„მაგთიკომის“ 300-მდე თანამშრომელი გაიფიცა - როგორია კომპანიის პოზიცია

„მაგთიკომის“ 300-მდე თანამშრომელი, ინჟინერ-ტექნიკოსები ხელფასის გაზრდას ითხოვენ. ისინი ამ დროისთვის „მაგთიკომის“ სათავო ოფისთან არიან შეკრებილები.

ისინი სამუშაოს შესრულებაზე უარს აცხადებენ. შედეგად, „მაგთიკომის“ აბონენტებისთვის ტექნიკური სერვისის მიღება მეორე დღეა, მიუწვდომელია.

კომპანია საპროტესტო აქციას სპეციალური განცხადებით ეხმაურება:

„მაგთიკომის თანამშრომლების გარკვეული ჯგუფი ითხოვს სამუშაო პირობების გადახედვას. მაქსიმალურად ვცდილობთ სიტუაციის განმუხტვას გონივრულობის ფარგლებში. მნიშვნელოვანია, რომ როდესაც კოვიდპანდემია დაიწყო, „მაგთიკომში“ ხელფასები მინიმუმ 10%-ით გაიზარდა და ეს შეეხო უკლებლივ ყველა თანამშრომელს. რეგიონის ინჟინერ-ტექნიკოსებს კი, ხელფასები გაეზარდათ 23%-ით.

„მაგთიკომში“ გარკვეულ ჯგუფებზე მოქმედებს საბონუსე სისტემა. ბონუსები მიიღეს იმ თანამშრომლებმაც, რომლებიც დღეს სამუშაო პირობების გადახედვას ითხოვენ. კოვიდპანდემიის პერიოდში კონკრეტულად ინჟინერ-ტექნიკოსების ჯგუფებზე „მაგთიკომის“ მიერ გაცემულმა ბონუსმა თითქმის 3 მილიონი ლარი შეადგინა.

აქვე გვინდა აღვნიშნოთ, რომ „მაგთიკომის“ ოპერირების ისტორიაში არ ყოფილა არცერთი პრეცედენტი იმისა, რომ თანამშრომელს ხელფასი დანიშნულ დღეს არ მიეღოს. „მაგთიკომი“ გადადგამს შესაბამის სამართლებრივ ნაბიჯებს სიტუაციის სამართლებრივ ჩარჩოებში დასაბრუნებლად”, - ნათქვამია კომპანიის განცხადებაში.