Johnson & Johnson-ის პუდრას საკვერცხის კიბოსთან აკავშირებენ - კომპანია მილიარდობით დოლარის გადახდაზე დათანხმდა

ამერიკულმა ფარმაცევტულმა გიგანტმა Johnson & Johnson-მა განაცხადა, რომ აშშ-ში ტალკის შემცველ საბავშვო პუდრასთან დაკავშირებული ათიათასობით სასამართლო სარჩელის მოსაგვარებლად 5,5 მილიარდ დოლარამდე თანხის გადახდაზე დათანხმდა.

საქმე დაახლოებით 76 000 სარჩელს მოიცავს. მოსარჩელეები ამტკიცებენ, რომ კომპანიის მიერ წარმოებული ტალკის შემცველი საბავშვო პუდრისა და სხვა მსგავსი პროდუქციის ხანგრძლივმა გამოყენებამ მათში საკვერცხის კიბო, მეზოთელიომა და სხვა მძიმე დაავადებები გამოიწვია.

ბრალდებების მიხედვით, ტალკი, რომელიც პროდუქციის წარმოებაში გამოიყენებოდა, შესაძლოა აზბესტით ყოფილიყო დაბინძურებული. აზბესტი ცნობილია, როგორც კანცეროგენული ნივთიერება, რომლის ზემოქმედება სხვადასხვა ტიპის ონკოლოგიური დაავადების განვითარების რისკს მნიშვნელოვნად ზრდის.

თუმცა Johnson & Johnson ყველა ბრალდებას უარყოფს. კომპანიის სასამართლო დავების მიმართულების ვიცე-პრეზიდენტმა, ერიკ ჰაასმა, განაცხადა, რომ სარჩელები უსაფუძვლოა და კომპანიას საკუთარი პროდუქციის უსაფრთხოებაში სრული დარწმუნება აქვს.

მისი თქმით, შეთანხმებაზე წასვლა ბრალდებების აღიარებას არ ნიშნავს.

„გვჯერა, რომ სასამართლო პროცესებში საბოლოოდ გავიმარჯვებთ, თუმცა ეს შეთანხმება საშუალებას მოგვცემს, მრავალწლიანი სამართლებრივი დავა დავასრულოთ და რესურსები ახალი მედიკამენტებისა და სამედიცინო ტექნოლოგიების განვითარებაზე მივმართოთ,“ – განაცხადა ჰაასმა.

კომპანიის ინფორმაციით, შეთანხმების ფარგლებში დაახლოებით 3 მილიარდი დოლარი მომავალი წლის განმავლობაში გადაიხდება, ხოლო დარჩენილი თანხა ეტაპობრივად, 2028 წლამდე დაიფარება.

მრავალწლიანი დავა

ტალკის შემცველ პროდუქტებთან დაკავშირებული სამართლებრივი დავები 2009 წელს დაიწყო და მას შემდეგ Johnson & Johnson-ის წინააღმდეგ ათიათასობით სარჩელი შევიდა.

მოსარჩელეები ამტკიცებენ, რომ კომპანია წლების განმავლობაში მომხმარებლებს არ აფრთხილებდა პროდუქციის შესაძლო საფრთხეების შესახებ, მიუხედავად იმისა, რომ, მათი მტკიცებით, არსებობდა ინფორმაცია ტალკში აზბესტის შესაძლო არსებობის თაობაზე.

სარჩელების მნიშვნელოვანი ნაწილი ქალებს ეკუთვნით, რომლებიც აცხადებენ, რომ ინტიმური ჰიგიენის მიზნით ტალკის შემცველი საბავშვო პუდრის ხანგრძლივმა გამოყენებამ მათში საკვერცხის კიბო გამოიწვია. კიდევ ერთი ნაწილი კი მეზოთელიომის შემთხვევებს უკავშირდება — ეს იშვიათი, თუმცა აგრესიული ონკოლოგიური დაავადებაა, რომელიც უმეტესად სწორედ აზბესტის ზემოქმედებასთან ასოცირდება.

კომპანია კი ამ დრომდე ამტკიცებს, რომ მრავალწლიანი სამეცნიერო კვლევები მის პროდუქტებში ტალკსა და კიბოს შორის მიზეზ-შედეგობრივ კავშირს არ ადასტურებს.

წარმოება 129-წლიანი ისტორიის შემდეგ შეწყდა

მიუხედავად იმისა, რომ კომპანია ბრალდებებს არ ეთანხმება, 2023 წელს მან კომერციული გადაწყვეტილების საფუძველზე მსოფლიო ბაზარზე ტალკის შემცველი საბავშვო პუდრის წარმოება შეწყვიტა.

აღნიშნული პროდუქტი 1894 წლიდან იწარმოებოდა და ათწლეულების განმავლობაში Johnson & Johnson-ის ერთ-ერთ ყველაზე ცნობილ პროდუქტად მიიჩნეოდა.

მის ნაცვლად კომპანიამ ბაზარზე სიმინდის სახამებლის საფუძველზე დამზადებული საბავშვო პუდრა გამოუშვა, რომელიც, კომპანიის განცხადებით, მომხმარებლებისთვის უსაფრთხო ალტერნატივას წარმოადგენს.

შეთანხმება საბოლოო წერტილი ჯერ არ არის
მიუხედავად მიღწეული შეთანხმებისა, იურიდიული პროცესი ჯერ სრულად დასრულებული არ არის. შეთანხმება სასამართლოს მიერ დამტკიცებას საჭიროებს და მისი განხორციელება შესაბამის სამართლებრივ პროცედურებზეა დამოკიდებული.

საქმე ბოლო წლების განმავლობაში ერთ-ერთ ყველაზე მასშტაბურ კორპორაციულ სამართლებრივ დავად მიიჩნევა. ექსპერტების შეფასებით, მისი შედეგები გავლენას მოახდენს არა მხოლოდ Johnson & Johnson-ზე, არამედ მთლიანად ფარმაცევტულ და კოსმეტიკურ ინდუსტრიაზე, განსაკუთრებით იმ კომპანიებზე, რომლებიც ტალკის შემცველ პროდუქტებს აწარმოებენ.