სავარაუდოდ, სილამაზის სალონების მომსახურება გაძვირდება - იმპორტიორები ალტერნატიული ბაზრების მოძიების პროცესში არიან

რუსეთ-უკრაინის ომმა საქართველოში, შესაძლოა, რამდენიმე ბიზნესის გაძვირება გამოიწვიოს. ერთ-ერთი არის სალონების მომსახურება. 

საქმე ისაა, რომ სილამაზის სალონები სახარჯი მასალების იმპორტს, ძირითადად, რუსეთიდან და უკრაინიდან ახორციელებდნენ.

როგორც „ბიზნესპარტნიორთან“ სილამაზის სალონებისა და ესთეტიკური ცენტრების ფედერაციის ხელმძღვანელი  თამარ შარაშენიძე ამბნობს, ახლა იმპორტიორები ალტერნატიული ბაზრების მოძიების პროცესში არიან.

მისივე განმარტებით, ქვეყანაში სალონური პროდუქციის მარაგები ჯერ არის და ამ დროისთვის, დეფიციტის რისკი არ დგას.

„ალტერნატიული ქვეყნებიდან პროდუქციის შემოტანა პროდუქციის თვითღირებულებას გააძვირებს, რაც საბოლოო ჯამში, სალონურ მომსახურებზე ფასების ზრდის წინაპირობა გახდება. მაგალითად, ესთეტიკური მედიცინის მიმართულებით თუ პროდუქტი 200 ლარი ღირდა და პროცედურას 300 ლარად აკეთებდნენ, ანალოგიური პროდუქტის ფასი თუ გაიზრდება 250 ლარამდე, პროცედურის ფასიც 50 ლარით გაიზრდება. ევროპელ მწარმოებლებს უკრაინაში ძალიან ბევრი წარმოება ჰქონდათ გადმოტანილი. აღნიშნულ ქვეყანაში პროდუქციის წარმოების ხარჯი ბევრად ნაკლები იყო, ვიდრე ევროპაში,“- აცხადებს შარაშენიძე.