VIDEO: ემოციური კადრები სასამართლოდან. მძევალი პოლიციელი ესებუას წინააღმდეგ - გალდავამ ემოციები ვერ შეიკავა

მთავარი მოწმე გამოიკითხა ბადრი ესებუას სასამართლო სხდომაზე. ავთანდილ გალდავა ბანკზე თავდასხმის დროს სამეგრელო-ზემო სვანეთის სამხარეო პოლიციის უფროსის თანამდებობას იკავებდა.

სამეგრელო-ზემო სვანეთის სამხარეო პოლიციის ყოფილი უფროსი დარწმუნებულია, რომ დღეს სწორედ ძველ ნაცნობს შეხვდა. ავთანდილ გალდავამ პროცესზე ბადრი ესებუასთან გატარებული რამდენიმე საათი დეტალურად გაიხსენა.

ბრალდებულის სკამზე დაჯდა, თუმცა ბადრი ესებუა დანაშაულს ამ დრომდე არ აღიარებს და ბანკში შეჭრის ფაქტს უარყოფს. დამტკიცებისთვის ერთ-ერთი მთავარი პროცედურა ამოცნობაა. ავთანდილ გალდავას ჩვენება ამ მხრივაც განსაკუთრებით მნიშვნელოვანია, რადგან მას რამდენიმე საათის განმავლობაში თავდამსხმელთან პირადი კომუნიკაცია ჰქონდა.

პროცესზე სამეგრელოს სამხარეო პოლიციის ყოფილმა უფროსმა დეტალურად აღწერა ყველა გარემოება ოპერაციის პირველიდან ბოლო წუთის ჩათვლით. მოლაპარაკებები, ბანკში შესვლა, იქიდან თავდამსხმელთან ერთად გამოსვლა და მძევლების ჩანაცვლება. მათ შორის გაიხსენა ფულის გადაცემის ეპიზოდი.

იყო ეპიზოდები, რომელთა გახსენებისას ავთანდილ გალდავამ ემოციების გაკონტროლება ვერ შეძლო.

პოლიციის მაღალჩინოსნის ჩვენებას ბადრი ესებუა ყურადღებით უსმენდა, თუმცა არცერთი აღწერილი გარემოების შესახებ რეპლიკა არ ქონია. ის მხოლოდ გალდავას ემოციურ რეაქციებს გამოეხმაურა.