შხაპის მიღება სიბნელეში - ექიმი განმარტავს, კარგია თუ არა ახალი ტენდენცია ძილისთვის

კარგი ამბავია მათთვის, ვინც საღამოს შხაპის მიღებას ამჯობინებს - სიბნელეში შხაპის მიღება დამამშვიდებელია და ძილს ხელს არ შეუშლის. როგორც The Independent იუწყება, სოციალურ მედიაში ახალი ტენდენცია ჩნდება: ადამიანები სიბნელეში შხაპის მიღების გამოცდილებას აზიარებენ.

საღამოს ნათელ აბაზანაში აბაზანის მიღების ნაცვლად, ახალგაზრდებმა საღამოს 5 საათის შემდეგ შხაპის მიღებისას შუქის სრულად გამორთვა დაიწყეს.

„ეს ერთ-ერთი ყველაზე სამკურნალო გამოცდილებაა, რაც კი ოდესმე მქონია. სიბნელეში შხაპის მიღება საშიშად და სახიფათოდ ჟღერს, მაგრამ დამიჯერეთ, სანამ არ გამოცდით, ამას ვერ დააფასებთ“, - ამბობს ერთ-ერთი მომხმარებელი.
 
მან სიმყუდროვისა და კომფორტის შეგრძნება სპა პროცედურებსა და მედიტაციას შეადარა.

გამოცემა ესაუბრა ექიმსა და ძილის მედიცინის კონსულტანტ სპეციალისტს. მან განმარტა, რომ დაძინებამდე თბილი შხაპის ან აბაზანის მიღება ხელს უწყობს ძილის ხარისხის გაუმჯობესებას და დაძინებისთვის საჭირო დროის შემცირებას. მან დასძინა, რომ ეს, სავარაუდოდ, განპირობებულია თბილი შხაპის ზემოქმედებით სხეულის ტემპერატურის დაწევაზე, რაც ძილის დაწყების მთავარი სიგნალია.

„სუსტ შუქზე შხაპის მიღება ასევე ხელს უწყობს ორგანიზმისთვის ძილის დროისთვის სიგნალის მიცემას, რადგან სუსტი შუქი ერთ-ერთი მთავარი ძილის ჰორმონის, მელატონინის გამოყოფის სიგნალია“, - თქვა ექიმმა.

სიბნელეში ან მკრთალი განათების ქვეშ შხაპის მიღება ასევე ხელს უწყობს მოდუნებას გამოცდილებით ტკბობის გზით. ეს განსაკუთრებით მაშინ ხდება, თუ იყენებთ ლავანდის არომატის ეთერზეთებს ან შხაპის გელებს და ჩართავთ დამამშვიდებელ მუსიკას.

უსაფრთხოება მნიშვნელოვანია

დაცემის რისკის აღმოსაფხვრელად მნიშვნელოვანია აბაზანიდან ყველა საშიში ნივთის აღება. ექსპერტები ასევე გვირჩევენ, რომ სრულ სიბნელეში დარჩენის თავიდან ასაცილებლად შუქი მთლიანად არ გამოვრთოთ. აანთეთ სანთელი ან გამოიყენეთ ალტერნატიული, მკრთალი სინათლის წყარო.