რას წერდა რუსული მედია მოსკოვში მოღვაწე ქართველ მომღერალზე, რომელიც დღეს გარდაიცვალა

მომღერალი ლევან კბილაშვილი მოსკოვში მოღვაწეობდა, ის დღეს ოჯახის წევრებმა, საკუთარ სახლში გარდაცვლილი იპოვეს. მასზე რუსული მედია აქტიურად წერდა, ქართველი არტისტი რუსული საზოგადოების ყურადღების ცენტრში, გარდა მუსიკალური ნიჭისა, ლუბა უსპენსკაიასთან თბილი ურთიერთობის გამო მოხვდა. 

როგორც რუსული მედია წერს, ლევან კბილაშვილი ცნობილი იყო, როგორც უსპენსკაიას ფავორიტი. ადგილობრივი ტაბლოიდები მათ სასიყვარულო ურთიერთობაზეც საუბრობდნენ... 

რუსი ვარსკვლავის ყურადღება ლევან კბილაშვილმა პროექტ "ვოისიდან" მიიპყრო... 

"ლევან კბილაშვილი - მომღერალი, სატელევიზიო შოუ "ვოისის" მეშვიდე სეზონის მონაწილე. ცნობილია ინტერნეტში, როგორც ლუბა უსპენსკაიას პროტეჟე და ფავორიტი. ბიჭი მუსიკალურ სფეროში ვითარდება და მისი შემოქმედებითი კარიერის ახალ სიმაღლეებს იპყრობს.

მოსკოვში, „ვოისის“ მეშვიდე სეზონზე მიწვევა მიიღო და ლევანი რუსეთში ჩავიდა. კასტინგის გავლის შემდეგ მან შეძლო „ბრმა აუდიენციის“ სცენაზე მოხვედრა. ლევანმა აღნიშნა, რომ მენტორების წინაშე ქართული სიმღერების „პატარა გოგოსა“ და „ტურფას“ შესრულებისას განსაკუთრებული მღელვარება და პასუხისმგებლობა იგრძნო, რადგან მათ შორის იყო მისი თანამემამულეც კონსტანტინე მელაძე.

ლევანი ნაკრებში გადავიდა და სიმღერა Очарована, околдована შეასრულა, მაგრამ მან ვერ შეძლო ჟიურიზე შთაბეჭდილების მოხდენა.

კბილაშვილი სახლში წასასვლელად მზად იყო, მაგრამ შოუში მონაწილეობამ შედეგი გამოიღო - მისმა მენტორმა კონსტანტინე მელაძემ მომღერალი შემდგომი თანამშრომლობისთვის მიიწვია. უფრო მეტიც, ლუბა უსპენსკაიამ ლევანის მხარდასაჭერად საუბარი წამოიწყო. უსპენსკაიამ კბილაშვილი პროექტში გაიცნო და უკრაინაში ერთობლივ ტურნეზე მიიწვია. მაშინ, უსპენსკაიამ დაადასტურა, რომ მზად იყო, კბილაშვილს პოტენციალის რეალიზებაში დახმარებოდა.

თანამშრომლობამ ლევანისა და ლუბას დაახლოებას ხელი შეუწყო და მედიაში პარტნიორების რომანტიკული ურთიერთობის შესახებ ინფორმაციის გავრცელებაც გამოიწვია, ის სპორტული აღნაგობით საპირისპირო სქესის ყურადღებას იპყრობდა. თაყვანისმცემლების სიმრავლე მომღერალს ახარებდა, მაგრამ პირად ცხოვრებაზე არასდროს საუბრობდა.

"ლევან კბილაშვილი 1991 წლის 12 ივნისს თბილისში დაიბადა. ზოდიაქოს ნიშნის მიხედვით ბიჭი ტყუპია, ეროვნებით კი ქართველი. ლევანის თქმით, მისი ახლობლები ადრე მცხეთა-მთიანეთში ცხოვრობდნენ. დედმამიშვილები სამნი არიან.

მშობლები  სამართლის სფეროში მოღვაწეობენ, ამიტომ უფროსმა ძმამ გადაწყვიტა, მშობლების კვალს გაყოლოდა. ლევანიც სკოლის დამთავრების შემდეგ სამართლის მიმართულებით წავიდა. მომღერლის ასევე ჰყავს და, რომელიც მასწავლებელია. 

ახალგაზრდას ადრეული ასაკიდანვე მამის გამო ძიუდო უყვარდა, რომელიც სპორტის ოსტატის წოდებას ატარებდა. ლევანის გეგმები ამ სფეროში წარმატების მიღწევა იყო, ამიტომ მან ამ მიზნისთვის ბევრი იშრომა და დიდი დრო დაუთმო. ძიუდოში 2004 წელს მიღებული ტრავმის გამო ვარჯიში შეწყვიტა. მის შემდეგ ლევანი დიდხანს ცდილობდა ფორმაში ჩადგომას, მაგრამ სპორტული კარიერა აღარ გაუგრძელებია. 

გრიგოლ რობაქიძის სახელობის უნივერსიტეტში განათლების მიღებისას ლევან კბილაშვილი ნებაყოფლობით წავიდა ჯარში. შემდეგ, გარკვეული დრო დაუთმო სპეციალობით მუშაობას, მაგრამ მალევე მუსიკისადმი ძველი გატაცება გაიხსენა.

მუსიკა კბილაშვილს ადრეული ასაკიდანვე იტაცებდა. უკვე ოთხი წლის ასაკში ის აქტიურად იყო დაინტერესებული სიმღერით და ამ მხრივ, წარმატებას მიაღწია. გარკვეული პერიოდი ლევანი რობერტ ბარძიმაშვილთან სწავლობდა, ვოკალის მიმართულებით აქტიური განვითარების მიუხედავად, მისთვის მუსიკა ჰობის დონეზე დარჩა.

უნივერსიტეტში სწავლის პერიოდში, კბილაშვილმა მონაწილეობა მრავალ კონკურსში  მიიღო. ასევე 2011 წელს, ლევანი "ჯეოსტარის" ფინალისტი იყო, ამის წყალობითაც მან საქართველოში დიდი პოპულარობა მოიპოვა." - წერდა გამოცემა.