დღეს საქართველოში იუნკერთა ხსოვნის დღე აღინიშნება. ამ დღეს, პატივს მიაგებენ 1921 წლის 23 თებერვალს საბჭოთა რუსეთის წითელი არმიის წინააღმდეგ კოჯორ-ტაბახმელასთან გამართულ ბრძოლაში დაღუპულ ახალგაზრდა იუნკერებს.

„ამ ახალგაზრდებმა ძალიან დიდი საქმე გააკეთეს, წავიდნენ და თავი გაწირეს სამშობლოსთვის. ძალიან ვაჟკაცურად იბრძოდნენ და პირველი დიდი ბრძოლა მოიგეს კიდეც, მაგრამ შემდგომ მოსული დამპყრობლების სიმრავლით და ასევე იარაღითაც ისინი უფრო კარგად იყვნენ აღჭურვილნი, იუნკერები დამარცხდნენ, მათი უდიდესი ნაწილი დაიღუპა ბრძოლის ველზე” – ამბობს ისტორიკოსი მარიკა ლორთქიფანიძე იუნკერებზე, რომლებმაც 1921 წელს რუსეთის წითელ არმიასთან ბრძოლაში თავი გამოიჩინეს.

იუნკერთა პატივსაცემად, 2010 წელს, საქართველოს პარლამენტის ერთხმად მიღებული დადგენილებით, 23 თებერვალს საქართველოში იუნკერთა ხსოვნის დღე აღინიშნება.