„ეკლესიასთან ფრთხილად იყვნენ და ზედმეტი არაფერი გააკეთონ...“ - დავა ლაფტარის ტაძრის მიმდებარე მიწების გამო გრძელდება

რატომ ვერ იყოფს ცაგერის, ლენტეხისა და ზემო სვანეთის მოსახლეობა ლატფარის ტაძრის მიმდებარე ტერიტორიას - ადგილობრივი ეპარქიები ერთობლივ განცხადებას ავრცელებენ და დავის მოგვარების მიზნით, სამხარეო ადმინისტრაციას თხოვნით მიმართავენ შეიქმნას სპეციალური კომისია, რომელიც რაიონების ადმინისტრაციულ საზღვრებს ზუსტად გამიჯნავს.

როგორც გავრცელებულ ინფორმაციაშია ნათქვამი, აღნიშნული ეპარქიების მოსახლეობის გარკვეულ ნაწილს შორის, წარმოქმნილი უთანხმოება სადავო საკითხში ეკლესიის ჩართვის მცდელობას იწვევს. წერილის ავტორები, მიტროპოლიტები ილარიონი და სტეფანე არიან.

„როგორ შეიძლება ეკლესია რამე მოთხოვნა ჰქონდეს, რაღაც კერძო დავაში. არაფერი მოთხოვნა ჩვენ არ გვაქვს, უბრალოდ მშვიდობისკენ მოვუწოდეთ. იქ, ვისაც ჰქონდა სადავო იმათ ვუთხარით, რომ ეკლესიასთან მიმართებაში ფრთხილად იყვნენ და ზედმეტი არაფერი გააკეთონ. მოვუწოდებთ ხელისუფლებას, ეს საკითხი ჩვენი გადასაწყვეტი არ არის. არის დავა და ეს დავა სახელმწიფომ უნდა გადაწყვიტოს. ჩვენ არ გვაქვს პრობლემა, თუ ზემო სვანეთის იურისდიქციაში გადავა ეს მიწები, ტაძარიც თავისთავად იმ იურისდიქციაში გადავა, ჩვენ ერთმანეთში არ გაქვს პრობლემა“, - აცხადებს ჭყონდიდის, ცაგერისა და ლენტეხის მიტროპოლიტი სტეფანე კალაიჯიშვილი.