ბათუმში გარდაცვლილი 42 წლის ქალის საქმის დეტალები - ბრალდებულმა მამაკაცმა მას კაფეში ფიზიკური შეურაცხყოფა მიაყენა, მოგვიანებით კი ქალი გარდაცვლილი იპოვეს

ბათუმში გარდაცვლილი 42 წლის ქალი გორის რაიონის სოფელ ახალსოფელში, საკუთარ სახლშია გადასვენებული. ახალგაზრდა ქალის გარდაცვალების ფაქტზე, შინაგან საქმეთა სამინისტროში გამოძიება განზრახ მკვლელობის და ძალადობის მუხლებით მიმდინარეობს.

,,გარდაცვლილი ნახეს სასტუმროში. როცა გადმოასვენეს, მე თვითონ ჩავაცვი. დალურჯებები აქვს მთელ ტანზე, ნაჩქმეტი, ნაგლეჯი ყველაფერი. აბსოლუტურად ყველა ვამბობთ, რომ არის მოკლული," - ამბობს ოჯახის ახლობელი.

გენერალური პროკურატურის მიერ გავრცელებული განცხადებით, სისხლის სამართლის ამ საქმეზე დაკავებულია ერთი პირი, რომელსაც ბრალდება ძალადობის მუხლით აქვს წარდგენილი.

გამოძიებით დადგინდა, რომ 26 იანვარს, ბათუმში, მდებარე ერთ-ერთ კაფე-ბარში, ურთიერთშელაპარაკების ნიადაგზე კონფლიქტის დროს, ბრალდებულმა თანმხლებ ქალს ფიზიკური შეურაცხყოფა მიაყენა.

დადგენილია, რომ ძალადობის შემდგომ, დაზარალებული ქალი და ბრალდებული ერთად წავიდნენ სასტუმროში. რამდენიმე საათში ქალი სასტუმროს ნომრის აბაზანაში გარდაცვლილი იპოვეს. ოჯახის ინფორმაციით, გარდაცვლილი დალი ელიზბარაშვილი ბათუმში სამუშაოდ იყო წასული.