონცენტრაციას, აქ უფრო მეტად საუბარია ქვეყნის წინაშე არსებულ საერთო გამოწვევაზე და არა იმდენად განათლების ხარისხის კუთხით არსებულ გამოწვევაზე.„კონცენტრაცია არის პრობლემა თანაბარი განვითარების კუთხით, ამიტომ რეალურად დეკონცენტრაცია არის ერთ-ერთი თანმდევი ნაბიჯი, რომელიც უნდა გადაიდგას, რომ ხელი შევუწყოთ რეგიონების თანაბარ განვითარებას. პირდაპირ კავშირში ეს განათლების ხარისხთან რა თქმა უნდა, არ არის. აქ მთავარი ამოცანაა ის, რომ ჩვენ ხელი შევუწყოთ რეგიონების თანაბარ განვითარებას. რომ ავიღოთ ქუთაისი, რომელიც ტრადიციულად იყო ინდუსტრიული ქალაქი საბჭოთა პერიოდში, იცით, რომ ქალაქმა თავისი ინდუსტრიული ფუნქცია დაკარგა 90-იან წლებში, საბჭოთა კავშირის დაშლის შემდეგ, ამას მოჰყვა სერიოზული ეკონომიკური, სოციალური პრობლემები, ძალიან დიდი მიგრაცია. მიგრაცია დღესაც გრძელდება. ქუთაისი არის ერთ-ერთი ქალაქი, საიდანაც მიგრაცია მეტია, ვიდრე დაბრუნების მაჩვენებელი. თანდათანობით კლებულობს ქუთაისის მოსახლეობა. ჩვენ ვფიქრობთ, ქუთაისს უნდა შევძინოთ სრულიად ახალი ფუნქცია. საუნივერსიტეტო ქალაქად ქუთაისის გარდაქმნა, არის ერთ-ერთი საუკეთესო გამოსავალი ამ კუთხით. აქედან გამომდინარე, როდესაც საუბარია დეკონცენტრაციაზე, აქ მთავარი მიზანი არის ქვეყნის თანაბარი და რეგიონების თანაბარი სოციალურ-ეკონომიკური განვითარება და არა იმდენად განათლების ხარისხის გაუმჯობესება“, - განაცხადა პრემიერ-მინისტრმა.მისივე თქმით, რაც შეეხება სტუდენტების განაწილებას სპეციალობებისა და რეგიონულ ჭრილში, ამაზე დაახლოებით 2-3 თვეში იქნება კვლევის შედეგები და შრომის ბაზრის ანალიზის საფუძველზე გადანაწილდება სტუდენტებზე ადგილები სხვადასხვა სპეციალობების მიხედვით.„რაც შეეხება რეგიონულ ჭრილში გადანაწილებას, აქაც უხეშად შეგვიძლია ვისაუბროთ, რადგან ნაწილდება ინფრასტრუქტურის განვითარების გეგმა. რეგიონულ უნივერსიტეტებში უნდა გაიზარდოს სტუდენტების რაოდენობა, მაგრამ არა არსებითად. დღეს 85% თბილისი 15%-ია ყველა დანარჩენი, მათ შორის ქუთაისი არის 5% ყველა დანარჩენი არის 10%. დღევანდელი მდგომარეობით, 5 რეგიონული უნივერსიტეტია, ეს არის ბათუმი, გორი, ახალციხე, თელავი, ზუგდიდი, ქუთაისის არ ვთლი, რადგან ცალკე გვაქვს გამოტანილი. ამ ხუთ უნივერსიტეტში შეიძლება, 10%-იანი მაჩვენებლიდან ავიდეთ დაახლოებით 15%-იან მაჩვენებელზე. რაც შეეხება თბილისსა და ქუთაისს შორის სტუდენტების გადანაწილებას, ვფიქრობთ, რომ თბილისი კვლავაც უნდა დარჩეს ძირითად კერად და დაახლოებით პროპორცია უნდა იყოს 2/1-ზე. ეს არის ჩვენი წარმოდგენა. შეიძლება, თბილისში სწავლობდეს 60 ათასი სტუდენტი, ქუთაისში 30 ათასი სტუდენტი, დაახლოებით 15 ათასი სტუდენტი რეგიონებში, ეს არის უხეში დათვლა. დღეს სტუდენტების რაოდენობა არის 150 ათასი და ჯამურად შემცირდება 110 ათასამდე. ვფიქრობთ, რომ ეს იქნება ოპტიმალური გადანაწილება.თბილისშიც და ქუთაისშიც უნდა იყოს უზრუნველყოფილი ყველა სპეციალობის დაფარვა. მაგალითად, ფიზიკის ფაკულტეტი უნდა იყოს თბილისშიც და ქუთაისშიც. არ არის გათვალისწინებული თბილისიდან რომელიმე ფაკულტეტის გადატანა, თბილისმა უნდა დაფაროს ყველა სპეციალობა, ქუთაისმაც უნდა დაფაროს ყველა სპეციალობა. რაც შეეხება რეგიონულ უნივერსიტეტებს, ჩვენი ხედვით, ესენი უნდა იყოს უფრო პროფილური და აქცენტი უნდა იყოს გაკეთებული, აგრარულ, პედაგოგიურ მიმართულებაზე და ა.შ“, - განაცხადა პრემიერ-მინისტრმა.

