ცნობილია ხაშურში ტრაგიკულად დაღუპული მამაკაცის ვინაობა

ხაშურის რკინიგზის მემანქანე  სარკინიგზო ტრანსპორტიდან ე.წ ДГК-დან გადმოვარდა და ადგილზე დაიღუპა.

გავრცელებული ინფორმაციით, მემანქანე გაჩერებული ტრანსპორტიდან გადმოვარდა, თავი დაარტყა ლიანდაგს და ადგილზე გარდაიცვალა.

გარდაცვლილი მამაკაცის, ზვიად დევაძის შესახებ რკინიგზა სამძიმრის წერილს აქვეყნებს:  

 "გაცნობებთ, რომ 27 მარტს აღნიშნული პირი თანაშემწესთან ერთად, სამსახურებრივი მოვალეობის შესრულების მიზნით, იმყოფებოდა ხაშურის სალიანდაგო სამმართველოს ტერიტორიაზე.

მოწოდებული ინფორმაციის თანახმად, ზვიად დევაძემ დაასრულა კონკრეტული სამუშაოები და ემზადებოდა ძირითად სამუშაო ადგილას - ბორჯომის რეგიონში დასაბრუნებლად, რა დროსაც იგი გახდა შეუძლოდ და დაკარგა გონება. საქართველოს რკინიგზის თანამშრომლებმა მოახდინეს მყისიერი რეაგირება, გამოიძახეს სამედიცინო პერსონალი და აცნობეს სამართალდამცავ ორგანოებს. საქართველოს რკინიგზა თანაგრძნობას უცხადებს გარდაცვლილის ოჯახს", - აღნიშნულია ინფორმაციაში.