გაფრთხილება მძღოლებს - რიკოთის ნაცვლად, მოძრაობა გომი-საჩხერე-ჭიათურის გზით ხორციელდება

რიკოთის ნაცვლად მოძრაობა გომი-საჩხერე-ჭიათურის გზით განხორციელდება, - ამის შესახებ ინფორმაცია საავტომობილო გზების დეპარტამენტმა ინფორმაცია დილით გაავრცელა.

მათივე ინფორმაციით, თბილისი–სენაკი–ლესელიძის საავტომობილო გზის (149-ე კმ) მონაკვეთზე, არსებული გზის სიახლოვეს მეწყრული პროცესების განვითარების საშიშროების გამო, ავტოტრანსპორტის მოძრაობა დროებით იკრძალება.

„საერთაშორისო მნიშვნელობის თბილისი–სენაკი–ლესელიძის საავტომობილო გზის (149-ე კმ) მონაკვეთზე, არსებული გზის სიახლოვეს მეწყრული პროცესების განვითარების საშიშროების გამო, საავტომობილო გზის კმ114-კმ194 მონაკვეთზე (ახალსოფლის სატრანსპორტო კვანძი-ზესტაფონი) ყველა სახის ავტოტრანსპორტის მოძრაობა დროებით იკრძალება.

მსუბუქი ავტოტრანსპორტი დროებით იმოძრავებს შიდასახელმწიფოებრივი მნიშვნელობის გომი-საჩხერე-ჭიათურა-ზესტაფონის საავტომობილო გზის გავლით, ხოლო მისაბმელიანი და ნახევრად მისაბმელიანი ავტოტრანსპორტის მოძრაობა დროებით იკრძალება“, - ნათქვამია გავრცელებულ ინფორმაციაში.

როგორც ადგილიდან იტყობინებიან, მოძრაობა გომი-საჩხერე-ჭიათურის გზაზე გადატვირთულია.