პოლიტიკა • 1764164033

ირაკლი კობახიძე: იმის გამო, რომ სიჭარბეა სწავლების ხანგრძლივობაში, კადრების მიმართულებით არასწორად არის განსაზღვრული პოლიტიკა, ხელოვნურად ყოფენ საგნებს, ამაზე იხარჯება ჭარბი სახელმწიფო რესურსი

დღეს ერთ-ერთი სერიოზული პრობლემა არის კადრების დეფიციტი და არის მოთხოვნა შრომის ბაზარზე, – ამის შესახებ საქართველოს პრემიერ-მინისტრმა, ირაკლი კობახიძემ პარლამენტში, ინტერპელაციის წესით მოსმენისას განაცხადა.მთავრობის მეთაურის თქმით, არის ძალიან ბევრი სფერო, სადაც მიწოდება ვერ აკმაყოფილებს მოთხოვნას.„ეკონომიკის ზრდასთან ერთად ეს პრობლემა გაიზრდება. ამ ოთხი წლის განმავლობაში გაორმაგდა ჩვენი ეკონომიკა დოლარში და მაგალითად, 2020, 2019, 2018 წელს თუ ბიზნესსექტორი მთავარ პრობლემად ასახელებდა სრულიად სხვა რამეს, მაგალითად წვდომის დეფიციტი ფინანსურ რესურსებზე და ა.შ. დღეს სამეულშია ორი მთავარი პრობლემა – სამუშაო ძალის დეფიციტი და კვალიფიციური კადრების დეფიციტი. არასდროს არ ფიქსირდებოდა 2021 წლამდე ეს პრობლემები ბიზნესსექტორის მიერ გამოვლენილ მთავარ პრობლემებს შორის. ეკონომიკა ვითარდება და რა თქმა უნდა, კიდევ უფრო მეტად განვითარდება შემდეგი წლების განმავლობაში და ბაზარზე მოთხოვნა კიდევ უფრო მეტად გაიზრდება. ჩვენ თუ არ დავაწიეთ ამას განათლების რეფორმა, კიდევ უფრო მეტად იქნება აცდენილი ერთმანეთთან შრომის ბაზრის მოთხოვნები და უმაღლესი განათლების სისტემა. დღესაც არის არაერთი სექტორი, სადაც კომპანიებს უწევთ უცხოელი მუშახელის ჩამოყვანა. რა თქმა უნდა, ჩვენ ინტერესებშია, რომ მაქსიმალურად საქართველოს მოქალაქეებისთვის შეიქმნას სამუშაო ადგილების ჩვენს ქვეყანაში“, – განაცხადა პრემიერმა.როგორც ირაკლი კობახიძემ აღნიშნა, ამისთვის საჭიროა შესაბამისი ადამიანების მომზადება.„ასევე, ჩვენი პროგრამის თანახმად და ეს აბსოლუტურად რეალურია, ვფიქრობთ, რომ შესაძლებელია, უმუშევრობის მაჩვენებელი ჩამოსცდეს 5%-ს რამდენიმე წელიწადში. ასეთ პირობებში, მუდმივად არის საჭირო შრომის ბაზრის შევსება ახალი კადრებით და რაც მეტი იქნება, მით უკეთესი.