კონკრეტულ ლოკაციებზე, სადაც გარკვეული მინიშნებებია აღმოჩენილი, ფრაგმენტები და ასე შემდეგ, ჩვენი მეხანძრე-მაშველები პირადი დაცვის აღჭურვილობით მუშაობენ - მღებრიშვილი

საგანგებო სიტუაციების მართვის სამსახურის უფროსის თემურ მღებრიშვილის განცხადებით, შოვში მომხდარი სტიქიის ზონაში არსებობს დაავადებების რისკი, რის გამოც მეხანძრე-მაშველები პირადი დაცვის აღჭურვილობით მუშაობენ. როგორც მღებრიშვილმა დღევანდელ პრესკონფერენციაზე აღნიშნა, ეს მსგავს სიტუაციებში გამოწვევა არის.

„ეს არის ჩვეულებრივი გამოწვევა მსგავს სიტუაციებში და არ არის ახალი. შესაბამისად, უსაფრთხოების ყველანაირ ზომებს ვიღებთ, რომ თუკი მსგავსი დაფიქსირდება, ამისთვის მზად ვიყოთ და ასევე, დაცულები. კონკრეტულ ლოკაციებზე, სადაც გარკვეული მინიშნებებია აღმოჩენილი, ფრაგმენტები და ასე შემდეგ, ჩვენი მეხანძრე-მაშველები პირადი დაცვის აღჭურვილობით მუშაობენ“,- განაცხადა მღებრიშვილმა.

კითხვაზე, გამორიცხავს თუ არა იმას, რომ შესაძლოა, ტურისტები ყოფილიყვნენ ადგილზე, რომელთა დაკარგვის შესახებაც ჯერ ინფორმაცია არ არსებობს, თემურ მღებრიშვილმა განმარტა, რომ ვერაფერს გამორიცხავს.

„რა თქმა უნდა, თეორიის დონეზე ვერაფერს გამოვრიცხავ და ვერც გადაჭრით ვიტყვი. თუმცა, გონივრული ვადა, ერთი კვირა ჩემი სუბიექტური მოსაზრებით საკმარისი დროა იმისთვის, რომ ადამიანმა მისი ახლობელი, ოჯახის წევრი მინიმუმ უნდა მოიკითხოს ლოგიკურად. თუმცა, დღეის მონაცემებით, დაკარგულების რიცხვი არ გაზრდილა და თუკი მსგავსი ინფორმაცია შემოვა, რა თქმა უნდა, ოპერატიულად გადამოწმდება და დადგინდება“,-განაცხადა მღებრიშვილმა.