ნიუ-იორკში საქართველოს გენერალური საკონსულოს ორგანიზებით, დამოუკიდებლობის დღესთან დაკავშირებით, Bowling Green Park-ში საქართველოს დროშის აღმართვის ცერემონია გაიმართა

ნიუ-იორკში საქართველოს გენერალური საკონსულოს ორგანიზებით, საქართველოს დამოუკიდებლობის დღესთან დაკავშირებით, ისტორიულ "Bowling Green Park"-ში საქართველოს დროშის აღმართვის ცერემონია გაიმართა.

ღონისძიებაზე დამსწრე საზოგადოებას სიტყვით მიმართეს ნიუ-იორკში საქართველოს გენერალურმა კონსულმა, მაია ბართაიამ და ნიუ-იორკის ქუინსის რაიონის პრეზიდენტის ოფისის სამთავრობათაშორისო საქმეთა და სამოქალაქო ჩართულობის დირექტორმა, ტიმოთი ჩუბინიძემ.

საქართველოს დამოუკიდებლობის დღის აღსანიშნავად, ტიმოთი ჩუბინიძემ მაია ბართაიას საზეიმოდ გადასცა ნიუ-იორკის ქუინსის რაიონის პრეზიდენტის, დონოვან რიჩარდის, პროკლამაცია.

დროშის აღმართვის ცერემონიაზე შესრულდა საქართველოსა და ამერიკის შეერთებული შტატების სახელმწიფო ჰიმნები პოლიფონიური ანსამბლ "შვიდკაცას" მიერ. ღონისძიების ფარგლებში ასევე წარმოდგენილი იყო ქართული ტრადიციული ცეკვები და სიმღერები ნიუ-იორკში მოქმედი ქართული კულტურის ცენტრების მონაწილეობით.