ამიტომ, ვფიქრობთ, რომ სწავლების ხანგრძლივობის შემცირება ძალიან წაადგება შრომის ბაზარს და შესაბამისად, ეკონომიკის სტიმულირებას. ჩვენ არ გვითქვამს, რომ ხანმოკლე განათლება ნიშნავს უკეთეს განათლებას. მაგალითი შემიძლია მოგიყვანოთ იურიდიული განათლების. სამართალში არის 20-მდე ძირითადი საგანი. ეს 20 საგანი რომ ასწავლო, არის საჭირო, დაახლოებით, ორი წელი, კრედიტების რაოდენობას თუ გავითვალისწინებთ. ორი წელიც არ არის საჭირო იმისათვის, რომ იურისტმა ბაკალავრიატის ეტაპზე გაიაროს ყველა ძირითადი საგანი. შემდეგ რჩება სპეციალიზაცია და არჩევითი საგნები და რჩება საკმარისი დრო იმისათვის, რომ სტუდენტმა გაიაროს 10-ზე მეტი საგანი, არჩევითი, სპეციალიზაციის მიხედვით. თუ ვინმე დამიმტკიცებს, რომ ეს არ არის საკმარისი ბაკალავრიატის დონეზე სათანადო კვალიფიკაციის იურისტის მოსამზადებლად, კი ბატონო, ვიმსჯელოთ, მაგრამ მე შემიძლია დაგარწმუნოთ, რომ თუ სტუდენტი გაივლის 17-18 ძირითად საგანს და ზევიდან დაახლოებით 12 არჩევით საგანს, მომზადებული იქნება კვალიფიციური იურისტი ბაკალავრიატის დონეზე. იგივე ეხება მაგისტრატურასაც. ჩვენ ვსაუბრობთ კონკრეტული არგუმენტებით და ჩაღრმავებით. ზეპირად კი არ გვაქვს განსაზღვრული, რომ 3 ჯობია 4-ს ან 1 ჯობია 2-ს. კონკრეტულად საგნების დონეზე შეგვიძლია დაგისაბუთოთ, თუ რატომ არის სავსებით საკმაირის 3 წელი იმისათვის, რომ მოამზადო მაღალი კვალიფიკაციით იურისტი ბაკალავრი.დღეს რა ხდება, ისევ სამართლის მაგალითს მოვიყვან. იმ მიმართულებაზე, სადაც მე ვასწავლი თსუ-ში, ხელოვნურად არის გაყოფილი საგანი 2 მიზეზის გამო, ერთი, რომ ხელოვნურად ზრდიან პროგრამის მოცულობას, საგნების რაოდენობას და მეორე – კონკრეტულად ჩემს მიმართულებაზე არის 6 სრული პროფესორი, 5 ასოცირებული და 1 ასისტენტ-პროფესორი. ხელოვნურად არის არასწორად გადანაწილებული. წესით უნდა იყოს პირიქით, ნებისმიერი ადამიანი დამიდასტურებს, რომ უნდა იყოს 1 სრული პროფესორი, 2 ან 3 ასოცირებული და 10 ასისტენტ-პროფესორი. მარტივი ციფრებითაც ჩანს, როგორი მახინჯი სისტემაა ჩამოყალიბებული, 6 სრული პროფესორი გვყავს , 5 ასოცირებული და 1 ასისტენტ-პროფესორი. შეგიძლიათ ნახოთ ნებისმიერი განვითარებული ქვეყანა, პირიქით არის, 1 სრული, 2 ასოცირებული, 10 ასისტენტი იქნებოდა იდეალური. იმის გამო, რომ არის სიჭარბე სწავლების ხანგრძლივობაში, კადრების მიმართულებით არასწორად არის განსაზღვრული პოლიტიკა, ხელოვნურად ყოფენ საგნებს, სალექციო ჯგუფებს. ამაზე იხარჯება ჭარბი რესურსი, სახელმწიფოს რესურსი და ა.შ. ეს ხომ უნდა შეიცვალოს. გეუბნებით არგუმენტებით და თუ გაქვთ საპირისპირო არგუმენტები, მაშინ შეგვიძლია თქვენს არგუმენტებზეც ვიმსჯელოთ“, – განაცხადა პრემიერ-მინისტრმა.

