ახალგაზრდა მღვდლის ემოციური წერილი ახალშობილ ქალიშვილს - როდესაც კეკლუცობას და გაპრანჭვას დაიწყებ გახსოვდეს...

მამა თეიმურაზ ქორიძემ თავის ახალშობილ ქალიშვილს ორი წლის წინ ემოციური წერილი მიუძღვნა. მამაშვილურ, სიყვარულით გაჟღენთილ სიტყვებს დრო ვერას აკლებს. ამიტომაც გადავწყვიტეთ თქვენთვის კიდევ ერთხელ გაგვეზიარებინა.

„გიყურებ ერთ ციცქნა გოგონას და გული განუზომელი სიყვარულით და მადლიერებით მევსება.
გაღიმებული დაიბადე. წრფელი და უანგარო ღიმილი გინათებდა პატარა სახეს და გთხოვ, მუდამ ასეთად დარჩი.

როდესაც კეკლუცობას და გაპრანჭვას დაიწყებ გახსოვდეს, რომ სამყაროში ყველაზე ძვირფასი სამკაული - ღირსებაა და ნეტა იცოდე, როგორ შვენის და უხდება ეს სამკაული ადამიანს.

შენ მოხვედი სამყაროში, სადაც უმეტესად ხელს არ აწვდიან დაცემულს - არამედ ხელს იშვერენ მისკენ. გთხოვ, არასოდეს შეხვდე გულგრილად სხვის დაცემას, გაუშვირე დაცემულს ხელი და გულში ჩაიკარი. არ უთხრა საყვედური - გაიქცევა. უბრალოდ ჩაეხუტე და გაათბე, დანარჩენს თვითონ მიხვდება.

გთხოვ, იყავი გულწრფელი. გულწრფელი ყველაფერში. ეს ფარია, რომელიც ფარისევლობისგან დაგიცავს.

შეიყვარე - ოღონდ გემუდარები უმიზეზოდ!

მინდა ღმერთზე გესაუბრო, მოსიყვარულე და მზრუნველ ღმერთზე, მაგრამ თუ გულწრფელი იქნები, მაშინ შენ გულში თავად იხილავ მას და მერე ვისაუბროთ...

მაპატიე. აკი, გითხარი ამ სამყაროში ხელს ხშირად იშვერენ - თქო. ხოდა, შენსკენაც გაიშვერენ ხელს, რადგან მღვდლის ოჯახში დაიბადე და ამის გამო ხშირად გამადიდებელი შუშით დაგიწყებენ ყურებას. ამან არ დაგაბნიოს და შეგაშინოს. იყავი ის, ვინც ხარ. შენ, შენი ცხოვრება გაქვს, შენი თავისუფალი ნება, რომელიც იმ მოსიყვარულე ღმერთმა გარგუნა ახლა შენს პატარა გულში რომ ფეთქავს.

ჩვენ ბედნიერებისთვის შევიქმენით. ასე, რომ იბრძოლე ბედნიერებისთვის. მე ვერაფერს შეგპირდები, შეიძლება არაფერი დაგრჩეს ჩემგან. მაგრამ ერთს კი, გპირდები - მთელი ცხოვრების მანძილზე ვეცდები, რომ ღირსება დაგიტოვო, როგორც უძვირფასესი ძღვენი და უმთავრესი ქონება შენი მამიკოსაგან. მადლობა! მიყვარხარ - უმიზეზოდ! აბა, შენ იცი...“ - წერს მამა თეიმურაზ ქორიძე.