Facebook-ჯგუფში „ქართული ოცნების" დეპუტატების ნომრები გაასაჯაროვეს

Facebook-ის ერთ-ერთ ჯგუფში მოძრაობა "სირცხვილიას" წარმომადგენლები ასაჯაროებენ "ქართული ოცნების" დეპუტატების პირად სატელეფონო ნომრებს.

"ტვ1-ის დამფუძნებელზე, ვატო წერეთელზე თავდამსხმელი დეპუტატები" - ამ ტექსტით ვრცელდება პარლამენტის წევრების ნომრები, საუბარია ანრი ოხანაშვილის, ირაკლი ზარქუას, ბექა ოდიშარიას და ლევან მგალობლიშვილის სატელეფონო ნომრებზე.

დეპუტატებს ჯგუფის წევრები სავარაუდოდ ორგანიზებულად უკავშირდებიან აშშ-ს საელჩოში მომხდარი ინციდენტის შემდეგ. ცნობისთვის: შეერთებული შტატების საელჩოში მიმდინარე საზეიმო მიღებაზე დაპირისპირება მოხდა "ქართული ოცნების" დეპუტატებსა და "ტვ პირველის" დამფუძნებელს შორის.

ანრი ოხანაშვილის თქმით, მას ვატო წერეთელმა სიტყვიერი შეურაცხყოფა მიაყენა და მძიმე პროვოკაცია მოუწყო. თავად წერეთელი ამბობს, რომ მას ფიზიკურად გაუსწორდნენ დეპუტატები.