პოლიტიკა • 1764163912

ირაკლი კობახიძე: კვალიფიციური კადრების დეფიციტია ყველა მიმართულებით, შესაბამისად, თუ უმაღლესი განათლების რეფორმა არ გატარდა, დავრჩებით იქ, სადაც ვართ

სახელმწიფომ მაქსიმალურად უნდა დააზღვიოს საკუთარი მოქალაქეები, განსაკუთრებით ახალგაზრდები, – ამის შესახებ საქართველოს პრემიერ-მინისტრმა, ირაკლი კობახიძემ პარლამენტში, ინტერპელაციის წესით მოსმენისას განაცხადა.მისივე თქმით, სახელმწიფომ მაქსიმალურად უნდა დააზღვიოს საკუთარი მოქალაქეები, განსაკუთრებით კი ახალგაზრდები.„დეფიციტი არის პრაქტიკულად ყველა მიმართულებით. ერთ-ერთი მთავარი პრობლემა არის ტექნიკური მიმართულებები – მშენებლები, არქიტექტორები, ინჟინრები, გეოლოგები. სახელმწიფოსაც აქვს ეს პრობლემა იმიტომ, რომ სახელმწიფო შესყიდვებს აცხადებს ინფრასტრუქტურულ პროექტებზე და სერიოზული პრობლემებია, მათ შორის, ხარისხის კუთხით, ვინაიდან არ გვყავს კვალიფიციური კადრები ბევრი მიმართულებით, კადრების დეფიციტია ყველა მიმართულებით. შესაბამისად, თუ უმაღლესი განათლების რეფორმა არ გატარდა, დავრჩებით იქ, სადაც ვართ. დღეს, საუბარი იყო იმაზე, რომ პარტიამ უნდა უკარნახოს, თითქოს, ვინ რა უნდა ასწავლოს და როგორ უნდა ასწავლოს. დღეს, პარტია არაფერ შუაში არ არის და არავინ არაფერს არ კარნახობს. შესაბამისად, გვაქვს ის სურათი, რაც გვაქვს. ჭარბად ვუშვებთ იურისტებს და ეკონომისტებს ორმაგი და სამმაგი რაოდენობით, კვლევა ჩატარდა პარლამენტის ეკონომიკურ კომიტეტში – სამმაგი, ოთხმაგი და ხუთმაგი აცდენაა შრომის ბაზრის მოთხოვნებთან.ხუთმაგი აცდენა რომ გაქვს, მაგალითად იურისტების შემთხვევაში, წინასწარ წირავ 80%-ს სტუდენტებისა დაუსაქმებლობისთვის და არავინ კარნახობს არავის. მაგრამ სახელმწიფოს ინტერესი ხომ სახელმწიფომ უნდა უკარნახოს სისტემას და რატომ უნდა გაწიროს სახელმწიფომ იურისტი სტუდენტების 80 % დაუსაქმებლობისთვის თავისი სპეციალობით, თუ შეუძლია, რომ არ გაწიროს. მარტივად არის საქმე. სწორედ, ამისათვის არსებობს ხარისხის მართვის სისტემა, ეს არ არის კარნახი. არსებობს ხარისხის მართვის სისტემა, რომელიც ამოდის, რა თქმა უნდა, ზოგადად უმაღლესი განათლების სისტემის ამოცანებიდან და ამოდის სახელმწიფო ამოცანებიდან, ეს ასე უნდა იყოს ბუნებრივია, ყველა ქვეყანაში ასეა. ყველა ქვეყანა პასუხისმგებლობას იღებს იმაზე, რომ სტუდენტი მიიღებს ხარისხიან განათლებას და სტუდენტი იქნება მაქსიმალურად უზრუნველყოფილი სამუშაო ადგილით, როდესაც დაამთავრებს უნივერსიტეტს. ვფიქრობთ, რომ სახელმწიფომ მაქსიმალურად უნდა დააზღვიოს საკუთარი მოქალაქეები, მით უმეტეს ახალგაზრდები, სტუდენტები, არასწორი მიმართულებით პროცესების განვითარებისგან“, – განაცხადა კობახიძემ.