ექსპერტები გვირჩევენ, თუ როგორ გავუმკლავდეთ ვირუსებს შემოდგომაზე

შემოდგომის დადგომასთან ერთად ბევრი ადამიანი ამჩნევს, რომ უფრო ხშირად ცივდება, ეწყება სურდო, ყელის ტკივილი ან ხველა. განსაკუთრებით აქტუალური ხდება ეს საკითხი ბავშვებში, რომლებიც სკოლასა და ბაღში დაბრუნების შემდეგ სხვადასხვა რესპირატორულ ინფექციასთან უფრო ხშირად კონტაქტობენ.

თუმცა, სპეციალისტების შეფასებით, „იმუნიტეტის გაძლიერება“ მხოლოდ ერთი კონკრეტული პროდუქტის, ვიტამინის ან დანამატის მიღებას არ ნიშნავს. ორგანიზმის თავდაცვითი სისტემის ნორმალური მუშაობისთვის მნიშვნელოვანია ყოველდღიური ჩვევების ერთობლიობა.

პირველ რიგში - ძილი. არასაკმარისი და არარეგულარული ძილი ორგანიზმის აღდგენას უშლის ხელს, ამიტომ როგორც ბავშვებისთვის, ისე უფროსებისთვის მნიშვნელოვანია ასაკის შესაბამისი ძილის რეჟიმის დაცვა.

მეორე მნიშვნელოვანი ფაქტორი კვებაა. რაციონი უნდა იყოს მრავალფეროვანი და მოიცავდეს ბოსტნეულს, ხილს, ცილოვან საკვებს, მარცვლეულსა და სხვა საჭირო საკვებ ნივთიერებებს. მხოლოდ ერთი კონკრეტული პროდუქტი იმუნიტეტს „ვერ გააძლიერებს“.

არანაკლებ მნიშვნელოვანია ფიზიკური აქტივობა და სუფთა ჰაერზე ყოფნა. რეგულარული მოძრაობა ორგანიზმის საერთო ჯანმრთელობას უწყობს ხელს.

ასევე მნიშვნელოვანია ხელების ხშირი დაბანა და ავადმყოფ ადამიანებთან ახლო კონტაქტის შემცირება, განსაკუთრებით მაშინ, როცა სეზონური რესპირატორული ინფექციების გავრცელება იზრდება.

რაც შეეხება ვიტამინებსა და საკვებ დანამატებს  მათი თვითნებურად მიღება ყოველთვის საჭირო არ არის. კონკრეტული დეფიციტის შემთხვევაში შესაბამისი დანამატის შერჩევა ექიმთან კონსულტაციის შემდეგ არის რეკომენდებული.

ექსპერტები ასევე გვირჩევენ, რომ ორგანიზმის „გაძლიერების“ მიზნით არ მივმართოთ სასწაულებრივ მეთოდებს - ჯანსაღი კვება, საკმარისი ძილი, ფიზიკური აქტივობა, ჰიგიენა და ვაქცინაცია ინფექციების პრევენციის ბევრად უფრო მნიშვნელოვანი ნაწილია.